ଭୁବନେଶ୍ୱର,୨୭।୯ (ବ୍ୟୁରୋ):ଗିରଫଦାରି ଓ କାର୍ଯ୍ୟାନୁଷ୍ଠାନ ସତ୍ତ୍ୱେ ରାଜଧାନୀରେ ଦାଦାବଟି ଘଟଣା ବଢ଼ି ଚାଲିଛି। ବ୍ୟବସାୟିକ ସଂସ୍ଥା, ଜମି ମାଲିକ, କଣ୍ଟ୍ରାକ୍ଟରଙ୍କୁ ଅସାମାଜିକ ବ୍ୟକ୍ତିମାନେ ଦାଦାବଟି ମାଗି ପ୍ରାୟ ସମୟ ହଇରାଣ ହରକତ କରୁଛନ୍ତି। ବଟି ନ ପାଇଲେ ଆକ୍ରମଣ ଓ ହତ୍ୟା କରିବାକୁ ପଛାଉ ନାହାନ୍ତି। ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି କମିଶନରେଟ ପୋଲିସ ‘ଦାଦାବଟିକୁ ନା’ ନାମରେ ଏକ ସ୍ବତନ୍ତ୍ର ଅଭିଯାନ ଚଳାଇଛି। ଏହି ଅଭିଯାନରେ କେବଳ ସେପ୍ଟେମ୍ବର ୨୬ ଦିନରେ ଭୁବନେଶ୍ୱର କମିଶନରେଟ ପୋଲିସ ୧୦ ମାମଲା ରୁଜୁ କରିବା ସହ ୧୮ ଜଣଙ୍କୁ ଗିରଫ କରିଛି। ଏହାକୁ ମିଶାଇ ଚଳିତ ବର୍ଷ ଦାଦାବଟି ମାଗି ୩୮ଜଣ ଗିରଫ ହୋଇଥିବା ସୂଚନା ଦିଆଯାଇଛି।
ଦାଦା ବଟି ନ ଦେବାରୁ ଜଣେ ସିକ୍ୟୁରିଟି ଗାର୍ଡ ଓ ତାଙ୍କ ସହକର୍ମୀଙ୍କୁ ଲୁହା ରଡରେ ମରଣାନ୍ତକ ଆକ୍ରମଣ ଅଭିଯୋଗରେ ମଞ୍ଚେଶ୍ୱର ଥାନା ପୋଲିସ ୨ଜଣ ଯୁବକଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ଅଭିଯୁକ୍ତମାନେ ହେଲେ ଗଞ୍ଜାମ ଜିଲା ଛତ୍ରପୁର ଥାନା ଅଞ୍ଚଳର ଧନଞ୍ଜୟ ଆଚାର୍ଯ୍ୟ ଓ ଖୋର୍ଦ୍ଧା ଜିଲା ଟାଙ୍ଗୀ ଅଞ୍ଚଳର ବିଶ୍ୱନାଥ ଜେନା। ସେମାନଙ୍କ ନିକଟରୁ ପୋଲିସ ୨ ଲୁହା ରଡ଼ ଜବତ କରିଥିଲା। ପୂର୍ବରୁ ବାଲୁଗାଁ ଏବଂ ଟାଙ୍ଗୀ ଥାନାରେ ୨ଟି ଆପରାଧିକ ମାମଲାରେ ସମ୍ପୃକ୍ତ ଥିବା ପୋଲିସ ତଦନ୍ତବେଳେ ଜାଣିବାକୁ ପାଇଛି। ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି।
ସୂଚନାନୁସାରେ, କଣ୍ଟ୍ରାକ୍ଟର ବିଜନ କୁମାର ପରିଡା ଟେଣ୍ଡର ପାଇ ଏହି ଥାନା ଅନ୍ତର୍ଗତ ଭୋଟପଡ଼ା ବ୍ରିଜ୍ ମରାମତି କାମ କରୁଛନ୍ତି। ଜଗାରଖା ପାଇଁ ସିକ୍ୟୁରିଟି ଗାର୍ଡ ଭାବରେ କଣ୍ଟ୍ରାକ୍ଟର ବିଜନ ଜଣେ ବ୍ୟକ୍ତିଙ୍କୁ ନିୟୋଜିତ କରାଇଥିଲେ। ସୋମବାର ସମ୍ପୃକ୍ତ ବ୍ୟକ୍ତି ସହକର୍ମୀଙ୍କ ସହ ଡ୍ୟୁଟିରେ ଥିବାବେଳେ ଅଭିଯୁକ୍ତମାନେ ଆସି ତାଙ୍କୁ ଏକ ହଜାର ଟଙ୍କା ଦାଦାବଟି ମାଗିଥିଲେ। ବିରୋଧ କରିବାରୁ ଅଭିଯୁକ୍ତଦ୍ୱୟ ସେମାନଙ୍କୁ ଗାଳି କରିବା ସହିତ ଗୋଟିଏ ଲୁହା ରଡ଼ରେ ମରଣାନ୍ତକ ଆକ୍ରମଣ କରିଥିଲେ। ଏହାପରେ ଆକ୍ରମଣର ଶିକାର ହୋଇଥିବା ସିକ୍ୟୁରିଟ ଗାର୍ଡ ପିସିଆର୍କୁ ଖବର ଦେବାରୁ ପୋଲିସ ପହଞ୍ଚତ୍ ଅଭିଯୁକ୍ତଙ୍କୁ କାବୁ କରିଥିଲା।