ରାୟଗଡ଼ା,୧୨।୭ (ଆଶିଷ ରଞ୍ଜନ ପଣ୍ଡା): ରାୟଗଡ଼ା ଜିଲା ମୁନିଗୁଡ଼ା ପୋଲିସ ମଙ୍ଗଳବାର ୪ ମାଓବାଦୀଙ୍କୁ ଗିରଫ କରିଛି। ଗିରଫ ମାଓବାଦୀମାନେ ହେଲେ ମୁନିୁଗଡ଼ା ବ୍ଲକ କାଡ୍ରାପାଙ୍ଗା ଗ୍ରାମର ନୂଆମାଝି କାଡ୍ରାକା, ପାଟରାଣୀ ଗ୍ରାମର ରାଗିଡ଼ି ଗାଗରାଙ୍ଗା, ବଡ଼ଡେଙ୍ଗୁଣି ଗ୍ରାମର ବଇ କରକରିଆ ଓ ଚନ୍ଦ୍ରପୁର ବ୍ଲକ ଗୁନାଖାଲ ଗ୍ରାମର ପାଗୁଡ଼ା କିମ୍ବାକା। ମୁନିଗୁଡ଼ା ପୋଲିସ ଏକ ମାମଲା ରୁଜୁକରି ସମସ୍ତଙ୍କୁ କୋର୍ଟ ଚାଲାଣ କରିଥିବା ଜିଲା ପୋଲିସ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।
ପୋଲିସ ସୂଚନା ଅନୁଯାୟୀ, ଗିରଫ ଅଭିଯୁକ୍ତମାନେ ଗତ କିଛିଦିନ ହେବ ମାଓବାଦୀଙ୍କୁ ବିଭିନ୍ନ ପ୍ରକାର ସହାୟତା କରିଆସୁଥିଲେ। ଜଙ୍ଗଲ ଭିତରେ ମାଓବାଦୀ ସଙ୍ଗଠନର ସଭ୍ୟାସଭ୍ୟଙ୍କ ରହିବା ଓ ଖାଇବା ବ୍ୟବସ୍ଥା ସହ ପୋଲିସର ସ୍ଥିତି ସମ୍ପର୍କରେ ସୂଚନା ଦେଉଥିଲେ। ସିପିଆଇ (ମାଓବାଦୀ) ସଙ୍ଗଠନର ରୀତା, ନିଖିଲ ଓ ବଣ୍ଟିଙ୍କ ମୁଖ୍ୟ ସୂଚନାଦାତା ଏବଂ ସହଯୋଗୀ ଭାବେ କାର୍ଯ୍ୟ କରୁଥିବା ପୋଲିସ ଗୋଇନ୍ଦା ସୂତ୍ରରୁ ଜାଣିବାକୁ ପାଇବା ପରେ ଅଚାନକ ଚଢ଼ାଉ କରାଯାଇ ସେମାନଙ୍କୁ ଗିରଫ କରାଯାଇଛି।
ପ୍ରକାଶ ଥାଉକି, ଗତ କିଛିଦିନ ହେବ ମୁନିଗୁଡ଼ା, ଅମ୍ବାଦଳା ଓ ଚନ୍ଦ୍ରପୁର ଥାନା ଅଞ୍ଚଳରେ ମାଓବାଦୀଙ୍କ ଗତିବିଧି ବୃଦ୍ଧି ପାଇବାରେ ଲାଗିଛି। ଗତ ୧ ତାରିଖରେ ମୁନିଗୁଡ଼ା ଥାନା ଅନ୍ତର୍ଗତ ଦେଓକୁପୁଲି ଗାଁ ନିକଟରେ ଥିବା ଠିକା କ୍ରଶର ଉପରେ ମାଓବାଦୀମାନେ ଆକ୍ରମଣ କରି ୯ଟି ଗାଡ଼ି ପୋଡ଼ିଦେଇଥିଲେ। ସେହିପରି ମାଓବାଦୀମାନେ ଲଗାତର ସେହି ଅଞ୍ଚଳରେ ଧମକପୂର୍ଣ୍ଣ ବ୍ୟାନର ଓ ପୋଷ୍ଟର ଲଗାଇ ବିଭିନ୍ନ ଚେତାବନୀ ଦେଉଥିବା ଦେଖିବାକୁ ମିଳିଛି।