ଜଗତ୍ସିଂହପୁର ଅଫିସ, ୧୧ା୩: ମାଟ୍ରିକ ପରୀକ୍ଷା ଶୁକ୍ରବାରଠାରୁ ଆରମ୍ଭ ହୋଇଛି। ଏହା ଆସନ୍ତା ୨୦ ତାରିଖ ପର୍ଯ୍ୟନ୍ତ ଚାଲିବ। ଚଳିତବର୍ଷ ଜଗତ୍ସିଂହପୁର ଜିଲାର ୧୩,୪୯୫ ପରୀକ୍ଷାର୍ଥୀଙ୍କୁ ୯୧ଟି କେନ୍ଦ୍ରରେ ପରୀକ୍ଷା ଦେବାର ସୁଯୋଗ ଥିବାବେଳେ ସେଥିରୁ ୨୫୧ ଜଣ ଅନୁପସ୍ଥିତ ରହିଛନ୍ତି। ରେଗୁଲାରରେ ୨୩୫, ମଧ୍ୟମାରେ ୪ ଓ ରାଜ୍ୟ ମୁକ୍ତ ବିଦ୍ୟାଳୟ (ଏସ୍ଓଏସ୍ସି) ରୁ ୧୨ ଜଣ ପିଲା ଅନୁପସ୍ଥିତ ଥିଲେ। କପିମୁକ୍ତ ପରୀକ୍ଷା ଓ ଶାନ୍ତିଶୃଙ୍ଖଳା ପାଇଁ ଜିଲା ଶିକ୍ଷା ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି। ୩ଟି ସ୍କ୍ବାଡ୍ ସମେତ ସମ୍ପୃକ୍ତ ବ୍ଲକର ବିଡିଓ ଓ ତହସିଲଦାରମାନଙ୍କୁ ପରୀକ୍ଷା କେନ୍ଦ୍ର ପରିଦର୍ଶନ କରିବାକୁ ନିର୍ଦ୍ଦେଶ ଦିଆଯାଇଛି। ପ୍ରତି କେନ୍ଦ୍ରରେ ପୋଲିସ ବ୍ୟବସ୍ଥା କରାଯାଇଛି। ବିଗତବର୍ଷ ପରି ଚଳିତବର୍ଷ ରୋଗୁଲାର ସାଙ୍ଗକୁ ଏକ୍ସ ରୋଗୁଲାର, ମଧ୍ୟମା ଏବଂ ରାଜ୍ୟ ମୁକ୍ତ ବିଦ୍ୟାଳୟ (ଏସ୍ଓଏସ୍ସି) ଛାତ୍ରୀଛାତ୍ରଙ୍କ ପାଇଁ ଏକକାଳିନ ମାଟ୍ରିକ ପରୀକ୍ଷା ଅନୁଷ୍ଠିତ ହେଉଛି। ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ (ଡିଇଓ) ନିରଞ୍ଜନ ବେହେରା କହିଛନ୍ତି, ଜିଲାର ୧୫,୪୫୭ ଜଣ ଛାତ୍ରୀ,ଛାତ୍ର ରେଗୁଲାର ଓ ଏକ୍ସ-ରେଗୁଲାର ପରୀକ୍ଷା ଦେବା ପାଇଁ ସୁଯୋଗ ଥିଲା। କିନ୍ତୁ ପ୍ରଥମ ଦିନ ୧୩,୧୨୨ ଜଣ ପରୀକ୍ଷା ଦେଇଛନ୍ତି। ସେହିପରି ଏସ୍ଓଏସ୍ସି ୭୨ ଜଣଙ୍କ ମଧ୍ୟରୁ ୬୦ ଏବଂ ମଧ୍ୟମା ୪୪ରୁ ୪୦ ଜଣ ପରୀକ୍ଷା ଦେଇଛନ୍ତି। ଜିଲାର ସମସ୍ତ ବ୍ଲକରେ ନୋଡାଲ କେନ୍ଦ୍ର କରାଯାଇଛି। ସେଗୁଡିକ ହେଲା ଜଗତ୍ସିଂହପୁର ସରକାରୀ ବାଳିକା ଉଚ୍ଚ ବିଦ୍ୟାଳୟ, ନାଉଗାଁ ଉଚ୍ଚ ବିଦ୍ୟାଳୟ, ବାଲିକୁଦା ଉଚ୍ଚ ବିଦ୍ୟାଳୟ, ଏରସମା ଉଚ୍ଚ ବିଦ୍ୟାଳୟ, କୁଜଙ୍ଗର ବି. ବି. ହାଇସ୍କୁଲ, ତିର୍ତ୍ତୋଲର ଏମ୍. ଏସ୍. ଏକାଡେମୀ, ରଘୁନାଥପୁରର ପି. ସି. ବିଦ୍ୟାମନ୍ଦିର ଓ ବିରିଡ଼ିର ପଞ୍ଚାୟତରାଜ ଉଚ୍ଚ ବିଦ୍ୟାଳୟ। ନୋଡାଲ କେନ୍ଦ୍ରଗୁଡିକରେ ପ୍ରଶ୍ନପତ୍ର ଓ ଉତ୍ତର ଖାତା ଯେପରି ସୁରକ୍ଷିତ ରହିବ ସେନେଇ ସଶସ୍ତ୍ର ପୋଲିସ ମୁତୟନ କରାଯାଇଛି। ଏହି ନୋଡାଲ କେନ୍ଦ୍ରଗୁଡ଼ିକରୁ ସମସ୍ତ କେନ୍ଦ୍ରକୁ ଠିକ ଭାବେ ପ୍ରଶ୍ନପତ୍ର ପହଞ୍ଚାଇବା ଏବଂ ଖାତା ଆଣିବା ପାଇଁ ୨୧ଟି ଡେସ୍ପାଚ୍ ଟିମ୍ ଗଠନ ହୋଇଛି। ସେଥିମଧ୍ୟରୁ ବାଲିକୁଦା, ଏରସମା, ଜଗତ୍ସିଂହପୁର, କୁଜଙ୍ଗ ଓ ତିର୍ତ୍ତୋଲ ବ୍ଲକ ପାଇଁ ୩ଟି ଲେଖାଏଁ ଥିବାବେଳେ ଅବଶିଷ୍ଟ ବ୍ଲକରେ ୨ଟି ଲେଖାଏଁ ଡେସ୍ପାଚ୍ ଟିମ୍ ରହିଛି। ପରୀକ୍ଷା ପରିଚାଳନା ପାଇଁ ଜିଲାରେ ଏକ କଣ୍ଟ୍ରୋଲ ରୁମ୍ କାର୍ଯ୍ୟକ୍ଷମ ହୋଇଛି। ପ୍ରତ୍ୟହ ପରୀକ୍ଷା ସକାଳ ୮ଟାରୁ ଆରମ୍ଭ ହେଉଛି। ବିଷୟ ଅନୁସାରେ ପରୀକ୍ଷା ସରିବାର ସର୍ବାଧିକ ସମୟ ୧୦ଟା୧୫ ଧାର୍ଯ୍ୟ କରାଯାଇଛି । ପ୍ରଥମ ଦିନ ମାତୃଭାଷା ପରୀକ୍ଷା ଶାନ୍ତି ଓ ଶୃଙ୍ଖଳା ମଧ୍ୟରେ ଅନୁଷ୍ଠିତ ହୋଇଯାଇଛି । ୩ଟି ସ୍କ୍ବାଡ୍ ୧୫ଟି କେନ୍ଦ୍ର ପରିଦର୍ଶନ କରିଥିଲେ ସୁଦ୍ଧା ଜଣେ କେହି ଏମ୍ପି (ମାଲ ପ୍ରାକ୍ଟିସ୍) ହୋଇନାହାନ୍ତି।