ନୂଆଦିଲ୍ଲୀ, ୧୮ା୯ (ପ.ଟି.)-ଇଂଲଣ୍ଡ ଓ ଅଷ୍ଟ୍ରେଲିଆ କ୍ରିକେଟ ଖେଳାଳିଙ୍କ ଅନୁରୋଧ ରକ୍ଷା କରାଯାଇଛି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଖେଳିବା ଲାଗି ୟୁନାଇଟେଡ କିଙ୍ଗଡମ୍ (ୟୁକେ)ରୁ ଆସି ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ପହଞ୍ଚତ୍ବା ପରେ ସେମାନଙ୍କୁ ପୂର୍ବ ନିୟମ ଅନୁସାରେ ୬ଦିନ ପରିବର୍ତ୍ତେ ମାତ୍ର ୩୬ଘଣ୍ଟା କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ୟୁକେରେ ହ୍ବାଇଟ୍ ବଲ୍ ସିରିଜ ଖେଳିସାରିବା ପରେ ଆଇପିଏଲ୍ ଖେଳିବା ଲାଗି ଅଷ୍ଟ୍ରେଲିଆ ଓ ଇଂଲଣ୍ଡର ୨୧ ଜଣ ଖେଳାଳି ୟୁଏଇ ମୁହାଁ ହୋଇଛନ୍ତି। ଖବର ଅନୁସାରେ ଅଷ୍ଟ୍ରେଲିଆର ଜଣେ ବରିଷ୍ଠ ଖେଳାଳି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲିଙ୍କୁ ଅନୁରୋଧ କରି ଏକ ଚିଠି ଲେଖିଥିଲେ। କ୍ୱାରାଣ୍ଟାଇନ୍ ପିରିୟଡ ୬ ଦିନ ପରିବର୍ତ୍ତେ ୩ ଦିନ କରାଗଲେ ସେମାନେ ଟୁର୍ନାମେଣ୍ଟ ଆରମ୍ଭରୁ ଖେଳିପାରିବେ ବୋଲି ସେ କହିଥିଲେ। ଖେଳାଳିମାନଙ୍କ ଯୁକ୍ତି ହେଲା ସେମାନେ ପ୍ରଥମେ ଅଷ୍ଟ୍ରେଲିଆ ଏବଂ ପରେ ୟୁକେରେ ଏକ ବାୟୋ-ବବଲ ମଧ୍ୟରେ ରହି ଆସିଛନ୍ତି। ସେମାନେ ବହୁଦିନ ହେଲା ବାହାର ସଂସ୍ପର୍ଶରେ ଆସି ନ ଥିବାରୁ ଗୋଟିଏ ବାୟୋ-ବବଲରୁ ଅନ୍ୟଟିରେ ପ୍ରବେଶ ପାଇଁ ଅନୁମତି ଦିଆଯିବା ଉଚିତ। ଗାଙ୍ଗୁଲି ୟୁଏଇରେ ସ୍ଥାନୀୟ କର୍ତ୍ତୃପକ୍ଷଙ୍କ ସହିତ କଥାବାର୍ତ୍ତା ପରେ ସମସ୍ୟାର ସମାଧାନ ହୋଇ ପାରିଛି। କ୍ୱାରାଣ୍ଟାଇନ୍ ପିରିୟଡ ୩୬ ଘଣ୍ଟାକୁ ହ୍ରାସ କରାଯିବା ଦ୍ୱାରା ଚେନ୍ନାଇ ସୁପର କିଙ୍ଗ୍ସ (ଜୋସ୍ ହାଜଲେଉଡ ଓ ଟମ୍ କୁରାନ), ରାଜସ୍ଥାନ ରୟାଲ୍ସ (ଷ୍ଟିଭ୍ ସ୍ମିଥ୍, ଜୋସ୍ ବଟଲର, ଜ୍ରୋଫା ଆର୍ଚର) ଭଳି ଦଳ ସେମାନଙ୍କ ପ୍ରଥମ ଗେମ୍ରୁ ସମସ୍ତ ଖେଳାଳିଙ୍କୁ ପାଇ ପାରିବେ। ସେହିପରି କିଙ୍ଗ୍ସ ଇଲେଭେନ ପଞ୍ଜାବ ଏହାର ରୋଷ୍ଟରରେ ଗ୍ଲେନ ମାକ୍ସଓ୍ବେଲ ଏବଂ ଦିଲ୍ଲୀ କ୍ୟାପିଟାଲ୍ସ ଆଲେକ୍ସ କାରେଙ୍କୁ ପାଇବ ବୋଲି ଫ୍ରାଞ୍ଚାଇଜର ଜଣେ ଅଫିସିଆଲ କହିଛନ୍ତି।
