ଗୁଣପୁର/ପାରଳାଖେମୁଣ୍ଡି,୧୩ା୫(ଡି.ଏନ୍.ଏ.): ଓଡ଼ିଶା ସୀମାନ୍ତ ଆନ୍ଧ୍ରପ୍ରଦେଶ ପାର୍ବତୀପୁର ମାନ୍ୟମ ଜିଲା କାତ୍ରାଗାଡ଼ା ନିକଟରେ ଶୁକ୍ରବାର ୪ଟି ହାତୀଙ୍କ ମୃତଦେହ ଠାବ ହୋଇଛି। ହାତୀ ମୃତଦେହଗୁଡ଼ିକ ଏକ ବିଦ୍ୟୁତ୍ ଟ୍ରାନ୍ସଫର୍ମର ନିକଟରେ ପଡ଼ି ରହିଛି। ତେଣୁ ବିଦ୍ୟୁତ୍ ଆଘାତରେ ହାତୀ ମୃତ୍ୟୁ ଘଟିଥିବା ସ୍ପଷ୍ଟ ହୋଇଛି। ପଲରେ ଥିବା ଆଉ ଦୁଇଟି ହାତୀ ଜଙ୍ଗଲ ଭିତରକୁ ପଳାଇଥିବା ଆନ୍ଧ୍ର ବନ ବିଭାଗ ପକ୍ଷରୁ କୁହାଯାଇଛି। ଘଟଣାସ୍ଥଳରେ ଆନ୍ଧ୍ର ପୋଲିସ ଓ ବନ ବିଭାଗର ଅଧିକାରୀମାନେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଟ୍ରାନ୍ସଫର୍ମରଟି ଖୋଲାରେ ରହିଛି। ଚାରିପଟେ ତାରବାଡ଼ କିମ୍ବା ପାଚେରି କରାଯାଇନାହିଁ। ଆନ୍ଧ୍ର ସରକାର, ସ୍ଥାନୀୟ ପ୍ରଶାସନ, ବିଦ୍ୟୁତ୍ ବିଭାଗର ଖାମଖିଆଲ ଯୋଗୁ ଏଭଳି ଅଘଟଣ ଘଟିଥିବା ଆଲୋଚନା ହେଉଛି।
ସୂଚନାଯୋଗ୍ୟ, କିଛିମାସ ତଳେ ୬ ଟିକିଆ ହାତୀପଲ ରାୟଗଡ଼ା ଜିଲା ଗୁଣପୁର ଓ ଗଜପତି ଜିଲା ଅଞ୍ଚଳରେ ଥିଲେ। ଏଠାରେ ବ୍ୟାପକ ଫସଲ ନଷ୍ଟ କରିବାରୁ ଲୋକେ ଘଉଡ଼ାଇବାରୁ ହାତୀପଲ ଆନ୍ଧ୍ରମୁହାଁ ହୋଇଥିଲେ। ଗୁରୁବାର ରାତିରେ ଖାଦ୍ୟ ଅନ୍ବେଷଣରେ ଯାଉଥିବା ବେଳେ ଉଚ୍ଚକ୍ଷମତାସମ୍ପନ୍ନ ବିଦ୍ୟୁତ୍ ଟ୍ରାନ୍ସଫର୍ମର ସଂସ୍ପର୍ଶରେ ଆସିଯିବାରୁ ୪ ହାତୀଙ୍କ ଜୀବନ ଯାଇଛି। ସେଥିମଧ୍ୟରେ ୨ଟି ମାଈ ହାତୀ ରହିଥିବା ଜଣାପଡ଼ିଛି l ସ୍ଥାନୀୟ ଲୋକଙ୍କଠାରୁ ଖବରପାଇ ପାର୍ବତୀପୁରମ-ମାନ୍ୟମ୍ ଡିଏଫ୍ଓ ଜିଏପି ପ୍ରସନ୍ନା, ଶ୍ରୀକାକୁଲମ ଡିଏଫ୍ଓ ନିଶା କୁମାରୀ ଏବଂ ବନ ବିଭାଗର ଅନ୍ୟ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ହାତୀ ମୃତଦେହ ଯାଞ୍ଚ କରିଥିଲେ। ପ୍ରାଣୀ ଚିକିତ୍ସକ ତଥା ଜଙ୍ଗଲର ମୁଖ୍ୟ ସଂରକ୍ଷଣକାରୀ, ବିଶାଖାପାଟଣାଙ୍କ ସହାୟତାରେ ବ୍ୟବଚ୍ଛେଦ କରାଯାଇଥିଲା। ଡିଏଫ୍ଓ ପ୍ରସନ୍ନା କହିଛନ୍ତି, ୪ ହାତୀଙ୍କ ମୃତ୍ୟୁ ବନ ବିଭାଗ ପାଇଁ ଏକ ବଡ଼ କ୍ଷତି। ବିଦ୍ୟୁତ୍ ଖୁଣ୍ଟକୁ ଉପାଡ଼ିବା ପାଇଁ
ହାତୀପଲ ଚେଷ୍ଟା କରିବା ବେଳେ ଏହି ଦୁର୍ଘଟଣା ଘଟିଥାଇପାରେ। ତଦନ୍ତ ଓ ବ୍ୟବଚ୍ଛେଦ ରିପୋର୍ଟ ଆସିବା ପରେ ପ୍ରକୃତ ଘଟଣା ଜଣାପଡ଼ିବ ବୋଲି ଜଣାଇଛନ୍ତି।