ଅମରପାଲି,୨୯ା୭(ପୀତାମ୍ବର ସାହୁ): ଲଗାଣବର୍ଷା ଯୋଗୁ ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଭୁତିଆପାଲି ଓ ଲୁତୁରପଙ୍କ ମଝିରେ ଥିବା ଘୁଙ୍ଗିନାଳ ପୋଲ ଉପରେ ଚଳିତବର୍ଷର ପ୍ରଥମ ବନ୍ୟାଜଳ ପ୍ରବାହିତ ହୋଇଛି। ଉକ୍ତ ପୋଲ ଉପରେ ପ୍ରାୟ ୪ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ଫଳରେ ବୀରମହାରାଜପୁରରୁ ଅମରପାଲିକୁ ଯୋଗାଯୋଗ ବିଚ୍ଛିନ୍ନ ହୋଇପଡିଛି ା ଗୁରୁବାର ରାତିରେ ହୋଇଥିବା ବର୍ଷା ଯୋଗୁ ଶୁକ୍ରବାର ସକାଳୁ ଏଭଳି ପରିସ୍ଥିତି ସୃଷ୍ଟି ହୋଇଛି ା ଫଳରେ ଉଭୟ ପାଶର୍ବରେ ଗାଡ଼ିମୋଟର ଅଟକି ରହିଛି। ଏହି ପୋଲ କମ୍ ଉଚ୍ଚତା ହୋଇଥିବାରୁ ଏହା ଉପରେ ବନ୍ୟାଜଳ ପ୍ରବାହିତ ହେଉଛି। ଏଥିଯୋଗୁ ବୀରମହାରାଜପୁରରୁ ବହଳପଦର, ଦୁର୍ଜନତୈଲା ଓ ଲୁତୁରପଙ୍କ ପଞ୍ଚାୟତର ପ୍ରାୟ ୫୦ରୁ ଊଦ୍ଧର୍ବ ଗ୍ରାମ ସମେତ ଖଣ୍ଡହତା ପଞ୍ଚାୟତର କେତେକ ଗ୍ରାମ, ରେଢ଼ାଖୋଲ ବ୍ଲକ ଅନ୍ତର୍ଗତ ରେଙ୍ଗାଲି, ବଡମାଳ, ଭାଲିଆକଟା, ଗରଗଡବାହାଲ ଆଦି ପଞ୍ଚାୟତର ଲୋକେ ନାହିଁ ନ ଥିବା ହଇରାଣ ହୋଇଛନ୍ତି। ବୀରମହାରାଜପୁରରୁ ଯୁଯୁମୁରା-ସମ୍ବଲପୁର, ଚାରମାଲ-ରେଢ଼ାଖୋଲକୁ ମଧ୍ୟ ଯାତାୟାତ ବାଧାପ୍ରାପ୍ତ ହୋଇଛି। ସ୍କୁଲ କଲେଜକୁ ଆସୁଥିବା ଛାତ୍ରୀଛାତ୍ର, ଶିକ୍ଷକମାନେ ମଧ୍ୟ ହଇରାଣ ହେଉଥିବା ଦେଖିବାକୁ ମିଳିଛି। ଉକ୍ତ ପୋଲ ଉପରେ ବନ୍ୟାଜଳ ପ୍ରବାହିତ ହେଉଥିବାରୁ ସକାଳୁ ମୁର୍ଷୁଣ୍ଢିରୁ ଯୁଝୁମୁରା ଦେଇ ସମ୍ବଲପୁର ଯାଉଥିବା ବସ୍, ସୋନପୁରରୁ ବୀରମହାରାଜପୁର-ଅମରପାଲି ଦେଇ ରେଢ଼ାଖୋଲ ଯାଉଥିବା ବସ୍, ରେଢାଖୋଲ-ଚାରମାଲ ଦେଇ ବୀରମହାରାଜପୁର-ସୋନପୁରକୁ ଯାଉଥିବା ବସ୍, ସମ୍ବଲପୁରରୁ ମୋଚିବାହାଲ-ବଡମାଳ ଦେଇ ମୁର୍ଷୁଣ୍ଢି ଆସୁ ଥିବା ବସ୍ ଚଳାଚଳ ବନ୍ଦ ରହିଥିଲା। ଏହାସହ କୌଣସି ଗୋଟିଏ ବି ଚାରିଚକିଆ ଗାଡି ସହିତ ବାଇକ୍ ମଧ୍ୟ ଯାଇପାରି ନ ଥିଲା। ବୀରମହାରାଜପୁର କଲେଜ, ମହିଳା କଲେଜ, ଭୁତିଆପାଲି କଲେଜ, ରଥପୁର ଓଡ଼ିଶା ଆଦର୍ଶ ବିଦ୍ୟାଳୟକୁ ବହଳପଦର, ଲୁତୁରପଙ୍କ, ଦୁର୍ଜନତୈଲା ଅଞ୍ଚଳରୁ ଛାତ୍ରୀଛାତ୍ରମାନେ ପାଠ ପଢିବାକୁ ଯାଇପାରି ନ ଥିବା ଜଣାଯାଇଛି ା ଆମ୍ବୁଲାନ୍ସ ମଧ୍ୟ ଉକ୍ତ ପୋଲ ଦେଇ ଯାଇପାରିନାହିଁ। ପ୍ରାୟ ୩ ବର୍ଷ ପୂର୍ବରୁ ପୂର୍ତ୍ତ ବିଭାଗ ତରଫରୁ ଉକ୍ତ ପୋଲ କାମ କରିବା ପାଇଁ ଟଙ୍କା ମଞ୍ଜୁର ହୋଇ ଟେଣ୍ଡର ସରିଥିଲା। ଠିକା ସଂସ୍ଥା ଉକ୍ତ ପୋଲ କାମ ଆରମ୍ଭ କରିଥିଲେ ମଧ୍ୟ ଜମି ବିବାଦ ଯୋଗୁ ଅଧାରେ କାମ ଛାଡି ଫେରାର ହୋଇଛି। ଏପଟେ ପୂର୍ତ୍ତ ବିଭାଗ କୌଣସ ପଦକ୍ଷେପ ନେଉନାହିଁ। ତେଣୁ ସାମାନ୍ୟ ବର୍ଷା ହେଲେ ଉକ୍ତ ପୋଲ ଉପରେ ବନ୍ୟାଜଳ ପ୍ରବାହିତ ହୋଇଥାଏ। ତେଣୁ ଅଞ୍ଚଳବାସୀ ହଇରାଣ ହୋଇଥାନ୍ତି। ସେହିପରି ବର୍ଷା ଯୋଗୁ ଉକ୍ତ ଘୁଙ୍ଗିନାଳର ଲୁତୁରପଙ୍କ -ଘଣ୍ଟପାଲି ମଝିରେ ଥିବା ଅନ୍ୟ ଏକ ପୋଲ ଉପରେ ମଧ୍ୟ ୪ ଫୁଟର ବନ୍ୟାଜଳ ପ୍ରବାହିତ ହୋଇଛି l ସା ବେଳେ ପୋଲ ଉପରୁ ବନ୍ୟାଜଳ କମିଥିବା ଜଣାପଡ଼ିଛି l