ଭୁବନେଶ୍ୱର,୧୦ା୭(ବ୍ୟୁରୋ): ଆଉ ୨ଦିନ ପରେ ରଥଯାତ୍ରା। ମହାପ୍ରଭୁ ଶ୍ରୀଜଗନ୍ନାଥଙ୍କୁ ନିଜ ଭକ୍ତିଭାବ ସମର୍ପଣ କରି ଶିଳ୍ପୀ ଏଲ୍. ଈଶ୍ୱର ରାଓ ଦିଆସିଲି କାଠିରେ ରଥ ଓ ନିମ୍ବ କାଠରେ ଚତୁର୍ଦ୍ଧାମୂର୍ତ୍ତି ପ୍ରସ୍ତୁତ କରିଛନ୍ତି। ଏହି ତିନି ରଥ ନିର୍ମାଣରେ ସେ ମୋଟ୍ ୪୩୫ଟି ଦିଆସିଲି କାଠି ବ୍ୟବହାର କରିଛନ୍ତି। ୪.୫ ଇଞ୍ଚ ଉଚ୍ଚତା ବିଶିଷ୍ଟ ଏହି ରଥରେ ବସିଥିବା ତିନିଦିଅଁଙ୍କ ମୂର୍ତ୍ତି ନିମ୍ବ କାଠରେ ନିର୍ମିତ ହୋଇଛିି। ଶ୍ରୀଜଗନ୍ନାଥ, ବଳଭଦ୍ର ଓ ସୁଭାଦ୍ରାଙ୍କ ମୂର୍ତ୍ତିଗୁଡ଼ିକର ଉଚ୍ଚତା ୧ ଇଞ୍ଚ ରହିଛି। ଶ୍ରୀକ୍ଷେତ୍ରର ରଥଯାତ୍ରା ପାଇଁ ନିର୍ମାଣ ହେଉଥିବା ରଥ ସଦୃଶ ଏହି ରଥ ପ୍ରସ୍ତୁତ କରାଯାଇଛି। ଅନୁରୂପ ଭାବେ ରଙ୍ଗ ମଧ୍ୟ କରାଯାଇଛି ଯାହାକି ଦର୍ଶକଙ୍କୁ ଆକୃଷ୍ଟ କରୁଛି। ତିନି ରଥ ଓ ଚତୁର୍ଦ୍ଧାମୂର୍ତ୍ତି ନିର୍ମାଣ ପାଇଁ ତାଙ୍କୁ ୯ ଦିନ ସମୟ ଲାଗିଥିଲା। ଏହାପୂର୍ବରୁ ଈଶ୍ୱର ୩ହଜାରରୁ ଊର୍ଦ୍ଧ୍ୱ ବହୁ ଛୋଟ ଛୋଟ କଳାକୃତିକୁ ବୋତଲ ଭିତରେ ପ୍ରସ୍ତୁତ କରିଛନ୍ତି। ଏଭଳି ନିଆରା କଳାକୃତିକୁ ନେଇ ସେ ଏକ ଛୋଟ ସଂଗ୍ରହାଳୟ ମଧ୍ୟ କରିଛନ୍ତି। ଯାହାର ନାମ ‘ୱାର୍ଲଡ ୱାଣ୍ଡର ମ୍ୟୁଜିୟମ୍’ ରଖାଯାଇଛି। ବିଭିନ୍ନ ପର୍ବପର୍ବାଣିରେ ସେ ଏପରି ସ୍ବତନ୍ତ୍ର କଳାକୃତି ପ୍ରଦର୍ଶନ କରି ଚର୍ଚ୍ଚାକୁ ଆସିଥାନ୍ତି। ଚଳିତବର୍ଷ ମହାଶିବରାତ୍ରି ଉପଲକ୍ଷେ ଏକ ଛୋଟ କାଚ ବୋତଲ ଭିତରେ ସେ ଏକ ପୂର୍ଣ୍ଣ ଶୈବପୀଠ ନିର୍ମାଣ କରିଥିଲେ। ଯେଉଁଥିରେ ଶିବଲିଙ୍ଗଠାରୁ ଆରମ୍ଭ କରି ନାଗ ସାପ, ବୃଷଭ ଆଦି ରହିଥିଲା। ଏହି ରଥ ନିର୍ମାଣ କରିବା ସହ ବିଶ୍ୱବାସୀଙ୍କୁ କରୋନା ମହାମାରୀରୁ ରକ୍ଷା କରିବା ପାଇଁ ମହାପ୍ରଭୁଙ୍କ ନିକଟରେ ଈଶ୍ୱର ପ୍ରାର୍ଥନା କରିଛନ୍ତି।