ନୂଆଦିଲ୍ଲୀ,୭ା୧୨: ମହାଦେବ ଅନ୍ଲାଇନ ବେଟିଂ ଆପ୍ ସହ ସମ୍ପୃକ୍ତ ମନିଲଣ୍ଡରିଂ ମାମଲାର ତଦନ୍ତ କରୁଥିବା ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ପୁଣି ୩୮୮ କୋଟି ଟଙ୍କାର ସମ୍ପତ୍ତି ବାଜ୍ୟାପ୍ତ କରିଛି। ଏହି ଦୁର୍ନୀତି ମାମଲାରେ ଛତିଶଗଡ଼ର ବହୁ ଉଚ୍ଚ ପାହ୍ୟାର ରାଜନେତା ଓ ପ୍ରଶାସନିକ ଅଧିକାରୀ ସମ୍ପୃକ୍ତ। ବାଜ୍ୟାପ୍ତ ହୋଇଥିବା ସମ୍ପତ୍ତି ମଧ୍ୟରେ ରହିଛି ମରିସସ୍ କମ୍ପାନୀ ଟାନୋ ଇନ୍ଭେଷ୍ଟମେଣ୍ଟ ଅପର୍ଚୁନିଟିଜ୍ ଫଣ୍ଡ୍ ଦ୍ୱାରା ଏଫ୍ପିଆଇ ଏବଂ ଏଫ୍ଡିଆଇ ଜରିଆରେ ଦୁବାଇର ହାଓ୍ବଲା ଅପରେଟର ହରିଶଙ୍କର ଟିବ୍ରଓ୍ବୋଲରେ ହୋଇଥିବା ନିବେଶ ଏବଂ ଛତିଶଗଡ଼, ମୁମ୍ବାଇ ଓ ମଧ୍ୟପ୍ରଦେଶରେ ବେଟିଂ ଆପ୍ର ପ୍ରମୋଟରମାନଙ୍କ ନାଁରେ ଥିବା ସମ୍ପତ୍ତି।
ମନିଲଣ୍ଡରିଂ ପ୍ରତିକାର ଆଇନ (ପିଏମ୍ଏଲ୍ଏ) ଅନୁଯାୟୀ ମୋଟ ୩୮୭.୯୯ କୋଟି ଟଙ୍କାର ସମ୍ପତ୍ତି ଜବତ କରିବାକୁ ଗତ ୫ ତାରିଖରେ ଅସ୍ଥାୟୀ ନିର୍ଦ୍ଦେଶନାମା ଜାରି ହୋଇଥିଲା। ପୂର୍ବରୁ ଏହି ମାମଲାରେ ୨,୨୯୫.୬୧ କୋଟି ଟଙ୍କାର ସମ୍ପତ୍ତି ବାଜ୍ୟାପ୍ତ କରାଯାଇଥିଲା। ବେଟିଂ ଆପ୍ ଦୁର୍ନୀତିରେ ସମ୍ପୃକ୍ତ ୧୧ ଜଣଙ୍କୁ ଗିରଫ କରାଯାଇଥିବା ବେଳେ ଇଡି ୪ଟି ଚାର୍ଜଶିଟ୍ ଦାଖଲ କରିଛି।