ଝରିଗାଁ,୧୫।୬(କିଶୋର ଚନ୍ଦ୍ର ମଣ୍ଡଳ): କଳାହାଣ୍ଡି ଜିଲାରୁ ନବରଙ୍ଗପୁର ଜିଲାକୁ କଇଁଛ ଚୋରା ଚାଲାଣ ବେଳେ ଝରିଗାଁ ବନ ବିଭାଗ ଦ୍ୱାରା ୧୭୬ କଇଁଛ ଉଦ୍ଧାର ହୋଇଛି। ଏଥିରେ ୪ଜଣ ଯୁବକଙ୍କୁ ଗିରଫ କରିବା ସହ ଦୁଇଟି ମୋଟର ସାଇକେଲ ଜବତ ହୋଇଛି। ସୂଚନା ଅନୁସାରେ, କଳାହାଣ୍ଡି ସୀମାନ୍ତରେ ରହିଥିବା ଝରିଗାଁ ବନବିଭାଗର କଂଗ୍ରା ଫରେଷ୍ଟ ଅଞ୍ଚଳ ରହିଥିବା ବେଳେ ଉକ୍ତ ଅଞ୍ଚଳରେ ଜଙ୍ଗଲ ମାଫିଆ ସହ କଇଁଛ ଚୋରା ଚାଲାଣକାରୀମାନଙ୍କ ଗତିବିଧିକୁ ଦୃଷ୍ଟିରେ ରହି ସ୍ଥାନୀୟ ରେଞ୍ଜର ଗୋବିନ୍ଦ ଚନ୍ଦ୍ର ନାୟକଙ୍କ ନେତୃତ୍ୱରେ ଫରେଷ୍ଟର ଗୁପ୍ତ ପ୍ରସାଦ ମହାନ୍ତି, ଦୁଇ ଫରେଷ୍ଟ ଗାର୍ଡ ଏମ,. ବାବାଜୀ ରାଓ ଏବଂ ରମାକାନ୍ତ ସାହୁ ରାତିରେ ପେଟ୍ରୋଲିଂ ଚାଲିଥିବା ବେଳେ ରାତି ପ୍ରାୟ ୮ଟା ୩୦ରେ ଦୁଇଟି ମୋଟର ସାଇକେଲ (ସିଜି ୦୪ ଡି ପି ୬୨୪୧ ଓ ଓଡ଼ି ୦୮ଆର ୩୨୬୫) ଯୋଗେ ଚାରି ଜଣ ଯୁବକ ବସ୍ତାରେ ବନ୍ଧା ହୋଇ କିଛି ଧରି ଯାଉଥିବା ଦେଖି ସେମାନଙ୍କୁ ଅଟକାଇ ଥିଲେ l ଯାଞ୍ଚ ବେଳେ ସେମାନଙ୍କ ଠାରୁ ୧୭୬ଟି ଜୀବନ୍ତ କଇଁଛ ଉଦ୍ଧାର କରିଥିଲେ l ଖବର ପାଇ ରେଞ୍ଜର ଶ୍ରୀ ନାୟକ, ୱାଇଲ୍ଡ ଲାଇଫ ଟିମ, ପାରା ଷ୍ଟାଫ ଘଟଣା ସ୍ଥଳେ ପହଞ୍ଚି ତଦନ୍ତ କରି ସଙ୍ଗରେ ସମସ୍ତ କଇଁଛ ସହ ୪ଯୁବକ, ଦୁଇ ବାଇକକୁ ଧରି ଝରିଗାଁ ବନାଞ୍ଚଳ ଅଧିକାରୀଙ୍କ କାର୍ଯ୍ୟାଳୟକୁ ଅଣାଯାଇଥିଲା l
ଏହାପରେ କଇଁଛ ଚୋରା ଚାଲାଣ କରୁଥିବା ଅଭିଯୋଗରେ କେସ ନମ୍ବର ୭୪/୨୦୨୪-୨୫ ଅନୁଯାଇ ୪ ଜଣଙ୍କୁ ଗିରଫ କରି ବନ୍ୟପ୍ରାଣୀ ଆଇନ ଆଧାରରେ କୋର୍ଟ ଚାଲାଣ କରାଯାଇଛି l ଗିରଫ ହୋଇଥିବା ୪ ଜଣ ହେଲେ କଳାହାଣ୍ଡି ଜିଲା ଆମପାଣି ଥାନା ଅନ୍ତର୍ଗତ ଗୋତମୁଣ୍ଡା ଗ୍ରାମର ଦିଗାମ୍ବର ଗୋପାଳ (୨୯) , ସେହିପାରି ଜୟପାଟଣା ଥାନା ଅନ୍ତର୍ଗତ ସର୍ଗିଗୁଡ଼ା ଗ୍ରାମର ତିନି ଜଣ ଯୁବକ ଧରମ ଚାଲାଣ (୪୦), ତ୍ରିଲୋଚନ ଚାଲାଣ (୩୮) ଏବଂ ଗଗେନେଶ୍ୱର ନାୟକ (୩୬) ଅଟନ୍ତି l ସେପଟେ ଏହି ରାକେଟରେ ଚେର କେଉଁ ପର୍ଯ୍ୟନ୍ତ ଲମ୍ବିଛି ସେନେଇ ତଦନ୍ତ ଜାରି ରଖିଥିବା କହିଛନ୍ତି ଝରିଗାଁ ବନ୍ୟପ୍ରାଣୀ ରେଞ୍ଜର ଗୋବିନ୍ଦ ଚନ୍ଦ୍ର ନାୟକ। ତେବେ ଏହି ପ୍ରଜତିର କଇଁଛ ବିଶେଷ କରି ରାଜ୍ୟ ବାହରକୁ ଚାଲାଣ ହୋଇଥାଏ । ତେବେ ଆଇନତଃ ଏହା ଅପରାଧ ଓ ବିରଳ ପ୍ରାଣୀ ଯୋଗୁଁ ଏହାକୁ ବଞ୍ଜାଇ ରଖିବା ଆଇନରେ ରହିଛି । ଏହାକୁ କିଛି ଲୋକ ଲୁଚାଛପାରେ ଖାଇଥାନ୍ତି ।