ଉଦଳା,୧୭ା୩(ଡି.ଏନ.ଏ.): ମୟୂରଭଞ୍ଜ ଜିଲା ଉଦଳା ଥାନା ପୋଲିସ ୪ ଆନ୍ତଃଜିଲା ଲୁଟେରାଙ୍କୁ ଗିରଫ କରିଛି। ସ୍ଥାନୀୟ ବରବାଡ଼ି କେନାଲ ନିକଟରେ ବିଳମ୍ବିତ ରାତିରେ ଲୁଟ୍ ପାଇଁ ପ୍ରସ୍ତୁତି ଚଳାଇଥିବା ସମୟରେ ପୋଲିସ୍ ଚଢ଼ାଉ କରି ସେମାନଙ୍କୁ ଧରିଥିଲା। ଚଢାଉ ସମୟରେ ଜଣେ ଲୁଟେରା ଖସିଯାଇଥିବା ବେଳେ ୪ ଜଣଙ୍କୁ ପୋଲିସ୍ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଭଦ୍ରକ ଟାଉନ ଥାନା ଅଧୀନ ରାଣ୍ଡେ ଗ୍ରାମର ଚଣା ମୁଣ୍ଡା ଓରଫ୍ ବୁଟୁ(୨୦), ଗବସାହି ଗ୍ରାମର ବାପୁନ ସିଂ(୨୧), ଭଦ୍ରକ ଗ୍ରାମାଞ୍ଚଳ ଥାନା ଶରପୁର ଗ୍ରାମର ରାଜା ମୁଣ୍ଡା(୧୯) ଏବଂ ଭଣ୍ଡାରୀପୋଖରୀ ଥାନା ଖତୁପୁର ଗ୍ରାମର ଚଗୁଲୁ ମୁଣ୍ଡା(୧୯)। ସେମାନେ ଭଦ୍ରକ ସମେତ ମୟୂରଭଞ୍ଜ, ବାଲେଶ୍ୱର ଏବଂ କେନ୍ଦୁଝର ଜିଲାର ବିଭିନ୍ନ ଲୁଟ୍ ଘଟଣାରେ ସମ୍ପୃକ୍ତ ଥିବା ପୋଲିସ୍ ସୂଚନା ଦେଇଛି। କିଛି ଦିନ ପୂର୍ବରୁ ଉଦଳା-କପ୍ତିପଦା ରାସ୍ତାରେ ହୋଇଥିବା ମଦ ଦୋକାନ ଲୁଟ୍ ଘଟଣାରେ ଏହି ଅଭିଯୁକ୍ତମାନେ ସମ୍ପୃକ୍ତ ଥିବାବେଳେ ସେମାନେ କପ୍ତିପଦା, ଖୁଣ୍ଟା ସମେତ ମୟୂରଭଞ୍ଜ ଜିଲାର ବିଭିନ୍ନ ଅଞ୍ଚଳରେ ଲୁଟ୍ କରିଛନ୍ତି। ଲୁଟ୍ ସମୟରେ ସେମାନେ ସାଙ୍ଗରେ ମୁଖା ନେଇ ଆସିଥାନ୍ତି। ବିଳମ୍ବିତ ରାତିରେ କାନ୍ଥ ତାଡି ଲୋକଙ୍କ ଘରେ ପଶି ଲୁଟ୍ କରିବା ପରେ ମୁଖା ପିନ୍ଧି ଘଟଣାସ୍ଥଳରୁ ସହଜରେ ଖସି ଚାଲିଯାଆନ୍ତି। କେବଳ ଘର ଭିତରୁ ଲୁଟ୍ ନୁହେଁ, ବାଇକରେ ଆସି ସୁନାଚେନ୍ ଛିନତାଇ, ଟଙ୍କା ଲୁଟ୍ ଭଳି ବିଭିନ୍ନ ଘଟଣାରେ ଏମାନେ ସମ୍ପୃକ୍ତ ରହିଥିବା ଉପଖଣ୍ଡ ପୋଲିସ୍ ଅଧିକାରୀ ସାର୍ଥକ ରାୟ କହିଛନ୍ତି। ସେମାନଙ୍କଠାରୁ ୩ ବାଇକ୍, ୫ଟି ମୋବାଇଲ୍ ଫୋନ ଜବତ ହୋଇଛି। ଏନେଇ ଥାନାରେ ଏକ ମାମଲା(ନଂ.୭୨/୨୩) ରୁଜୁ ହୋଇଛି।