ସୋନପୁର,୬।୮(ନି.ପ୍ର.): ସୋନପୁର ଟାଉନ ପୋଲିସ କୁଞ୍ଜଛକଠାରେ ଚଢାଉ କରି ଆନ୍ତଃରାଜ୍ୟ ଗଞ୍ଜେଇ ବ୍ୟବସାୟୀଙ୍କ ସମେତ ୪ ଜଣଙ୍କୁ ଗିରଫ କରିଛି । ଗିରଫ ଛତିଶଗଡ ଗଞ୍ଜେଇ ବ୍ୟବସାୟୀଙ୍କ ନିକଟରୁ ୨୧ କିଲୋ ୨୦୦ ଗ୍ରାମ ଗଞ୍ଜେଇ ଜବତ ହୋଇଛି। ସେହିପରି ଗଞ୍ଜେଇ ବ୍ୟବସାୟୀଙ୍କ ସୁରକ୍ଷାକାରୀ ବୌଦ୍ଧ ଜିଲା ମନମୁଣ୍ଡା ଅଞ୍ଚଳର ୨ ଯୁବକଙ୍କ ବାଇକ୍ ଡିକିରୁ ପୋଲିସ ଦେଶୀ ପିସ୍ତଲ, ଗୋଟିଏ ଅଫୁଟା ଗୁଳି ଓ ମାଗାଜିନ୍ ଜବତ କରିଛି। ଏହି ଘଟଣାରେ ପୋଲିସ ୨ଟି ବ୍ୟବହୃତ ବାଇକ୍, ୪ଟି ମୋବାଇଲ ଫୋନ ଓ ୨ ହଜାର ଟଙ୍କା ଜବତ କରିଥିବା ଏସ୍ପି ଅମରେଶ କୁମାର ପଣ୍ଡା ଶୁକ୍ରବାର ସୋନପୁର ଥାନା ପରିସରରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ଏସ୍ପିଙ୍କ କହିବା ଅନୁଯାୟୀ, ପୋଲିସ ପାଟ୍ରୋଲିଂ ସମୟରେ ଗୁରୁବାର ବୌଦ୍ଧ ଜିଲା ମନମୁଣ୍ଡା ପଟୁ ୨ଟି ବାଇକ୍ରେ ୪ ଜଣ ବ୍ୟକ୍ତି ସୋନପୁର ଅଭିମୁଖେ ଆସୁଥିଲେ। ହୋଣ୍ଡା ସାଇନ ବାଇକ୍ (ନଂ ସିଜି୧୩ୟୁଏଚ-୨୫୯୭)ରେ ଛତିଶଗଡ ଯୋଶପୁର ଜିଲା କୋଟବା ଗ୍ରାମର ଗାୟତ୍ରୀ ସିଦାର(୨୦) ଓ ଛତିଶଗଡ ରାଜ୍ୟ ରାଏଗଡ ଜିଲା ବଜରଙ୍ଗପଡାର ସୁଶିଲ ସାହୁ(୧୯) ଯାଉଥିଲେ। ଗାୟତ୍ରୀ ଓ ସୁଶିଲଙ୍କୁ ସୁରକ୍ଷା ଦେଇ ହିରୋ ଗ୍ଲାମୋର ବାଇକ୍ (ନଂ ଓଡି୩୧ସି-୫୬୩୯)ରେ ବୌଦ୍ଧ ଜିଲା ମନମୁଣ୍ଡା ଥାନା ମସିଣାପଡାର ଦାମୋଦର ମହାଲିଙ୍ଗ(୩୧) ଓ ବାହାଜୁର ଗ୍ରାମର ଯୋଗେଶ୍ୱର ପଧାନ(୨୨) ଆଗରେ ଯାଉଥିଲେ। ପୋଲିସ ଟିମ୍ର ତନଖି ସମୟରେ ଗାୟତ୍ରୀ ଓ ସୁଶିଲଙ୍କ ନିକଟରୁ ୨ଟି ଜରି ବ୍ୟାଗ୍ରୁ ମୋଟ ୨୧ କିଲୋ ୨୦୦ ଗ୍ରାମ ଗଞ୍ଜେଇ ମିଳିଥିଲା। ଦୁହେଁ ଆନ୍ତଃରାଜ୍ୟ ଗଞ୍ଜେଇ ବ୍ୟବସାୟୀ। ସେମାନେ ଓଡିଶାରୁ ଛତିଶଗଡକୁ ଗଞ୍ଜେଇ ଚୋରା ଚାଲାଣ କରୁଥିବା ଏସ୍ପି ପଣ୍ଡା କହିଛନ୍ତି। ସେହିପରି ଦାମୋଦର ଓ ଯୋଗେଶ୍ୱରଙ୍କ ବାଇକ୍ ଡିକି ତନଖି ସମୟରେ ଏକ ରାଉଣ୍ଡ ଅଫୁଟା ଗୁଳି ଭର୍ତ୍ତି ଥିବା ଗୋଟିଏ ହାତ ତିଆରି ଦେଶୀ ପିସ୍ତଲ ଓ ଗୋଟିଏ ମାଗାଜିନ୍ ମିଳିଥିଲା। ଗଞ୍ଜେଇ ଚୋରାଚାଲାଣକାରୀମାନେ ବିଭିନ୍ନ ପ୍ରକାର ମାରଣାସ୍ତ୍ର ଓ ବନ୍ଧୁକ ବ୍ୟବହାର କରୁଛନ୍ତି। ତେଣୁ ଗଞ୍ଜେଇ ଚୋରା ଚାଲାଣ ରୋକିବାକୁ ଚଢାଉ ସମୟରେ ପୋଲିସ ସତର୍କତା ଅବଲମ୍ବନ କରିବାକୁ ଏସ୍ପି ପଣ୍ଡା ଜିଲାର ସମସ୍ତ ଥାନା ଅଧିକାରୀଙ୍କୁ ଏହି ଅବସରରେ ପରାମର୍ଶ ଦେଇଥିଲେ। ଏସଆଇ ପିୟୁଷରାଜ ନାୟକଙ୍କ ଅଭିଯୋଗ କ୍ରମେ ସୋନପୁର ଥାନାରେ ୧୬୨/୨୨ ମୂଳେ ଏନଡିପିଏସ ଆକ୍ଟ ଓ ଆର୍ମସ୍ ଆକ୍ଟରେ ଏକ ମାମଲା ରୁଜୁ ହୋଇଛି। ଏସଆଇ ସସ୍ମିତା ଭୁତିଆ ମାମଲାର ତଦନ୍ତ କରୁଛନ୍ତି। ଶୁକ୍ରବାର ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି। ଏହି ଖବରଦାତା ସମ୍ମିଳନୀରେ ସୋନପୁର ଏସଡିପିଓ ପୂୁଷ୍ପାଞ୍ଜଳି ନିଙ୍ଗି ଓ ସୋନପୁର ଆଇଆଇସି କୃଷ୍ଣଚନ୍ଦ୍ର ମେହେର ଉପସ୍ଥିତ ଥିଲେ।