କଳିଙ୍ଗନଗର,୧୬।୭(ଡି.ଏନ୍.ଏ.): ଯାଜପୁର ଜିଲା ସୁକିନ୍ଦା ବ୍ଲକ ସଂସାଇଲୋ ପଞ୍ଚାୟତ ଅଧୀନ ନାକଦେଇ ଗ୍ରାମ। ସେହି ଗ୍ରାମର ୪ ଆଦିବାସୀ ଭାଇଭଉଣୀ ଏବେ ଅପପୁଷ୍ଟିର ଶିକାର ହୋଇଛନ୍ତି। ଚାଲିବାକୁ ସେମାନଙ୍କର ଶକ୍ତି ନାହିଁ। ସାନ ଭାଇ ଓ ଭଉଣୀ ଏବେ ବିଛଣାରୁ ଉଠି ପାରୁନାହାନ୍ତି। ଏପରି ପରିସ୍ଥିତିରେ ସେମାନଙ୍କ ଚିକିତ୍ସା ବ୍ୟବସ୍ଥା ଆଜି ପର୍ଯ୍ୟନ୍ତ ହୋଇନାହିଁ ବୋଲି ଅଭିଯୋଗ ହୋଇଛି।
୭୦ ବର୍ଷ ବୟସ୍କା ବୁଢ଼ୀମା’ଙ୍କ କାନି ତଳେ ଆଶ୍ରା ନେଇଛନ୍ତି ସିଳାଇ ବାନରା(୧୨), ରାମ ବାନରା(୧୦), ଶ୍ୟାମ ବାନରା(୭) ଏବଂ ସାନ ଭଉଣୀ ମାଙ୍ଗି ବାନରା (୫)। ଏହି ପିଲାଙ୍କ ମା’ ରଶ୍ମିତା ବାନରା ନିଜ ପିଲାମାନଙ୍କୁ ଛାଡ଼ି ଅନ୍ୟତ୍ର ବିବାହ କରି ଚାଲିଯାଇଛନ୍ତି। ଏଥିରେ ବ୍ୟତିବ୍ୟସ୍ତ ହୋଇ ବାପା ପ୍ରଧାନ ବାନରା ବି ପିଲାମାନଙ୍କୁ ଛାଡି ଅନ୍ୟତ୍ର କାମଧନ୍ଦା କରି ବାହାରେ ରହୁଛନ୍ତି। ସେଥିପାଇଁ ବୁଢ଼ୀମା’ଙ୍କ ଉପରେ ଏହି ୪ ପିଲାମାନଙ୍କ ବୋଝ ପଡ଼ିଛି। ଏହି ଅନାଥ ପିଲାମାନଙ୍କ ଆଧାର କାର୍ଡ ନ ଥିବାରୁ ସେମାନେ ରାଶନ ସାମଗ୍ରୀରୁ ବଞ୍ଚତ୍ତ ହୋଇଛନ୍ତି। ବୁଢ଼ୀମା’ ପାଉଥିବା ରାଶନ ଓ ଅନ୍ୟ ଘରେ କାମ କରି ଯାହା ଆଣନ୍ତି ସେଥିରେ ୫ ପ୍ରାଣୀ ଚଳନ୍ତି। ହେଲେ ଅଧିକାଂଶ ସମୟରେ ପରିବାରର ସମସ୍ତଙ୍କୁ ଖାଲି ପେଟରେ ଶୋଇବାକୁ ପଡ଼େ। ଆର୍ଥିକ ଅନଟନ ଯୋଗୁ ସେମାନେ ଏବେ ଅପପୁଷ୍ଟି ରୋଗର ଶିକାର ହୋଇଛନ୍ତି। ସେମାନେ ଏବେ ନିଜ ଗୋଡ଼ରେ ଛିଡ଼ା ହେବାକୁ ସକ୍ଷମ ନୁହନ୍ତି। ଏପରିକି ଏହି ପିଲାମାନେ ଅଙ୍ଗନଓ୍ବାଡି ପକ୍ଷରୁ ପ୍ରଦାନ କରାଯାଉଥିବା ଖାଦ୍ୟ ପାଇବାରୁ ବଞ୍ଚତ୍ତ ହୋଇଛନ୍ତି। ଏହି କାରଣରୁ ସାନ ଭାଇ, ଭଉଣୀ ବିଛଣାରୁ ଉଠିପାରୁନାହାନ୍ତି। ତୁରନ୍ତ ସେମାନଙ୍କ ଚିକିତ୍ସା ବ୍ୟବସ୍ଥା କରିବାକୁ ବୁଢ଼ୀମା’ ପ୍ରଶାସନକୁ ଗୁହାରି କରିଛନ୍ତି। ଏ ସଂକ୍ରାନ୍ତରେ ମତାମତ ନେବାକୁ ସୁକିନ୍ଦା ମଣ୍ଡଳ ଉନ୍ନୟନ ଅଧିକାରୀ ବିଶ୍ୱଜତ୍ ଦାସଙ୍କୁ ଯୋଗାଯୋଗ କରାଯାଇଥିଲା। ହେଲେ ସେ ଫୋନ ଉଠାଇ ନ ଥିଲେ।