ଭୁବନ, ୧୭।୧୨(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନ ଥାନା ନୀଳକଣ୍ଠପୁର ଗ୍ରାମ ନିକଟ ସାଇ ନର୍ସରି ମାଲିକ ଅଲେଖ ଚନ୍ଦ୍ର ସେନାପତି (୪୩) ହତ୍ୟାକାଣ୍ଡକୁ ୨୪ ଘଣ୍ଟା ବିତିଯାଇଥିବାବେଳେ ପୋଲିସ ହାତରେ କୌଣସି ସୁରାକ ଲାଗିନାହିଁ। କିଏ, କାହିଁକି ଅଲେଖଙ୍କୁ ହତ୍ୟାକଲା ତାହା ଏବେ ବି ରହସ୍ୟ ଘେରରେ ରହିଛି। ଶୁକ୍ରବାର ଭୁବନ ପୋଲିସ, ଢେଙ୍କାନାଳରୁ ଆସିଥିବା ସାଇଣ୍ଟିଫିକ୍ ଟିମ୍ ସନ୍ଧାନୀ କୁକୁର ସହାୟତାରେ ନର୍ସରି, ନିକଟବର୍ତ୍ତୀ ବ୍ରାହ୍ମଣୀ ନଦୀ ପଠାରେ ଛାନ୍ଭିନ୍ କରିଥିଲେ ମଧ୍ୟ ପ୍ରମାଣ ମିଳିନାହିଁ। ଅନ୍ୟପଟେ ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି। ହତ୍ୟାର ଶିକାର ହୋଇଥିବା ଅଲେଖଙ୍କ ସାନଭାଇ ଚକ୍ରଧର ସେନାପତିଙ୍କ ଅଭିଯୋଗକ୍ରମେ ପୋଲିସ ନଂ. ୫୧୩/୨୨, ଦଫା ୩୦୨ ଏକ ମାମଲା ରୁଜୁ କରିଛି।
ଚକ୍ରଧର ଏତଲାରେ ଦର୍ଶାଇଛନ୍ତି, ଗୁରୁବାର ବଡ଼ଭାଇ ଅଲେଖଙ୍କ ସହ ସେ ନର୍ସରିରେ କାମ କରୁଥିଲେ। ତେବେ ସନ୍ଧ୍ୟା ପୂର୍ବରୁ ସେ ଘରକୁ ପଳାଇ ଆସିଥିଲେ। ଭାଇ ଫେରିବାରେ ବିଳମ୍ବ ହେବାରୁ ଭାଉଜ ତାଙ୍କ ମୋବାଇଲ୍କୁ ବାରମ୍ବାର ଫୋନ୍ କରିଥିଲେ। ହେଲେ ସେପଟୁ କୌଣସି ଉତ୍ତର ମିଳି ନ ଥିଲା। ସେ ବ୍ୟସ୍ତ ହେବାରୁ ଜଣେ ଶ୍ରମିକଙ୍କୁ ଧରି ଚକ୍ରଧର ନର୍ସରିକୁ ଯାଇଥିଲେ। ସେଠାରେ ଅଲେଖଙ୍କ କାର୍ ଥିବାବେଳେ ଭାଇ ରକ୍ତ ଜୁଡୁବୁଡୁ ଅବସ୍ଥାରେ ଚେତାଶୂନ୍ୟ ହୋଇ ପଡ଼ିଥିଲେ। ତାଙ୍କୁ ତୁରନ୍ତ ମେଡିକାଲକୁ ନେଇ ଆସିଥିଲୁ। ହେଲେ ସେତେବେଳକୁ ତାଙ୍କର ମୃତ୍ୟୁ ହୋଇଯାଇଥିଲା। ଯେହେତୁ ତାଙ୍କ ଶରୀରରେ ମାରଣାସ୍ତ୍ରରେ ଆକ୍ରମଣ କରିବାର କ୍ଷତ ଚିହ୍ନ ରହିଛି, ତେଣୁ ତାଙ୍କୁ କେହି ଦୁର୍ବୃତ୍ତ ହତ୍ୟା କରିଥିବା ଚକ୍ରଧର କହିଛନ୍ତି। ଅନ୍ୟପଟେ ଏଭଳି ଏକ ଅଭାବନୀୟ ହତ୍ୟାକାଣ୍ଡ ପରେ ଗ୍ରାମବାସୀଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ସେମାନେ ସକାଳ ୬ଟାରୁ ୮ଟା ଯାଏ ନୀଳକଣ୍ଠପୁର ଛକରେ ରାସ୍ତାରୋକୋ କରିଥିଲେ। ଥାନାଧିକାରୀ ସୌଭାଗ୍ୟ କୁମାର ସ୍ବାଇଁ, ନଗରପାଳ ଶୁଭେନ୍ଦୁ କୁମାର ସାହୁ ପହଞ୍ଚତ୍ ଲୋକଙ୍କୁ ବୁଝାଶୁଝା କରିବା ପରେ ସ୍ଥିତି ସ୍ବାଭାବିକ ହୋଇଥିଲା। ଏ ସଂକ୍ରାନ୍ତରେ ଥାନାଧିକାରୀ କୁହନ୍ତି, ଏହି ହତ୍ୟାକାଣ୍ଡ ଘଟଣାରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ସନ୍ଦେହ କରାଯାଉଛି। ଅତିଶୀଘ୍ର ଘଟଣାର ରହସ୍ୟ ଉନ୍ମୋଚନ କରାଯିବ।
