ହିଞ୍ଜିଳିକାଟୁ,୧ା୩(ଡି.ଏନ୍.ଏ.): ଗଞ୍ଜାମ ଜିଲା ହିଞ୍ଜିଳି ଥାନା ମକରଝୋଳ ଛକଠାରେ ଗତ ଫେବୃୟାରୀ ୨୫ରେ ବାଇକ୍ରେ ଯାଉଥିବା ଜଣେ ମହିଳାଙ୍କ ବେକରୁ ସୁନା ମଙ୍ଗଳସୂତ୍ର ଲୁଟ୍ ଘଟଣାରେ ବୁଧବାର ୪ ଜଣଙ୍କୁ ହିଞ୍ଜିଳି ପୋଲିସ ଗିରଫ କରିଛି। ଗିରଫ ଳୁଟେରାମାନେ ହେଲେ ଆସିକା ଥାନା ପି ନୂଆପଲ୍ଲୀର ପି.ମାଧବ ଓ କୋଦଳାର ପି.ସୁବାସ। ଚୋରି ସୁନାକୁ ଆସିକା ଅଞ୍ଚଳର ୨ଜଣ ସୁନା ବେପାରୀ କିଣିିଥିଲେ। ଚୋରି ସୁନା କିଣିଥିବା ଆସିକାର ୨ ବେପାରୀ ଏ ତାରିଣୀ ଆଚାରୀ ଓ ପ୍ରଶାନ୍ତ କୁମାର ମହାରଣାଙ୍କୁ ମଧ୍ୟ ପୋଲିସ ଗିରଫ କରିବା ସହ ସେମାନଙ୍କ ଠାରୁ ୧୧ ଗ୍ରାମ ତରଳ ସୁନା ପୋଲିସ ଜବତ କରିଛି। ଗିରଫ ୨ ଅଭିଯୁକ୍ତ ଚୋରି ଘଟଣାରେ ବ୍ୟବହାର କରିଥିବା ଗୋଟିଏ ବାଇକ୍କୁ ମଧ୍ୟ ପୋଲିସ ଜବତ କରିଥିବା ଆଇଆଇସି ଅଭିମନ୍ୟୁ ଦାସ କହିଛନ୍ତି।
ପ୍ରକାଶ ଯେ, ଗତ ଫେବୃୟାରୀ ୨୫ରେ ମକରଝୋଳ ଗ୍ରାମର ଦମ୍ପତି ଏନ୍ ଶୁକ୍ର ଓ ଏନ୍ ରତ୍ନମାଳା ବାଇକ୍ରେ ଗାଁରୁ ବାହାରି କଞ୍ଚୁରୁ ଛକ ଯାଉଥିଲେ। ମକରଝୋଳ ଛକରେ ହଠାତ ପଛରୁ ୨ ଜଣ ଆସି ବାଇକ୍ ପଛରେ ବସିଥିବା ରତ୍ନମାଳାଙ୍କ ବେକରୁ ମଙ୍ଗଳସୂତ୍ରକୁ ଝାମ୍ପିଥିଲେ। ରତ୍ନମାଳା ବାଇକ୍ରୁ ଖସି ପଡ଼ି ଆହତ ହୋଇଥିଲେ। ଏହି ସମୟରେ ରତ୍ନମାଳାଙ୍କ ମୋବାଇଲ ଓ ମଙ୍ଗଳସୂତ୍ରର କିଛି ଅଂଶ ଧରି ଲୁଟେରାମାନେ ଘଟଣାସ୍ଥଳରୁ ଏକ ବାଇକରେ ହିଞ୍ଜିଳିକାଟୁ ଦିଗରେ ଚମ୍ପଟ ମାରିଥିଲେ। ଲୁଟ୍ ଶିକାର ଏନ ରତ୍ନମାଳା ହିଞ୍ଜିଳି ଥାନାରେ ଅଭିଯୋଗ କରିଥିଲେ। ଥାନାରେ ନଂ ୧୨୦/୨୩ରେ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିଲା।
