ବ୍ରହ୍ମପୁର,୨୮ା୮(ସୁବାସ ଚନ୍ଦ୍ର ପାଢ଼ୀ): ବ୍ରହ୍ମପୁର ସହରରେ ଲୁଟେରା ଗ୍ୟାଙ୍ଗ ତାଲାବନ୍ଦ ଘରକୁ ଟାର୍ଗେଟ କରିବାରେ ଲାଗିଛନ୍ତି। ଗୋଷାଣି ନୂଆଗାଁ ଥାନା ଅଧୀନ ହରିହରନଗର ୨ୟ ସାରଣୀ ଏକ୍ସଟେନ୍ସନରେ ଥିବା ଏକ ବନ୍ଦ ଘରୁ କେତେକ ଦୁର୍ବୃତ୍ତ କଳାକନା ବୁଲାଇଛନ୍ତି।
ଘରେ କେହି ନ ଥିବାର ସୁଯୋଗ ନେଇ ଏକ ଲୁଟେରା ଗ୍ୟାଙ୍ଗ ଘରେ ପଣି ତାଲା ଭାଙ୍ଗି ଆଲମିରାରୁ ୪ କେଜିର ରୁପା ସାମଗ୍ରୀ ସହ ୧୫୦ଗ୍ରାମର ସୁନା ଗହଣା ଏବଂ ୩୦ ହଜାର ଟଙ୍କା ଚୋରି କରିଥିବା ନେଇ ଘର ମାଲିକ କେ.ବାଳକୃଷ୍ଣ ପାତ୍ର ଥାନାରେ ଅଭିଯୋଗ କରିଛନ୍ତି।
ଅଭିଯୋଗକୁ ଭିତ୍ତି କରି ପୋଲିସ ଏକ ମାମଲା(ନଂ.୨୪୬/୨୩) ରୁଜୁ କରି ତଦନ୍ତ ଆରମ୍ଭ କରିଛି। ବାଳକୃଷ୍ଣ ଗତ ୨୪ତାରିଖ ରାତିରେ କୌଣସି କାମରେ ଭୁବନେଶ୍ୱର ଯାଇଥିଲେ। ଯିବା ପୂର୍ବରୁ ଘର କବାଟ ସବୁ ବନ୍ଦ କରି ୱାଚମ୍ୟାନକୁ ଚାବି ଦେଇଥିଲେ। ସେହି ରାତିରେ ଓ୍ବାଚମ୍ୟାନ୍ ଘର ବାରଣ୍ଡାରେ ଶୋଇଥିଲେ। ହେଲେ ୨୫ ତାରିଖରେ ସେ ଚାବିକୁ ପଡ଼ୋଶୀଙ୍କ ଘରେ ଦେଇ ରାତିରେ ଆଉ ଆସି ନ ଥିଲେ। ୨୬ ତାରିଖରେ ବାଳକୃଷ୍ଣ ଫେରିବା ପରେ ଘର କବାଟ ତାଲା ଭଙ୍ଗାଯାଇଥିବା ଦେଖିଥିଲେ। ଏପରିକି ଆଲମାରିରୁ ସୁନା ଓ ରୂପା ଅଳଙ୍କାର ନ ଥିବା ଦେଖି ଥାନାରେ ଅଭିଯୋଗ କରିଛନ୍ତି। ଅଭିଯୋଗକୁ ଭିତ୍ତି କରି ପୋଲିସ ଘଟଣାର ତଦନ୍ତ ଚଳାଇଛି।