ଭୁବନେଶ୍ୱର (ବ୍ୟୁରୋ)/ ବାରଙ୍ଗ,୨୫।୩(ଡି.ଏନ୍.ଏ.): ରାଜଧାନୀ ଉପକଣ୍ଠ ଶିଖରଚଣ୍ଡୀ ପାହାଡ଼ରେ ଶୁକ୍ରବାର ସକାଳେ ୪ଟିକିଆ ହାତୀପଲ ଥିବା ଜଣାପଡ଼ିବା ପରେ ଅଞ୍ଚଳରେ ଆତଙ୍କ ଖେଳିଯାଇଥିଲା। ଦିନତମାମ ଏହି ହାତୀପଲ ପାହାଡ଼ ଉପରେ ବେଶ୍ ଉତ୍ପାତ କରିଥିଲେ। ସେଠାରେ ଥିବା କିଛି ଘର ଭଙ୍ଗାରୁଜା କରିବା ସହ ବହୁ ଔଷଧୀୟ ବୃକ୍ଷକୁ ଉପାଡ଼ି ନଷ୍ଟ କରିଦେଇଥିଲେ। ପାହାଡ଼ ପାଦଦେଶରେ ଦାରୁଠେଙ୍ଗ, ପଥରଗାଡିଆ, କିଟ୍, ପଟିଆ ଭଳି ଜନବସତିମାନ ଥିବାରୁ ସମସ୍ତଙ୍କ ମନରେ ହାତୀକୁ ନେଇ ଭୟ ସୃଷ୍ଟି ହୋଇଥିଲା। କାଳେ ହାତୀ ପାହାଡ଼ ଉପରୁ ବାହାରି ଜନବସତିମୁହଁା ହେବେ ସେଥିପାଇଁ ବିପଦର ଆଶଙ୍କା ଦେଖାଦେଇଥିଲା। ଅନ୍ୟପଟେ ଖବରପାଇ ମନ୍ଦିର କମିଟି ସହ ସ୍ଥାନୀୟ ବନ ବିଭାଗ କର୍ମଚାରୀମାନେ ପହଞ୍ଚତ୍ ପ୍ରାଥମିକ ଭାବେ ସାଧାରଣ ଲୋକଙ୍କୁ ପାହାଡ଼ ଉପରକୁ ଛାଡି ନ ଥିଲେ। ଏପରିକି ବନ ବିଭାଗ କର୍ମଚାରୀମାନେ ୪ ହାତୀର ଗତିପଥକୁ ଅନୁଧ୍ୟାନ କରିବା ସହ ଜଗି ରହିଥିଲେ। ତେବେ ଗୁରୁବାର ରାତିରେ ଭରତପୁର ଜଙ୍ଗଲରୁ ଏହି ୪ ହାତୀ ଆସିଥିବା ବନ ବିଭାଗ ପକ୍ଷରୁ ଅନୁମାନ କରାଯାଉଛି। ସେମାନଙ୍କ ମଧ୍ୟରେ ଗୋଟିଏ ଦନ୍ତା ହାତୀ ସହ ୨ଟି ମାଈ ହାତୀ ଓ ଗୋଟିଏ ଛୁଆ ହାତୀ ରହିଛି। ସେମାନଙ୍କୁ ଜଙ୍ଗଲକୁ ଫେରାଇନେବାକୁ ବନ ବିଭାଗ ଉଦ୍ୟମ ଆରମ୍ଭ କରିଛି। ଏ ନେଇ ଭୁବନେଶ୍ୱର ବନ୍ୟପ୍ରାଣୀ ବନାଞ୍ଚଳର ରେଞ୍ଜର ବାଉରିବନ୍ଧୁ ମହାପାତ୍ର କହିଛନ୍ତି, ଶିଖରଚଣ୍ଡୀ ପାହାଡ଼ରେ ହାତୀ ଥିବା ଜଣାପଡ଼ିବା ପରେ ସକାଳୁ ଆମ କର୍ମଚାରୀ ହାତୀକୁ ଜଗିଛନ୍ତି। ସେମାନେ ରାତି ହେଲେ ଚାଲିବା ଆରମ୍ଭ କରନ୍ତି। ତେବେ ରାତି ୯ଟା ସୁଦ୍ଧା ହାତୀମାନେ ଯାଇନାହାନ୍ତି। ଅଳ୍ପ ବାଟ ତଳକୁ ଖସିଛନ୍ତି। କିନ୍ତୁ ଜନସାଧାରଣଙ୍କ ଗହଳି ଯୋଗୁ ବିଳମ୍ବ ହେଉଛି। ହାତୀ ଯିବା ପରେ ଜାଣିପାରିବୁ ଯେ ସେ କେଉଁଠୁ ଆସିଥିଲେ।