କେନ୍ଦୁଝର,୭ା୧୦(ନରେଶ ଚନ୍ଦ୍ର ପଟ୍ଟନାୟକ): ଘଟଗାଁ ରେଞ୍ଜ ଢେଙ୍କିକୋଟ ସେକ୍ସନ କାଳିମାଟି ଡ୍ୟାମ୍ ନିକଟ ବାରବାଙ୍କ ଜଙ୍ଗଲରେ ବାଘ ଆକ୍ରମଣରେ ୪ଟି ଛେଳିଙ୍କ ଜୀବନ ଯାଇଛି।
ପ୍ରକାଶ ଯେ, ଢେଙ୍କିକୋଟ ଅଞ୍ଚଳର ବାସନ୍ତୀ ଓ ଲମ୍ବୋଧର ମୁଣ୍ଡାଙ୍କ ଛେଳି ଧରି ଶୁକ୍ରବାର ଦୁଇ ଜଣ ଜଙ୍ଗଲକୁ ଯାଇଥିଲେ। ବର୍ଷା ହେବାରୁ ସେମାନେ ଛେଳି ଛାଡ଼ି ଦେଇ ପଳାଇ ଆସିଥିଲେ। ଶନିବାର ସକାଳେ ଛେଳି ଖୋଜିବାକୁ ଯାଇଥିବା ବେଳେ କେତେକ ଛେଳିଙ୍କ କ୍ଷତାକ୍ତ ମୃତଦେହ ଦେଖି ଭୟରେ ଫେରି ଆସିଥିଲେ। ଏନେଇ ବନବିଭାଗକୁ ସୂଚନା ଦେବା ପରେ ଘଟଣାସ୍ଥଳରୁ କ୍ଷତବିକ୍ଷତ ୪ଟି ଛେଳି ପାଇଥିଲେ। ଅବଶିଷ୍ଟ ଛେଳିଙ୍କର ପତ୍ତା ମିଳିନାହିଁ। ଜଙ୍ଗଲର ଉକ୍ତ ସ୍ଥାନରେ ବାଘର ପାଦ ଚିହ୍ନ ଦେଖିବାକୁ ମିଳିଥିଲା। ଏଣୁ ବାଘ ଖାଇଥିବା ସନ୍ଦେହ କରି ବନବିଭାଗ ମାଇକ୍ ଜରିଆରେ ଆଖପାଖ ଅଞ୍ଚଳରେ ଲୋକଙ୍କୁ ଜଙ୍ଗଲକୁ ନ ଯିବାକୁ ସଚେତନ କରିଥିଲେ।
ଅଟେଇ ଜଙ୍ଗଲରେ କିଛି ମାସ ତଳେ ମହାବଳ ବାଘ ଥିବା ବନବିଭାଗ ସ୍ପଷ୍ଟ କରି ଏହାର ସୁରକ୍ଷା ପାଇଁ ବ୍ୟାପକ ପଦକ୍ଷେପ ଗ୍ରହଣ କରିଥିଲା। ପାଖାପାଖି ୫୦ଟି ଟ୍ରାପ୍ କ୍ୟାମେରା ଲଗାଇବା ସହ ଜଙ୍ଗଲ ରାସ୍ତାଗୁଡ଼ିକ ସିଲ୍ କରିବା ସହ ବ୍ୟାପକ ସୁରକ୍ଷା ବଳ ନିୟୋଜିତ କରିଥିଲେ। ଜଙ୍ଗଲ ମଧ୍ୟକୁ ଲୋକେ ନ ଯିବା ପାଇଁ ସଚେତନ କରିବା ସହ ଜଙ୍ଗଲ ଉପରେ କାଠ ଓ ପତ୍ର ତୋଳିବା ସହ ଜୀବିକା ନିର୍ଭର ପାଇଁ ବ୍ୟବହାର କରୁଥିବା ଜଙ୍ଗଲ ଲାଗି ଗ୍ରାମରେ ବିକଳ୍ପ ରୋଜଗାରର ବ୍ୟବସ୍ଥା କରାଯାଇଥିଲା। ତେବେ ଉକ୍ତ ବାଘଟି ପୂର୍ବରୁ ଜଙ୍ଗଲକୁ ଚରିବାକୁ ଯାଇଥିବା କେତେକ ଗୋରୁଙ୍କୁ ଆକ୍ରମଣ କରି ମାରି ଦେଇଥିଲା। ଏଣୁ ଉକ୍ତ ବାଘଟି ଦୀର୍ଘ ମାସ ପରେ ଛେଳି ମାରିବା ଘଟଣାକୁ ନେଇ ବନବିଭାଗ ସତର୍କ ହୋଇ ଯାଇଥିବା ବେଳେ କ୍ଷତିଗ୍ରସ୍ତ ଲୋକଙ୍କୁ କ୍ଷତିପୂରଣ ଦେବାକୁ ଦାବି ହେଉଛି।