ଜୟପୁର, ୨୬ା୫ : ୨୦୧୮ରେ ରାକବର ଖାନ୍ଙ୍କୁ ପିଟି ମାରିଦେବା ଘଟଣାରେ ୫ ଅଭିଯୁକ୍ତଙ୍କ ମଧ୍ୟରୁ ୪ ଜଣଙ୍କୁ ରାଜସ୍ଥାନ ଅଲଓ୍ବର ଜିଲାର ଏକ ଅଦାଲତ ଦୋଷୀସାବ୍ୟସ୍ତ କରିବା ସହ ୭ ବର୍ଷ ଲେଖାଏ ସଶ୍ରମ କାରାଦଣ୍ଡାଦେଶ ଦେବା ସହ ୧୦ ହଜାର ଟଙ୍କା ଲେଖାଏ ଅର୍ଥଦଣ୍ଡରେ ଦଣ୍ଡିତ କରିଛନ୍ତି। ପ୍ରମାଣ ଅଭାବରୁ ଅନ୍ୟ ଜଣକୁ ଦୋଷମୁକ୍ତ କରାଯାଇଛି। ଆଇପିସିର ଧାରା ୩୦୪ ଏବଂ ୩୪୧ ଅନୁଯାୟୀ ଧର୍ମେନ୍ଦ୍ର ଯାଦବ, ପରମଜିତ୍, ବିଜୟ କୁମାର ଏବଂ ନରେଶଙ୍କୁ ଦୋଷୀସାବ୍ୟସ୍ତ କରାଯାଇଥିବା ସ୍ବତନ୍ତ୍ର ପବ୍ଲିକ୍ ପ୍ରସିକ୍ୟୁଟର ଅଶୋକ ଶର୍ମା କହିଛନ୍ତି। ନଭାଲ କିଶୋରଙ୍କୁ ପ୍ରମାଣ ଅଭାବରୁ ମୁକ୍ତ କରାଯାଇଛି। ଦଣ୍ଡ ଶୁଣାଣିବେଳେ କୋର୍ଟ ବାହାର ପ୍ରବଳ ଜନସମାଗମ ହୋଇଥିବାରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା। ସୂଚନାଯୋଗ୍ୟ, ୨୦୧୮ ଜୁଲାଇ ୨୦ ରାତିରେ ରାମଗଡ଼ର ଲାଲାଓ୍ବାଣ୍ଡି ଗ୍ରାମ ନିକଟରେ ଗାଈ ନେଇଯାଉଥିବା ହରିୟାଣାର ରାକବର ଓରଫ ଆକବରଙ୍କୁ ଗ୍ରାମବାସୀ ଘେରିଯାଇ ମାଡ଼ ମାରିବାରୁ ତାଙ୍କର ମୃତ୍ୟୁ ଘଟିଥିଲା।