ପାଟଣା,୧।୧୧(ବୀର କିଶୋର ଦାଶ): ଜୀବନ ବଞ୍ଚାଇବାକୁ ଯାଇ ସୁଦର୍ଶନ ନାୟକ(୫୩) ନାମକ ଜଣେ ବ୍ୟକ୍ତି ୪ ଭାଲୁ ସହ ଘଣ୍ଟାଏ ଧରି ଲଢେଇ କରି ଶେଷରେ ରକ୍ଷା ପାଇଯାଇଛନ୍ତି। ଏଭଳି ଘଟଣା ଘଟିଛି କେନ୍ଦୁଝର ଜିଲା ପାଟଣା ବ୍ଲକ ଡୁମୁରିଆ ପଞ୍ଚାୟତ କାଳିଘାଇ ଗ୍ରାମରେ। ସୁଦର୍ଶନ ମଙ୍ଗଳବାର ଅପରାହ୍ନରେ ଘର ପାଖ ପୋଖରୀକୁ ଶୌଚ ପାଇଁ ଯାଉଥିବା ସମୟରେ ଜଙ୍ଗଲରୁ ପାଣି ପିଇବାକୁ ଆସିଥିବା ୪ ଭାଲୁଙ୍କ ହାବୁଡ଼ରେ ପଡ଼ିଥିଲେ। ନିଜକୁ ବଞ୍ଚାଇବା ପାଇଁ ହାତରେ ଧରିଥିବା ଟାଙ୍ଗିଆରେ ଭାଲୁଙ୍କୁ ଘଉଡାଇବା ପାଇଁ ସେ ପ୍ରାୟ ୧ ଘଣ୍ଟା ଧରି ଲଢ଼େଇ କରିଥିଲେ। ହେଲେ ଭାଲୁ ୪ଟି ତାଙ୍କୁ ଆକ୍ରମଣ କରି କ୍ଷତବିକ୍ଷତ କରି ପକାଇଥିଲେ। ସୁଦର୍ଶନଙ୍କ ପାଟିଶୁଣି ଗାଁଲୋକ ଠେଙ୍ଗାବାଡ଼ି ଧରି ଆସିବାରୁ ଭାଲୁ ଜଙ୍ଗଲକୁ ଚାଲି ଯାଇଥିଲେ। ଭାଲୁ ଆକ୍ରମଣରେ ସୁଦର୍ଶନଙ୍କ ବାମ ହାତ ବୁଢ଼ା ଆଙ୍ଗୁଠି ଛିଣ୍ଡିଯିବା ସହ, ଡାହାଣ ଆଖି ଓ ବାମଗୋଡ଼ରେ ଗଭୀର କ୍ଷତ ହୋଇଛି। ଗୁରୁତର ଅବସ୍ଥାରେ ଚିକିତ୍ସା ପାଇଁ ତାଙ୍କୁ ପ୍ରଥମେ ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ପରେ କେନ୍ଦୁଝର ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ପାଟଣା ବନପାଳ ପିଅନ ନାଏକ କହିଛନ୍ତି।