ବରଗଡ଼ ଅଫିସ୍,୩୦।୧୦: ବରଗଡ଼ ଜିଲା ଭେଡ଼େନ ଥାନା ଅଧୀନ ଜାଣ୍ଡୋଲ(କନ୍ଧପଡ଼ା)ରେ ଏକ ଅଭାବନୀୟ ଘଟଣା ଘଟିଛି । ଗ୍ରାମର ଏକ ବୁଣାକାର ପରିବାରର ୪ ସଦସ୍ୟଙ୍କ ମୃତଦେହ ଘର ଭିତରେ ପଡିଥିବା ରବିବାର ସନ୍ଧ୍ୟାରେ ଦେଖିବାକୁ ମିଳିଛି। ମୃତକମାନେ ହେଲେ ଶେଷଦେବ ମେହେର(୬୫), ସ୍ତ୍ରୀ କ୍ଷୀରେଶ୍ୱରୀ(୪୦), ପୁଅ ଅରବିନ୍ଦ(୩୦) ଏବଂ ଝିଅ ଶିବାନୀ(୨୨)। ତେବେ କେଉଁ ପରିସ୍ଥିତିରେ ସେମାନଙ୍କ ମୃତ୍ୟୁ ହୋଇଛି, ତାହା ଜଣାପଡ଼ି ନାହିଁ ।
ସାଇଣ୍ଟିଫିକ୍ ଟିମ୍ ପହଞ୍ଚି ନ ଥିବା ଯୋଗୁ ମୃତଦେହ ଜବତ ହୋଇପାରି ନାହିଁ । ଅନ୍ୟପକ୍ଷେ ଘର ବାହାରପଟୁ ତାଲା ପଡ଼ିଥିବା ଯୋଗୁ ଘଟଣାକୁ ନେଇ ନାନା କଳ୍ପନାଜଳ୍ପନା ପ୍ରକାଶ ପାଇଛି। ଘଟଣାଟି ଅଞ୍ଚଳବାସୀଙ୍କୁ ସ୍ତବ୍ଧ କରିଦେଇଛି। ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।
ପ୍ରକାଶ ଯେ, ମୃତ ଶେଷଦେବ ସ୍ତ୍ରୀ, ଝିଅ ଏବଂ ପୁଅଙ୍କୁ ନେଇ ତାଙ୍କ ଦୁଇ ମହଲା ଘରେ ରହୁଥିଲେ। ସେମାନେ ବୁଣାକାର ହୋଇଥିବା ବେଳେ ପୁଅ ଅରବିନ୍ଦ ଏକ ସିଲେଇ(ଦର୍ଜି) ଦୋକାନ ଦେଇଥିଲେ। ସନ୍ଧ୍ୟାରେ ଘରୁ ଦୁର୍ଗନ୍ଧ ବାହାରୁଥିବା ସ୍ଥାନୀୟ ଲୋକେ ଜାଣିବାକୁ ପାଇଥିଲେ । ଏପରିକି ୩ରୁ ୪ ଦିନ ହେଲା ଘର ବାହାର ପଟୁ ତାଲା ପଡ଼ିଥିବା ଯୋଗୁ ସ୍ଥାନୀୟ ଲୋକଙ୍କ ମଧ୍ୟରେ ସନ୍ଦେହ ଉପୁଜିଥିଲା। ଏନେଇ ପୋଲିସକୁ ସୂଚନା ଦେଇଥିଲେ।
ସୂଚନା ପାଇ ବରଗଡ଼ ଏସଡିପିଓ ଅମୃତ କୁମାର ପଣ୍ଡା, ଭେଡ଼େନ ଥାନା ଆଇଆଇସି ସଙ୍ଗୀତା ମହାପାତ୍ର, ରୁଷୁଡ଼ା ଫାଣ୍ଡି ଅଧିକାରୀ ଅରୁଣ କୁମାର ବରେଇ ପ୍ରମୁଖ ଘଟଣାସ୍ଥଳରେ ପହଞ୍ଚିଥିଲେ। ତହସିଲଦାରଙ୍କ ଉପସ୍ଥିତିରେ ଘର କବାଟ ଖୋଲାଯାଇଥିଲା। ଉପର ମହଲାରେ ଶେଷଦେବ, କ୍ଷୀରେଶ୍ୱରୀ ଏବଂ ଶିବାନୀଙ୍କ ମୃତଦେହ ପଡ଼ିଥିବାବେଳେ ତଳ ମହଲାରେ ଅରବିନ୍ଦଙ୍କ ମୃତଦେହ ଝୁଲନ୍ତା ଅବସ୍ଥାରେ ଦେଖିବାକୁ ମିଳିଥିଲା।
