ନୂଆଦିଲ୍ଲୀ,୨୩।୯ : ଗତ କିଛି ବର୍ଷ ମଧ୍ୟରେ ନକଲି ପାସପୋର୍ଟ ତଥା ଅନ୍ୟାନ୍ୟ ବେଆଇନ ଉପାୟ ମାଧ୍ୟମରେ କାନାଡା, ଆମେରିକା ଏବଂ ଅନ୍ୟ ୟୁରୋପୀୟ ଦେଶକୁ ୩୬୮ ଆତଙ୍କବାଦୀ, ଗ୍ୟାଙ୍ଗଷ୍ଟର, ଚୋରା ଚାଲାଣକାରୀ ଏବଂ ମୌଳବାଦୀ ପଳାୟନ କରିଛନ୍ତି। କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟ ବର୍ତ୍ତମାନ ଏହି ମାମଲାର ତଦନ୍ତକୁ ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) କୁ ହସ୍ତାନ୍ତର କରିଛି।
ବର୍ତ୍ତମାନ ଏହି ଅପରାଧୀଙ୍କୁ ଖୋଜିବା ପାଇଁ ଏନଆଇଏ ଏବଂ ପଞ୍ଜାବ ପୋଲିସ ମିଳିତ ଭାବେ କାର୍ଯ୍ୟ କରିବେ। ଜାଲିଆତି କରି ବିଦେଶକୁ ପଳାଇଥିବା ଅଧିକାଂଶ ଅପରାଧୀ ପଞ୍ଜାବର ଅଟନ୍ତି, ତେଣୁ ଏନଆଇଏ ପକ୍ଷରୁ ପଞ୍ଜାବ ପୋଲିସକୁ ଏହି ଅପରାଧୀଙ୍କ ତାଲିକା ମଗାଯାଇଛି। ପଞ୍ଜାବ ପୋଲିସ ମଧ୍ୟ ଏହିପରି ଅପରାଧୀଙ୍କ ସମ୍ପର୍କରେ ବିଭିନ୍ନ କୋର୍ଟରୁ ତଥ୍ୟ ସଂଗ୍ରହ କରିବେ।
ସୂଚନା ଅନୁଯାୟୀ, କାନାଡା ଏବଂ ଆମେରିକାରେ ପହଞ୍ଚିବା ପାଇଁ ଛାତ୍ର କିମ୍ବା ପରିଦର୍ଶକ ଭିଜା ପାଇବା ଲାଗି ଆତଙ୍କବାଦୀ, ଗ୍ୟାଙ୍ଗଷ୍ଟର, ଚୋରା ଚାଲାଣକାରୀ ଏବଂ ମୌଳବାଦୀ ନକଲି ପରିଚୟ ଏବଂ ପାସପୋର୍ଟ ବ୍ୟବହାର କରିଛନ୍ତି। ସେମାନେ ବିଦେଶରେ ପହଞ୍ଚି ଭାରତ ବିରୋଧରେ କାର୍ଯ୍ୟ କରିବା ସହ ଭାରତରେ ଅନ୍ୟାୟ ଭାବରେ ନିର୍ଯାତିତ ହୋଇଥିବା ଦାବି କରି ଆଶ୍ରୟ ନେଇଛନ୍ତି। ସାଂପ୍ରତିକ ସମୟରେ ସବୁଠାରୁ ଆଶ୍ଚର୍ଯ୍ୟଜନକ ଘଟଣା ହେଉଛି ଗ୍ୟାଙ୍ଗଷ୍ଟର ଅନମୋଲ ବିଶ୍ନୋଇ ଏବଂ ସିଦ୍ଧୁ ମୋସେୱାଲା ହତ୍ୟା ମାଷ୍ଟରମାଇଣ୍ଡ ଲରେନ୍ସ ବିଶ୍ନୋଇଙ୍କ ବିଦେଶକୁ ପଳାୟନ। ଏପ୍ରିଲ ମାସରେ, ୨୯ ମେ ୨୦୨୨ରେ ମୋସେୱାଲାଙ୍କ ହତ୍ୟା ହେବାର ଏକ ମାସ ପୂର୍ବରୁ, ଅନମୋଲ ଏକ ଜାଲ ପାସପୋର୍ଟରେ ଅନ୍ୟ ଜଣେ କୁଖ୍ୟାତ ଗ୍ୟାଙ୍ଗଷ୍ଟର ସଚିନ ଥାପାନଙ୍କ ସହ ବିଦେଶ ପଳାଇଥିଲେ।
ସିଦ୍ଧୁ ମୋସୱାଲାଙ୍କ ହତ୍ୟା ମାମଲାର ମାଷ୍ଟରମାଇଣ୍ଡ ଗୋଲଡି ବରାଡଙ୍କ ବିରୋଧରେ ୨୧ ଟି ଏଫଆଇଆର ପଞ୍ଜୀକୃତ ହୋଇଥିଲେ ହେଁ ସେ ନକଲି କାଗଜପତ୍ରରେ କାନାଡା ପାଇଁ ଭିଜିଟର ଭିଜା ପାଇଥିଲେ। ଗ୍ୟାଙ୍ଗଷ୍ଟର-ଆତଙ୍କବାଦୀ ଆର୍ଶ ଦଲ୍ଲାଙ୍କ ସହଯୋଗୀ ରିଙ୍କୁ ରାନ୍ଧୱା ମଧ୍ୟ ନକଲି ଦଲିଲରେ କାନାଡା ଯାଇଥିଲେ। ୨୦୨୦ ମସିହାରେ ଡେରା ଅନୁଯାୟୀଙ୍କ ହତ୍ୟା ପାଇଁ ତାଙ୍କୁ ଟଙ୍କା ଏବଂ ସାମଗ୍ରୀ ଯୋଗାଇ ଦିଆଯାଇଥିବା ଅଭିଯୋଗ ହୋଇଥିଲା। ରିପୁଦମନ ମଲିକଙ୍କ ହତ୍ୟାରେ ସମ୍ପୃକ୍ତ ଥିବା ଅର୍ଶ ଦଲ୍ଲା ନକଲି କାଗଜପତ୍ରରେ କାନାଡାରେ ପହଞ୍ଚିଥିଲେ ଏବଂ ସେଠାକୁ ଯିବା ପରେ ସେ କାନାଡିଆନ ପିଆର ପାଇଥିଲେ। ବାବା ଦଲ୍ଲା ସୁଖପ୍ରୀତ ବୁଦ୍ଧ ଗ୍ୟାଙ୍ଗର ପ୍ରମୁଖ ସଦସ୍ୟ। ତାଙ୍କ ବିରୋଧରେ ୬ ଏଫଆଇଆର୍ ପଞ୍ଜୀକୃତ ହୋଇଥିଲେ ବି ତାଙ୍କୁ ଭିଜା ମିଳିଥିଲା।
ସୂତ୍ରରୁ ପ୍ରକାଶ ଆମେରିକାର କାଲିଫର୍ନିଆ ପଞ୍ଜାବର ଗ୍ୟାଙ୍ଗଷ୍ଟର ତଥା ଖାଲିସ୍ତାନୀ ଅପରେଟିଭଙ୍କ ପାଇଁ ଏକ ପ୍ରିୟ ଲୁଚି ରହିବା ସ୍ଥାନ ଅଟେ। ସାନ ଫ୍ରାନ୍ସିସ୍କୋରେ ଥିବା ଭାରତୀୟ କନସୁଲେଟ ଉପରେ ଆକ୍ରମଣ କରିଥିବା ୧୦ ଜଣ ଖାଲିସ୍ତାନୀଙ୍କ ତାଲିକା ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ପ୍ରକାଶ କରିଛି।