ଭଦ୍ରକ ଅଫିସ, ୨।୪: ଭଦ୍ରକ ଟାଉନ ଥାନା ପୋଲିସ ଶୁକ୍ରବାର ମୋଟେଲ ଛକ ନିକଟରୁ ଜଣେ ବ୍ରାଉନସୁଗାର ବ୍ୟବସାୟୀଙ୍କୁ ଗିରଫ କରିଛି। ସେ ହେଲେ ଧୂଷୁରୀ ଥାନା ଅଧୀନ ବାଲିପାଟଣା ଗାଁର ପ୍ରଦୀପ କୁମାର ମହାନ୍ତି ଓରଫ ଟୁଲୁ। ପୋଲିସ ତାଙ୍କ ନିକଟରୁ ୧୪ ଗ୍ରାମର ବ୍ରାଉନସୁଗାର ଜବତ କରିଛି। ପ୍ରଦୀପ ଜଳେଶ୍ୱର ଅଞ୍ଚଳରୁ ବ୍ରାଉନସୁଗାର ଆଣି ଭଦ୍ରକରେ ବ୍ୟବସାୟ କରୁଥିଲେ। କୌଣସି ସୂତ୍ରରୁ ଖବର ପାଇ ଟାଉନ ଥାନା ପୋଲିସ ମୋଟେଲ ଛକ ନିକଟରୁ ତାଙ୍କୁ କାବୁ କରିଥିଲା। ପୋଲିସ ତାଙ୍କ ପାଖରୁ ୨ଟି ମୋବାଇଲ ଫୋନ ଓ ଏକ ବାଇକ୍ ମଧ୍ୟ ଜବତ କରିଛି। ଜବତ ବ୍ରାଉନସୁଗାରର ଆନୁମାନିକ ମୂଲ୍ୟ ପ୍ରାୟ ୨ ଲକ୍ଷ ଟଙ୍କା ହେବ ବୋଲି ଏସ୍ଡିପିଓ ସାର୍ଥକ ରାୟ ସୂଚନା ଦେଇଛନ୍ତି। ଏ ନେଇ ଟାଉନ ଥାନାରେ ଏକ ମାମଲା (ନଂ.୧୪୭/୨୧) ରୁଜୁ ହୋଇଛି।
ସୂଚନା ଥାଉକି, ଗତ ବୁଧବାର ୩୩୦ ଗ୍ରାମର ବ୍ରାଉନସୁଗାର ନେଇ ଯାଉଥିବା ବେଳେ ବାସୁଦେବପୁର କୁସୁଣିବିନ୍ଧାର ମନୋରଞ୍ଜନ ମଲିକଙ୍କୁ କାରମେଲ ସ୍କୁଲ ନିକଟରୁ ପୁରୁଣାବଜାର ପୋଲିସ ଗିରଫ କରିଥିଲା।