ନୋଏଡା, ୨୫।୮ : ଆଉ କିଛି ଘଣ୍ଟା ପରେ, ନୋଏଡାରେ ଆକାଶକୁ ଛୁଇଁଥିବା ଟୁଇନ ଟାଓ୍ବାର ଭାଙ୍ଗି ମାଟିରେ ମିଶିବ। ପ୍ରସ୍ତୁତି ଶେଷ ହୋଇଛି। ସେକ୍ଟର ୯୩-ଏ ରେ ଅବସ୍ଥିତ ଉଭୟ ୩୨ ଏବଂ ୨୯ ମହଲା ବିଶିଷ୍ଟ ଟାୱାରରେ ୩୭୦୦ କିଲୋଗ୍ରାମ ବାରୁଦ ଲଗାଯାଇଛି। ଏହାର ବିସ୍ଫୋରଣରେ ମାତ୍ର ୯-୧୨ ସେକେଣ୍ଡ ମଧ୍ୟରେ ଟୁଇନ ଟାଓ୍ବାର ଭାଙ୍ଗି ଅଳିଆ ଗଦାରେ ପରିଣତ ହେବ। ୧୦୨ମିଟର ଉଚ୍ଚ ଟାୱାର ଦ୍ୱାରା ୧୧ ମିଟର ଉଚ୍ଚ ଅଳିଆ ଗଦା ସୃଷ୍ଟି ହେବ ବୋଲି କୁହାଯାଉଛି। ଏଥିରେ ୯୧୫ ଫ୍ଲାଟ ରହିଛି।
ଟୁଇନ ଟାୱାର ଭାଙ୍ଗିବା ପୂର୍ବରୁ ଆଖପାଖରେ ବାସ କରୁଥିବା ଲୋକଙ୍କୁ ସତର୍କତା ଅବଲମ୍ବନ କରିବାକୁ କୁହାଯାଇଛି। ପ୍ରାୟ ୭ ହଜାର ପରିବାରଙ୍କୁ ଘର ଛାଡ଼ିବାକୁ ପଡ଼ିଛି। ଏହି ଅଞ୍ଚଳର ସମସ୍ତ ରାସ୍ତାକୁ ସିଲ କରାଯାଇଛି। ୬ଟି ସୋସାଇଟିର ଲୋକଙ୍କୁ ସେମାନଙ୍କ ଘର ଟେରାସକୁ ଯିବାକୁ ବାରଣ କରାଯାଇଛି। ତେବେ ଟାୱାର ଭାଙ୍ଗିବା ପାଇଁ ଦାୟୀ କମ୍ପାନୀ ଏବଂ ବିଶେଷଜ୍ଞମାନେ କହିଛନ୍ତି ଯେ ଏହାର ଆଖପାଖରେ ଥିବା ଅଟ୍ଟାଳିକାଗୁଡ଼ିକର କୌଣସି କ୍ଷତି ହେବ ନାହିଁ।
ଦେଶରେ ପ୍ରଥମ ଥର ପାଇଁ ଏଭଳି ଉଚ୍ଚ କୋଠାକୁ ଭାଙ୍ଗି ଦିଆଯାଉଛି। ଏହାପୂର୍ବରୁ ଉକ୍ତ କମ୍ପାନୀ କେରଳର କୋଚିରେ ଥିବା ଆପାର୍ଟମେଣ୍ଟ କମ୍ପ୍ଲେକ୍ସକୁ ଭାଙ୍ଗି ଦେଇଥିଲା। ୨୦୧୯ରେ, ସୁପ୍ରିମକୋର୍ଟ କୋଚିର ମାରାଡୁରେ ନିୟମ ବିରୁଦ୍ଧରେ ନିର୍ମିତ ଚାରୋଟି ଆପାର୍ଟମେଣ୍ଟକୁ ଭାଙ୍ଗିବାକୁ ନିର୍ଦ୍ଦେଶ ଦେଇଥିଲେ। ଏହି କୋଠାଟି ୬୫ ମିଟର ଉଚ୍ଚ ଥିଲା। ଜାନୁଆରୀ ୨୦୨୦ ରେ ଏହାକୁ ଭଙ୍ଗା ଯାଇଥିଲା। ଏଥିରେ ୩୪୩ ଫ୍ଲାଟ ଥିଲା।