ସୋନପୁର,୧।୩(ନି.ପ୍ର.): ଆକ୍ସନ ମୁଡରେ ଏବେ ସୁବର୍ଣ୍ଣପୁର ଜିଲା ଅବକାରୀ ବିଭାଗ। ମଙ୍ଗଳବାର ଅବକାରୀ ବିଭାଗର ଜିଲା ମୋବାଇଲ ଟିମ୍ ସୋନପୁର ଥାନା ହରଡଖୋଲ ନିକଟରେ ଚଢାଉ କରି କାରରେ ଗଞ୍ଜେଇ ଚୋରାଚାଲାଣ କରୁଥିବା ଆକାଶ ସାହୁ(୨୦)ଙ୍କୁ ଗିରଫ କରିଛି। ଆକାଶଙ୍କ କାରରୁ ୧୫କିଲୋ ଗଞ୍ଜେଇ ଜବତ କରାଯାଇଛି। ଆକାଶଙ୍କ ଘର ବୌଦ୍ଧ ଜିଲା ମନମୁଣ୍ଡା ଥାନା ଅଞ୍ଚଳରେ। ସେ କୁଣ୍ଡମାଳରୁ ହରଡଖୋଲକୁ ଗଞ୍ଜେଇ ବିକ୍ରି କରିବାକୁ ଆସିଥିଲେ। ଅବକାରୀ ବିଭାଗ ଗଞ୍ଜେଇ ଚୋରା ଚାଲାଣରେ ବ୍ୟବହୃତ ସୁଇଫ୍ଟ ଡିଜାୟାର କାର ଓଡି୧୫ଯୁ-୫୬୪୧କୁ ଜବତ କରିଛି । ଏହି ଘଟଣାରେ ଆକାଶଙ୍କୁ କୋର୍ଟଚାଲାଣ କରାଯାଇଛି। ଅଭିଯୁକ୍ତ ଜଣେ କଲେଜ ଛାତ୍ର ବୋଲି ଜଣାପଡିଛି। ଅବକାରୀ ଅଧିକ୍ଷକ ସୁମତି ତ୍ରିପାଠୀଙ୍କ ତତ୍ତ୍ୱାବଧାନରେ ଇନ୍ସପେକ୍ଟର ପ୍ରକାଶ କୁମାର ସା, ସବ୍ ଇନ୍ସପେକ୍ଟର ବଲବୀର ଗଡନାୟକ ଓ ମୋବାଇଲ ଟିମ୍ର କର୍ମଚାରୀ ଏହି ଚଢାଉରେ ସାମିଲ ଥିଲେ।
ଗତ ୨୩ ତାରିଖରେ ବିଭାଗ ପକ୍ଷରୁ ବ୍ଲକ ଛକରେ ପାଟ୍ରୋଲିଂ ସମୟରେ ବେସରକାରୀ ଆମ୍ବୁଲାନ୍ସରେ ଗଞ୍ଜେଇ ଚୋରାଚାଲାଣକୁ ଧରିଥିଲା। ଛତିଶଗଡକୁ ଚୋରାଚାଲଣ ହେଉଥିବା ୪କୁଇଣ୍ଟାଲ ୨୦କିଲୋ ଗଞ୍ଜେଇ ଜବତ ହେବା ସହିତ ଛତିଶଗଡର ଗଞ୍ଜେଇ ବ୍ୟବସାୟୀଙ୍କୁ ଗିରଫ କରାଯାଇଥିଲା। ଗତ ୨୫ତାରିଖରେ କନ୍ଧମାଳ ଜିଲା ମୋହନା ଅଞ୍ଚଳରୁ ଏକ କାରରେ ବିହାରକୁ ଗଞ୍ଜେଇ ଚୋରାଚାଲାଣ କରାଯାଉଥିବାବେଳେ ଜିଲା ଅବକାରୀ ବିଭାଗ ହାତରେ ଧରା ପଡିଥିଲା। ଅବକାରୀ ଟିମ୍ ମହିନ୍ଦ୍ରା କେୟୁଭି ୧୦୦ କାର ଓ ୪୦ କିଲୋ ଗଞ୍ଜେଇ ଜବତ କରିଥିଲେ। ଏହି ଘଟଣାରେ ବିହାରର ୨ ଜଣ ଗଞ୍ଜେଇ ବ୍ୟବସାୟୀଙ୍କୁ ଗିରଫ କରାଯାଇଛି। ପୋଲିସ ଗଞ୍ଜେଇ ଚୋରା ଚାଲାଣ ରୋକିବାକୁ ତତ୍ପରତା ପ୍ରକାଶ କରୁ ନ ଥିଲା ବେଳେ ଅବକାରୀ ବିଭାଗ ଗତ ୬ ଦିନ ଭିତରେ କେବଳ ସୋନପୁର ଥାନା ଅଞ୍ଚଳରୁ ୩ଟି କେସରେ ୪ଜଣଙ୍କୁ ଗିରଫ କରିଛି। ଗୋଟିଏ ଆମ୍ବୁଲାନ୍ସ, ୨ଟି କାର ଓ ୪କୁଇଣ୍ଟାଲ ୭୫ଜବତ
ହୋଇଛି। ଅବକାରୀ ବିଭାଗର
ସକ୍ରିୟତା ଗଞ୍ଜେଇ ଚୋରାଚାଲାଣକାରୀଙ୍କୁ ଚିନ୍ତାରେ ପକାଇଛି ।
