ବାଲେଶ୍ୱର,୨୦।୧(ମାନସ ବିଶ୍ୱାଳ): ବାଲେଶ୍ୱର ଜିଲାରେ ଶେଷ ହୋଇଛି ପକ୍ଷୀ ଗଣନା। ଜିଲାର ଜଳେଶ୍ୱର, ଚାନ୍ଦିପୁର, ନୀଳଗିରି, କୁଲଡ଼ିହା ଓ ସୋର ପ୍ରଭୃତି ୫ ରେଞ୍ଜର ବିଭିନ୍ନ ସ୍ଥାନରେ ପକ୍ଷୀ ଗଣନା ପାଇଁ ୧୭ଟି ଟିମ୍ ନିୟୋଜିତ ହୋଇଥିଲେ। ବିଭାଗୀୟ ରେଞ୍ଜ ଅଧିକାରୀଙ୍କ ତତ୍ତ୍ୱାବଧାନରେ ଚାନ୍ଦିପୁର ରେଞ୍ଜର ଆଇଟିଆର୍ କ୍ୟାମ୍ପସ୍, ଚାନ୍ଦିପୁର, ପରଖି, ରୂପଖଣ୍ଡ, କଣ୍ଟିଆଚିରା ନଦୀ ମୁହାଣ, ବୁଢ଼ାବଳଙ୍ଗ ନଦୀ ମୁହାଣ ଓ ବାହାବଳପୁର ନଦୀ ମୁହାଣରେ ୨୧ହଜାର ୨୩୭ ପକ୍ଷୀ ଦେଖିବାକୁ ମିଳିଥିଲା। ସେହିପରି ଜଳେଶ୍ୱର ରେଞ୍ଜର ମୁରଲୀଚଡ଼, ସୁବର୍ଣ୍ଣରେଖା ମୁହାଣ, ତାଳସାରୀ ବିଚ୍ରେ ୧୪ହଜାର ୫୮୯ଟି ପକ୍ଷୀ, ସୋର ରେଞ୍ଜର ସିନ୍ଧୁଆ, ବଣପାରିଆ, ଷୋଳଭଉଣୀ ଡ୍ୟାମ୍ରେ ୭୧୦ଟି ପକ୍ଷୀ, ନୀଳଗିରି ରେଞ୍ଜର ପଦ୍ମତୋଳା ହ୍ରଦରେ ୫୭୮ଟି ପକ୍ଷୀ ଏବଂ କୁଲଡ଼ିହା ରେଞ୍ଜର ରୁଷିଆ, ଖୁମକୁଟ, ବଗାଳିବନ୍ଧରେ ୪୬୩ଟି ପକ୍ଷୀ ଥିବା ଗଣତିରୁ ଜଣାପଡ଼ିଛି। ମୋଟ୍ ୩୭ହଜାର ୫୭୭ ପକ୍ଷୀ ସଂଖ୍ୟା ମଧ୍ୟରୁ ୯୪ ପ୍ରଜାତିର ପକ୍ଷୀ ଆସିଥିବା ବେଳେ ଏଥିରୁ ଦେଶୀ ୬୫ଟି ପ୍ରଜାତିର ଓ ବିଦେଶୀ ୨୯ଟି ପ୍ରଜାତିର ଆସିଛନ୍ତି। ଚଳିତ ବର୍ଷ ଆସିଥିବା ଦେଶୀ ପକ୍ଷୀଙ୍କ ଭିତରୁ ୧୪ ହଜାର ୫୦୦ଟି ଲେସର ହୁଇସ୍ଲିଙ୍ଗ ଡକ୍ ପକ୍ଷୀ ଅଧିକ ଆସିଛନ୍ତି। ସେହିପରି ୧୦୧୦ଟି ଲାର୍ଜ ହୁଇସ୍ଲିଙ୍ଗ୍ ଡକ୍ ବିଦେଶୀ ପକ୍ଷୀ ଅଧିକ ଆସିଛନ୍ତି। ସର୍ବାଧିକ ପକ୍ଷୀ ଚାନ୍ଦିପୁର ଏବଂ ସର୍ବନିମ୍ନ କୁଲଡ଼ିହା ରେଞ୍ଜକୁ ଆସିଥିବା ବନ୍ୟପ୍ରାଣୀ ବିଭାଗର ରିପୋର୍ଟରୁ ଜଣାପଡ଼ିଛି।
ପ୍ରତିବର୍ଷ ବାଲେଶ୍ୱରକୁ ଦେଶ ବିଦେଶରୁ ପକ୍ଷୀଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି। ୨୦୨୧ରେ ଜିଲାକୁ ୧୪ହଜାର ୧୫୫ ପକ୍ଷୀ ଆସିଥିବା ବେଳେ ଏଥିରୁ ୩୮ ବିଦେଶୀ ଓ ୬୨ ପ୍ରଜାତିର ବିଭିନ୍ନ ଦେଶୀ ପକ୍ଷୀ ଆସିଥିଲେ। ସେହିପରି ୨୦୨୨ରେ ୨୩ହଜାର ୧୨୦ ପକ୍ଷୀ ଆସିଥିବା ବେଳେ ଏଥିରୁ ଦେଶୀ ୬୨ ଓ ବିଦେଶୀ ୩୯ ପ୍ରଜାତିର ପକ୍ଷୀ ଆସିଥିଲେ। ୨୦୨୩ରେ ଜିଲାକୁ ୨୯ହଜାର ୮୫୬ ପକ୍ଷୀ ଆସିଥିଲେ।
ଚାନ୍ଦିପୁର ବେଳାଭୂମି ସମେତ ଖାଦ୍ୟ ଓ ପାନୀୟ ଏବଂ ସୁରକ୍ଷା ଦୃଷ୍ଟିକୋଣରୁ ଆଇଟିଆର୍ କ୍ୟାମ୍ପସ୍ ପକ୍ଷୀମାନଙ୍କ ପ୍ରଥମ ପସନ୍ଦ ସ୍ଥାନ ପାଲଟିଛି। ଲେସର ହୁଇସ୍ଲିଙ୍ଗ ଡକ୍ ପକ୍ଷୀ ଏହି ସ୍ଥାନକୁ ଅଧିକ ଆସିଥିବା ଜଣାପଡ଼ିଛି। ରଙ୍ଗବେରଙ୍ଗର ପକ୍ଷୀଙ୍କ ପାଇଁ କ୍ୟାମ୍ପସ୍ର ସୌନ୍ଦର୍ଯ୍ୟ ଆହୁରି ଦ୍ୱିଗୁଣିତ ହୋଇଥିବା ପରିବେଶବିତ୍ଙ୍କ ସମେତ ବିଭାଗୀୟ ଅଧିକାରୀମାନେ ମତ ରଖିଛନ୍ତି।
