ଯାଜପୁର,୧୭ା୩(ହର୍ଷବର୍ଦ୍ଧନ ବେହେରା)ରାଜ୍ୟରେ ବିଧାନସଭା ଓ ଲୋକ ସଭା ପାଇଁ ନିର୍ବାଚନ ବିଗୁଲ ବାଜିସାରିଛି। ହେଲେ ଯାଜପୁର ଜିଲାରେ ମତଦାନ କ୍ଷେତ୍ରରେ ସେତେଟା ଉତ୍ସାହ ନ ଥିବା ମନେହେଉଛି। ୨୦୨୪ରେ ଜିଲାର ୭ ବିଧାନସଭା ନିର୍ବାଚନ ମଣ୍ଡଳୀରେ ୧୫ ଲକ୍ଷ ୩୦ ହଜାର ୨୪୦ ଜଣ ଭୋଟରଙ୍କ ତାଲିକା ଚୂଡ଼ାନ୍ତ ହୋଇଛି। ଏଥିରେ ୭ ଲକ୍ଷ ୮୮ ହଜାର ୧୬୦ ଜଣ ପୁରୁଷ, ୭ ଲକ୍ଷ ୪୨ ହଜାର ୧୩ ଜଣ ମହିଳା ଓ ୬୭ ଜଣ ଅନ୍ୟାନ୍ୟ ଭୋଟର ରହିଛନ୍ତି। ତେବେ ୨୭ା୧୦ା୨୦୨୩ରୁ ୨୭ା୧୨ା୨୦୨୩ ମଧ୍ୟରେ ହୋଇଥିବା ସଂଶୋଧନ ଅନୁସାରେ ୩୯,୬୬୨ ଭୋଟର ମିଶିଥିବାବେଳେ ୩୯,୯୮୯ ଭୋଟରଙ୍କୁ ବାଦ୍ ଦିଆଯାଇଛି। ଏଠାରେ ପୂର୍ବ ନିର୍ବାଚନଗୁଡିକୁ ଅବଲୋକନ କଲେ ମତଦାନ ହାର ସେତେଟା ସନ୍ତୋଷଜନକ ନୁହେଁ। ଜିଲା ପ୍ରଶାସନ ପକ୍ଷରୁ ଭୋଟରମାନଙ୍କୁ ସଚେତନ କରିବାକୁ ଯେଉଁ ପ୍ରକାର କାର୍ଯ୍ୟକ୍ରମଗୁଡ଼ିକ ହାତକୁ ନେବା କଥା ତାହା ବିଫଳ ହୋଇଛି। ଯୁବ ଭୋଟରମାନଙ୍କ ନାମ ଭୋଟର ତାଲିକାରେ ପଞ୍ଜୀକରଣ, ନିଶ୍ଚିତ ମତଦାନ ଓ ସୁଦୃଢ଼ ଗଣତନ୍ତ୍ର ପାଇଁ ଆଲୋଚନା ଇତ୍ୟାଦି ହେଉନାହିଁ। ଏହାର ଉଦାହରଣ ଭାବେ ବ୍ୟାସନଗର ପୌରାଞ୍ଚଳକୁ ନିଆଯାଇପାରେ। ଏଠାରେ ବେସରକାରୀ ଭାବେ ଲୋକସଂଖ୍ୟା ପ୍ରାୟ ୧ ଲକ୍ଷରୁ ଊର୍ଦ୍ଧ୍ୱ ହୋଇଥିବାବେଳେ ପ୍ରାୟ ୩୭ ହଜାର ଭୋଟର ଅଛନ୍ତି। ତେଣୁ ଗୋଷ୍ଠୀ ଆଲୋଚନା, ବିଭିନ୍ନ ବୈଠକ ବା ସଭା ସମିତି ମାଧ୍ୟମରେ, ବ୍ଲୁବଟନ ଏକ୍ସପ୍ରେସ ଓ ଭୋଟର ସଚେତନତା ରଥ, ଗଣମାଧ୍ୟମ, ସାମାଜିକ ଗଣମାଧ୍ୟମ, ଶୋଭାଯାତ୍ରା ଇତ୍ୟାଦି ମାଧ୍ୟମରେ ଭୋଟରମାନଙ୍କୁ ସଚେତନ କରିବାର ପ୍ରାବଧାନ ଥିବାବେଳେ ଜିଲା ପ୍ରଶାସନ ଆଦୌ ଗୁରୁତ୍ୱ ଦେଉନାହିଁ।
ଯାଜପୁର ଲୋକ ସଭା ଆସନ
୨୦୧୯ ଯାଜପୁର ଲୋକ ସଭା ଆସନରେ ମତଦାନ ହାର ୭୩.୭୬ ପ୍ରତିଶତ ରହିଥିଲା। ଏହି ଲୋକ ସଭା ଆସନ ଅନ୍ତର୍ଗତ ସୁକିନ୍ଦା ବିଧାନସଭା ଆସନରେ ସର୍ବାଧିକ ୭୯.୬୧ ପ୍ରତିଶତ ଏବଂ ବିଞ୍ଝାରପୁରରେ ସର୍ବନିମ୍ନ ୬୭ ପ୍ରତିଶତ ମତଦାନ ହୋଇଥିଲା। ସେହିପରି ବରୀରେ ୭୦.୫୯%, ବଡଚଣାରେ ୭୪.୭୦%, ଧର୍ମଶାଳାରେ ୭୭.୧୬%, ଯାଜପୁରରେ ୭୨.୩୬%, କୋରେଇରେ ୭୫.୫୧% ମତଦାନ ହୋଇଥିଲା। ଲୋକ ସଭା ଆସନର ମୋଟ ୧୪ ଲକ୍ଷ ୭୨ ହଜାର ୬୧୬ ମତଦାତାଙ୍କ ମଧ୍ୟରୁ ୧୦,୮୬,୧୫୫ ଜଣ ସେମାନଙ୍କ ମତାଧିକାର ସାବ୍ୟସ୍ତ କରିଥିଲେ। ତେବେ ମହିଳା ଭୋଟ ୭୫.୯୪% ହୋଇଥିବାବେଳେ ପୁରୁଷ ଭୋଟ ୭୨.୫୮% ଥିଲା। ଏଥିରେ ଯାଜପୁର ଜିଲାରେ ମତଦାନରେ ମହିଳାଙ୍କ ଆଗ୍ରହ ଗଣତନ୍ତ୍ର ପାଇଁ ଶୁଭଙ୍କର ବୋଲି କୁହାଯାଉଛି। ଅନ୍ୟପକ୍ଷେ ସୁକିନ୍ଦା ନିର୍ବାଚନ ମଣ୍ଡଳୀରେ ଖଣି ତଥା ଶିଳ୍ପ ଶ୍ରମିକମାନେ ଗଣତାନ୍ତ୍ରିକ ଅଧିକାର ପ୍ରତି ସର୍ବାଧିକ ସଚେତନତା ଦେଖାଇଥିଲେ। ଯାଜପୁର ଜିଲାର କୋରେଇ ଓ ଯାଜପୁର ନିର୍ବାଚନ ମଣ୍ଡଳୀରେ ଦୁଇ ପ୍ରମୁଖ ସହର ରହିଛି। ଗତ ୩ ସାଧାରଣ ନିର୍ବାଚନକୁ ଅବଲୋକନ କଲେ ଏଠାରେ ଭୋଟରଙ୍କ ମଧ୍ୟରେ ମତଦାନକୁ ନେଇ ଅରୁଚି ରହିଥିବା ଦେଖିବାକୁ ମିଳିଛି। ସହରାଞ୍ଚଳରେ ବସବାସ କରୁଥିବା ନାଗରିକମାନେ ଅଧିକ ସଚେତନ ବୋଲି ବିବେଚନା କରାଯାଇଥାଏ ା ହେଲେ ଭୋଟ ଗ୍ରହଣରେ ମତଦାନ ହାର ସଚେତନତାର ଏହି ଦାବିକୁ ଭୁଲ୍ ପ୍ରମାଣିତ କରି ଆସିଛି ା ଅନ୍ୟପକ୍ଷେ ଆଦିବାସୀ ବହୁଳ ସୁକିନ୍ଦା ନିର୍ବାଚନମଣ୍ଡଳୀରେ ଗତ ୩ ଥରରେ ସର୍ବାଧିକ ମତଦାନ ହୋଇଆସିଛି। ଚଳିତ ନିର୍ବାଚନରେ ଶତପ୍ରତିଶତ ମତଦାନ ଲକ୍ଷ୍ୟରଖି ପ୍ରଶାସନ ପକ୍ଷରୁ ସେଭଳି କୌଣସି ଆଖିଦୃଶିଆ କାର୍ଯ୍ୟକ୍ରମ ଏଯାଏ ହୋଇ ପାରିନାହିଁ। କୋରେଇ ଓ ଯାଜପୁର ବିଧାନସଭା ନିର୍ବାଚନ ମଣ୍ଡଳୀରେ ଏହାର ପ୍ରଭାବ ପଡିବା ନେଇ ଆଶଙ୍କା ପ୍ରକାଶ ପାଇଛି। ପ୍ରଶାସନିକ, ବ୍ୟବସାୟିକ ଓ ସାମାଜିକ ଦୃଷ୍ଟିରୁ ବ୍ୟାସନଗର ସହର କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା ଭାବେ ପରିଚିତ। ଏହାବାଦ୍ ଯାଜପୁର ସହର ଜିଲା ସଦର ମହକୁମା ସହିତ ବିରଜାକ୍ଷେତ୍ର ଭାବେ ପରିଚିତ। କୋରେଇ ନିର୍ବାଚନ ମଣ୍ଡଳୀରେ ବ୍ୟାସନଗର ସହର ରହିଛି, ଯାହାର ଲୋକସଂଖ୍ୟା ପ୍ରାୟ ଦେଢ ଲକ୍ଷ ଟପିଲାଣି। କିନ୍ତୁ ଭୋଟର ସଂଖ୍ୟା ବଢ଼ିପାରୁନାହିଁ। କେଉଁ କାରଣରୁ ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଉନାହିଁ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।