ଅହମଦାବାଦ, ୧୨।୭ : ଗୁଜୁରାଟର ଆତଙ୍କବାଦ ବିରୋଧୀ ସ୍କ୍ବାଡ (ଏଟିଏସ)କୁ ଏକ ବଡ଼ ସଫଳତା ମିଳିଛି। କୁଚ ଜିଲାର ମୁନ୍ଦ୍ରା ବନ୍ଦର ନିକଟରେ ଥିବା ଏକ କଣ୍ଟେରନରରୁ ପ୍ରାୟ ୭୦ କିଲୋଗ୍ରାମ ହେରୋଇନ ଜବତ କରାଯାଇଛି। ଅନ୍ତର୍ଜାତୀୟ ବଜାରରେ ଏହାର ମୂଲ୍ୟ ୩୫୦ କୋଟିରୁ ଅଧିକ ବୋଲି କୁହାଯାଉଛି। ହେରୋଇନକୁ କାର୍ଗୋରେ ଲୁଚାଇ ରଖାଯାଇଥିଲା।
ଶିପିଂ କଣ୍ଟେନରରେ ଡ୍ରଗ୍ସର ଉପସ୍ଥିତି ବିଷୟରେ ଏଟିଏସ ସୂଚନା ପାଇଥିଲା। ଯାହା ପରେ ଏଟିଏସ ଟିମ ପକ୍ଷରୁ ଶିପିଂ କଣ୍ଟେନରକୁ ସର୍ଚ୍ଚ କରାଯାଇଥିଲା। ଏହା କିଛି ସମୟ ପୂର୍ବରୁ ଅନ୍ୟ ଦେଶରୁ ଆସିଥିଲା ଏବଂ ବନ୍ଦର ବାହାରେ ଏକ କଣ୍ଟେନର ମାଲବାହୀ ଷ୍ଟେଶନରେ ରଖାଯାଇଥିଲା। ଜଣେ ଏଟିଏସ ଅଧିକାରୀ କହିଛନ୍ତି ଏଠାରୁ ପ୍ରାୟ ୭୦ କିଲୋଗ୍ରାମ ହେରୋଇନ ଜବତ କରାଯାଇଛି।
ବିଦେଶରୁ ଗୁଜରାଟ ବନ୍ଦରରେ ପହଞ୍ଚୁଥିବା ଜାହାଜ ପରିବହନ ସାମଗ୍ରୀରୁ ଏଟିଏସ ଏବଂ ଡାଇରେକ୍ଟୋରେଟ ଅଫ ରେଭିନ୍ୟୁ ଇଣ୍ଟେଲିଜେନ୍ସ (ଡିଆରଆଇ) କୋଟି କୋଟି ଟଙ୍କାର ଡ୍ରଗ୍ସ ଜବତ କରିଥାଏ। ସେପ୍ଟେମ୍ବର ୨୦୨୧ରେ ମୁନ୍ଦ୍ରା ବନ୍ଦରରୁ ଦୁଇଟି କଣ୍ଟେନରରୁ ପ୍ରାୟ ୩୦୦୦ କିଲୋଗ୍ରାମ ହିରୋଇନ ଜବତ କରିଥିଲା। ଆନ୍ତର୍ଜାତୀୟ ବଜାରରେ ଏହାର ମୂଲ୍ୟ ୨୧,୦୦୦ କୋଟି ଟଙ୍କା ଥିଲା। ଚଳିତ ବର୍ଷ ମେ ମାସରେ
ମୁନ୍ଦ୍ରା ବନ୍ଦରରୁ ୫୦୦ କୋଟି ଟଙ୍କା ମୂଲ୍ୟର ୫୬ କିଲୋଗ୍ରାମ କୋକେନ ଜବତ ହୋଇଥିଲା।
କୁଚର କାଣ୍ଡଲା ବନ୍ଦର ନିକଟରେ ଥିବା ଏକ କଣ୍ଟେନରରୁ ଡିଆରଆଇ ୧,୪୩୯ କୋଟି ଟଙ୍କା ମୂଲ୍ୟର୨୦୫.୬ କିଲୋଗ୍ରାମ ହେରୋଇନ ଜବତ କରାଯାଇଥିଲା। କିଛି ଦିନ ତଳେ, ଡିଆରଆଇ ଏବଂ ଗୁଜୁରାଟ ଏଟିଏସ ଏକ ଶିପିଂ କଣ୍ଟେନରରୁ ୪୫୦ କୋଟି ଟଙ୍କା ମୂଲ୍ୟର ୯୦ କିଲୋଗ୍ରାମ ହେରୋଇନ ଜବତ କରିଥିଲା।