ହିଞ୍ଜିଳିକାଟୁ,୧୭।୧୦(ଡି.ଏନ.ଏ.): ଗଞ୍ଜାମ ଜିଲା ହିଞ୍ଜିଳି ଥାନା ମହୁଲପଲୀଠାରେ ଏକ ଡ୍ରେନ ନିର୍ମାଣ ନିମନ୍ତେ ଠିକାଦାରଙ୍କ ୩୦ ସ୍ଲଟର ପ୍ଲେଟ୍ ଚୋରି ଅଭିଯୋଗରେ ପୋଲିସ ୪ ଜଣଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ସେମାନେ ହେଲେ ରତନପୁର ଗାଁର ଶରତ ଦାସ, ସୁବାସ ଦାସ, ଜଗନ୍ନାଥ ଦାସ ଓ ଆଙ୍କୁଶପୁର ଗ୍ରାମର ଗଣେଶ ସାହୁ ।ସୂଚନାଯୋଗ୍ୟ,ମହୁଲପଲୀ ଗାଁର ଠିକାଦାର ଆର କୁଞ୍ଜବିହାରୀ ମହୁଲପଲୀ ଗାଁରେ ଏକ ଡ୍ରେନ ନିର୍ମାଣ ପାଇଁ ସରକାରୀ କାର୍ଯ୍ୟ ଠିକା ନେଇଥିଲେ। ଗତ କିଛି ଦିନ ଧରି ଲଗାଣ ବର୍ଷା ଯୋଗୁ କାର୍ଯ୍ୟ ବନ୍ଦ ରହିଥିଲା। ତେବେ ଠିକାଦାର ଡ୍ରେନ ନିର୍ମାଣ ପାଇଁ ସେଠାରେ ୬୦ ସ୍ଲଟର ପ୍ଲେଟ୍ ରଖିଥିଲେ। ଗତ ୧୩ ତାରିଖରେ ଠିକାଦାରଙ୍କ ୩୦ ସ୍ଲଟର ପ୍ଲେଟ୍ ନ ଥିବା ସହ ୨ ଜଣ ସେହି ସ୍ଥାନରେ ଏକ ବାଇକ୍ରେ ଥିବା ସେ ଦେଖିଥିଲେ। ହେଲେ ଠିକାଦାରଙ୍କୁ ଦେଖି ବାଇକ୍ ଛାଡି ୨ଜଣ ସ୍ଥାନରୁ ଖସି ପଳାଇଥିଲେ। ଏନେଇ ଠିକାଦାର ଥାନାରେ ଅଭିଯୋଗ କରିଥିଲେ। ଏହାପରେ ପୋଲିସ ଅଭିଯୋଗ କ୍ରମେ ନଂ- ୫୫୯/୨୨ରେ ମାମଲା ରୁଜୁ କରି ତଦନ୍ତ କରିଥିଲା। ରବିବାର ଉକ୍ତ ସ୍ଲଟର ପ୍ଲେଟ୍ ଚୋରି ଘଟଣାରେ ରତନପୁର ଗାଁର ୩ ଅଭିଯୁକ୍ତଙ୍କୁ ଓ ପ୍ଲେଟ୍ କିଣିଥିବା ଅଙ୍କୁଶପୁର ଗାଁର ଗଣେଶ ସାହୁଙ୍କୁ ପୋଲିସ ଗିରଫ କରିବା ସହ ଚୋରି ସାମଗ୍ରୀ ଜବତ କରାଯାଇଛି ବୋଲି ଆଇଆଇସି ଅଭିମନ୍ୟୁ ଦାସ କହିଛନ୍ତି।
