ଭଦ୍ରକ ଅଫିସ,୨୨।୭: ଭଦ୍ରକ ଗ୍ରାମାଞ୍ଚଳ ଥାନା ପୋଲିସ ୨ଟି ମାମଲାରେ ୪ଜଣ ଲୁଟେରାଙ୍କୁ ଗିରଫ କରିଛି। ସେମାନଙ୍କଠାରୁ ୫ ଚୋରି ବାଇକ୍ ଓ ନଗଦ ଟଙ୍କା ଜବତ କରାଯାଇଥିବା ଶୁକ୍ରବାର ଗ୍ରାମାଞ୍ଚଳ ଥାନାରେ ଅନୁଷ୍ଠିତ ଖବରଦାତା ସମ୍ମିଳନୀରେ ଭଦ୍ରକ ଏସ୍ଡିପିଓ ପ୍ରଭାସ ଚନ୍ଦ୍ର ପାଲ ସୂଚନା ଦେଇଛନ୍ତି।
ପ୍ରକାଶ ଯେ, ଗତ ୧୯ ତାରିଖରେ ଚରମ୍ପା ଶୁଭମ ଲଜିଷ୍ଟିିକ୍ ସମ୍ମୁଖରେ ଇନାମୁଲ ରହମାନ ନାମକ ଝାଡ଼ଖଣ୍ଡ ଟ୍ରକ୍ ଡ୍ରାଇଭର ଓ ହେଲ୍ପର ମହମ୍ମଦ ସକୀଲ ଗାଡ଼ି ରଖି ଅନ୍ଲୋଡିଂ କରୁଥିଲେ। ଏହି ସମୟରେ ୩ଜଣ ଲୁଟେରା ଏକ ବାଇକ୍ରେ ଆସି ଲୁହାରଡ୍ରେ ସକୀଲଙ୍କୁ ଆକ୍ରମଣ କରି ମୋବାଇଲ ଛଡ଼ାଇ ନେବା ସହ ଟଙ୍କା ମାଗିଥିଲେ। ସେମାନେ ମାଲିକଙ୍କୁ ଫୋନ୍ କରି ଟଙ୍କା ମାଗିବାରୁ ସେ ଫୋନପେ ମାଧ୍ୟମରେ ୪ ହଜାର ଟଙ୍କା ପଠାଇ ଦେଇଥିଲେ। ଏହାପରେ ୩ ଲୁଟେରା ମୋବାଇଲ ଧରି ଫେରାର ହୋଇଯାଇଥିଲେ।
ପରେ ରାତିରେ ଆରଡ଼ି ଛକ ଜାତୀୟ ରାଜପଥ ପାଖରେ ଦେବସ୍ମିତା ମହାନ୍ତି ନାମ୍ନୀ ମହିଳାଙ୍କ ଘର ତାଲା ଭାଙ୍ଗି ପଶିଥିଲେ। ହେଲେ ଘର ଲୋକ ଉଠି ପଡ଼ିବାରୁ କାର୍କୁ ଲୁହା ରଡ୍ରେ ପିଟି ଭାଙ୍ଗିବା ପରେ ୨ଟି ବାଇକ୍ରେ ଫେରାର ହୋଇଯାଇଥିଲେ। ଅଭିଯୋଗ କ୍ରମେ ଗ୍ରାମାଞ୍ଚଳ ଥାନାରେ ଏକ ମାମଲା ରୁଜୁ ହୋଇଥିଲା। ୨ଟି ମାମଲାର ତଦନ୍ତ କରି ଫୋନପେ ନମ୍ବରରୁ ଠିକଣା ଓ ବାଇକ୍ ନମ୍ବରରୁ ମାଲିକଙ୍କ ଠିକଣା ବାହାର କରି ଲୁଟେରା ଗ୍ୟାଙ୍ଗ୍କୁ ଧରିବା ନେଇ ପୋଲିସର ତଦନ୍ତ ଆରମ୍ଭ କରିଥିଲା। ମୋବାଇଲ ଲୋକେଶନକୁ ଆଧାର କରି ଚରମ୍ପା ରେଲୱେ ପୋଲଠାରେ ଗୁରୁବାର ଚଢ଼ାଉ କରି ୪ ଜଣଙ୍କୁ ଗିରଫ ସହ ୩ ବାଇକ୍ ଜବତ କରିଥିଲା। ଏପରିକି ପୋଲିସ ଅଭିଯୁକ୍ତଙ୍କ ଘରେ ଚଢାଉ କରି ମୋବାଇଲ ଫୋନ, ୨ଟି ବାଇକ୍ ଓ ୪ ହଜାର ନଗଦ ଟଙ୍କା ଜବତ କରିଥିଲା। ପୋଲିିସ ଘଟଣାର ଅଧିକ ତଦନ୍ତ ନେଇ ଅଭିଯୁକ୍ତମାନଙ୍କ ନଁା ପ୍ରକାଶ କରିନାହିଁ। ତେବେ ସେମାନଙ୍କ ନଁାରେ ଭଦ୍ରକ ଟାଉନ, ଗ୍ରାମାଞ୍ଚଳ ଓ ବାସୁଦେବପୁର ଥାନାରେ ବହୁ ମାମଲା ରହିଛି। ଆଗରୁ ବିଭିନ୍ନ ମାମଲାରେ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଏସ୍ଡିପିଓ ପାଲ ସୂଚନା ଦେଇଛନ୍ତି।