ପରଜଙ୍ଗ, ୭ା୪(ଡି.ଏନ୍.ଏ.): ଢେଙ୍କାନାଳ ଜିଲା ପରଜଙ୍ଗ ବ୍ଲକ ଆଖୁଆପାଳ ପଞ୍ଚାୟତ ରଙ୍ଗଥଳି ଛକ ନିକଟ ୧୪୯ନଂ. ଜାତୀୟ ରାଜପଥ ପାର୍ଶ୍ୱରେ ଥିବା ୫ନଂ.ବସ୍ତିରେ ଜଳସଙ୍କଟ ଉତ୍କଟରୂପ ଧାରଣ କରିଛି। ଏହାର ପ୍ରତିବାଦରେ ବୁଧବାର ବସ୍ତିବାସୀ ହାଣ୍ଡି, ମାଠିଆ ରଖି ରାଜପଥ ଅବରୋଧ କରିଥିଲେ।
ଅଭିଯୋଗ ଅନୁଯାୟୀ, ଉକ୍ତ ବସ୍ତିରେ ୩୫ ପରିବାର ରହୁଛନ୍ତି। ପିଇବା ପାଣି ଯୋଗାଣ ପାଇଁ ୭ମାସ ତଳେ ୨ଟି ବୋରୱେଲ ଖନନ କରାଯାଇଥିଲେ ମଧ୍ୟ ତାହା ଅଦ୍ୟାବଧି କାର୍ଯ୍ୟକ୍ଷମ ହୋଇପାରୁନାହିଁ। ସେହିପରି ସୋଲାର ଶକ୍ତିରେ ପରିଚାଳିତ ନଳକୂପରୁ ବଡ଼କଷ୍ଟରେ ୧୫-୨୦ ମିନିଟ୍ ପାଣି ବାହାରୁଛି। ଜଳସ୍ତର ହ୍ରାସ ପାଇଥିବାରୁ ନଳକୂପରୁ ଠିକ୍ ଭାବେ ପାଣି ବାହାରୁନାହିଁ। ବିଶେଷ କରି ଖରାଦିନେ ଏଭଳି ସମସ୍ୟା ସୃଷ୍ଟି ହେଉଛି। ବିଭାଗୀୟ ଅଧିକାରୀଙ୍କ ଆନ୍ତରିକତା ଅଭାବରୁ ଏହାର ସମାଧାନ ହୋଇପାରୁନାହିଁ। ତେଣୁ ଗ୍ରାମବାସୀ ପୂର୍ବାହ୍ନ ୯ଟାରୁ ୨ଘଣ୍ଟା ଧରି ରାସ୍ତାରୋକୋ କରିଥିଲେ। ଫଳରେ ତାଳଚେର-ପାଲଲହଡ଼ାରୁ ଆସୁଥିବା ସମସ୍ତ ଯାନବାହନ ଅଟକି ରହିବା ସହ ଯାତାୟତ ସମ୍ପୂର୍ଣ୍ଣ ଠପ୍ ହୋଇଯାଇଥିଲା। ସୂଚନା ପାଇ ବିଭାଗୀୟ ଅଧିକାରୀ ଏବଂ କର୍ମଚାରୀମାନେ ପହଞ୍ଚତ୍ ଆନ୍ଦୋଳନକାରୀଙ୍କ ସହ ଆଲୋଚନା କରିଥିଲେ। ନଳକୂପ ମରାମତି କରାଯିବ ଏବଂ ଖୁବ୍ଶୀଘ୍ର ବୋରୱେଲ କାର୍ଯ୍ୟକ୍ଷମ ଲାଗି ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବା ପରେ ରାସ୍ତାରୋକୋ ହଟିଥିଲା।
