ହିଞ୍ଜିଳିକାଟୁ,୧୬ା୭(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳିକାଟୁ ବ୍ଲକ ସାରୁ ଓ ସାପୁଆପଲୀ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରୁ ଟିଭି, କମ୍ପ୍ୟୁଟର ଡେସ୍କଟପ୍, ଇନ୍ଭର୍ଟର ଆଦି ଚୋରି ସହ ଗଣ୍ଡଳା ଛକରେ ଗୋଟିଏ ଘରର ତାଲା ଭାଙ୍ଗି ଚୋରି ଅଭିଯୋଗରେ ଶନିବାର ହିଞ୍ଜିଳି ପୋଲିସ ୪ ଜଣଙ୍କୁ ଗିରଫ କରିଛି। ଏହି ସିରିଜ୍ ଚୋରିର ଗିରଫ ଅଭିଯୁକ୍ତମାନେ ହେଲେ ନରେନ୍ଦ୍ରପୁରର ବନ ପ୍ରଧାନ, ଶିକିରିର ସମ୍ପଦ ପ୍ରଧାନ, ହିଞ୍ଜିଳି ବାପୁଜୀ ମାର୍ଗର ଯୋଗୀ ଦାସ ଏବଂ ଶେରଗଡ଼ ଥାନା ଠୁରୁବୁରାଇ ଗାଁର କାହ୍ନୁ ଚରଣ ସାହୁ। ସେମାନଙ୍କ ଠାରୁ ପୋଲିସ ଗୋଟିଏ ଏଲ୍ଇଡି ଟିଭି, ଗୋଟିଏ ଇନ୍ଭର୍ଟର ଓ ୩ ଟି ଇନ୍ଭର୍ଟର ବ୍ୟାଟେରୀ ଜବତ କରିଛି।
ପ୍ରକାଶ ଯେ, ଏପ୍ରିଲ ୨୬ ରାତିରେ ସାରୁ ଓ ସାପୁଆପଲୀ ସ୍ବାସ୍ଥ୍ୟକେନ୍ଦ୍ରରୁ ଟିଭି, କମ୍ପ୍ୟୁଟର ଆଦି ସାମଗ୍ରୀ ଚୋରି ଯାଇଥିବା ବେଲଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ମନୀଷା ପଣ୍ଡା ଥାନାରେ ଅଭିଯୋଗ କରିଥିଲେ। କେସ୍ ନଂ. ୨୧୩/୨୨ରେ ଏକ ମାମଲା ରୁଜୁ କରି ପୋଲିସ ତଦନ୍ତ କରୁଥିଲା। ଅଭିଯୁକ୍ତମାନେ ଉକ୍ତ ରାତିରେ ସ୍ବାସ୍ଥ୍ୟକେନ୍ଦ୍ରରୁ ଚୋରି ସହ ଗଣ୍ଡଳା ଛକରେ ଏକ ଘରର ତାଲା ଭାଙ୍ଗି ଚୋରି କରିଥିଲେ। ଅନ୍ୟପକ୍ଷରେ ହିଞ୍ଜିଳି ଥାନାର ଅନ୍ୟ ୨ଟି ଚୋରି ମାମଲାରେ ମଧ୍ୟ ଅଭିଯୁକ୍ତମାନେ ସଂପୃକ୍ତି ଥିବା ଥାନା ଆଇଆଇସି ଅଭିମନ୍ୟୁ ଦାସ ଏକ ପ୍ରେସ୍ ରିଲିଜରେ ପ୍ରକାଶ କରିଛନ୍ତି। ଅଭିଯୁକ୍ତମାନଙ୍କୁ ଆଜି କୋର୍ଟ ଚାଲାଣ କରାଯାଇଛି।