କେନ୍ଦୁଝର,୫ା୪(ସ୍ବ.ପ୍ର.): ଚମ୍ପୁଆ ରେଞ୍ଜ ଅନ୍ତର୍ଗତ ବାମେବାରୀ ସେକ୍ସନ ଜଜାଙ୍ଗ ପାଚେରୀ ସାହିରେ ବୁଧବାର ଏକ ଜଙ୍ଗଲୀ ବାର୍ହା ଆକ୍ରମଣରେ ୪ ଜଣ ଗୁରୁତର ହୋଇଛନ୍ତି। ସେମାନେ ହେଲେ ଜଜାଙ୍ଗ ଗ୍ରାମର ମାନସିଂହ ମୁଣ୍ଡା,ଭଟ୍ଟ ମାଝି,କବିତା ସେଠୀ ଓ ତାଙ୍କ ୪ବର୍ଷର ଶିଶୁ ପୁତ୍ର।
ଖବର ନେବାରୁ ଜଣାପଡ଼ିଛି,ବୁଧବାର ପୂର୍ବାହ୍ନରେ ପ୍ରଥମେ ପାଚେରି ସାହିରେ ରହୁଥିବା କବିତା ସେଠୀଙ୍କ ଘରକୁ ପଶି ତାଙ୍କ ୪ବର୍ଷର ଶିଶୁପୁତ୍ରକୁ ଆକ୍ରମଣ କରି ଲହୁଲୁହାଣ କରିଥିଲା। ଶିଶୁପୁତ୍ରକୁ ଉଦ୍ଧାର କରିବାକୁ ଯାଇ କବିତା ସେଠୀ ବାର୍ହା ଆକ୍ରମଣର ଶିକାର ହୋଇଥିଲେ। ତାଙ୍କୁ ମଧ୍ୟ ବାର୍ହାଟି ଆକ୍ରମଣ କରି ରକ୍ତାକ୍ତ କରି ଗୁରୁତର କରିଥିଲା। ସେ ଚିତ୍କାର କରିବାରୁ ସ୍ଥାନୀୟ ଗ୍ରାମବାସୀ ସେଠାକୁ ପହଞ୍ଚି ବାର୍ହାକୁ ଗୋଡ଼ାଇବାକୁ ଚେଷ୍ଟା କରିଥିଲେ। ଏହି ସମୟରେ ବାରହାଟି ପାଲଟା ଆକ୍ରମଣ କରି ମାନସିଂହ ମୁଣ୍ଡା,ଭଟ୍ଟ ମାଝିକୁ ଗୁରୁତର କରି ଚାଲିଯାଇଥିଲା। ବନ ବିଭାଗ ଖବର ପାଇ ଯୋଡ଼ା ବନପାଳ ଦାୟିତ୍ବରେ ଥିବା ବନପାଳ କାଳିନ୍ଦୀ ଚରଣ ସାମଲ,ବାମେବାରୀ ବନପାଳ ରତ୍ନାକର ମହାନ୍ତ ସଦଳବଳ ଘଟଣାସ୍ଥଳରେ ପହଞ୍ଚିଥିଲେ। ଚମ୍ପୁଆ ରେଞ୍ଜର ଅକ୍ଷୟ କୁମାର ଛତିଆ ଓ୍ବାଇଲ୍ଡ ଲାଇଫ୍ ପ୍ରୋଟେକ୍ସନର ଟ୍ରାଙ୍କୁଲାଇଜର ଏକ୍ସପର୍ଟଙ୍କୁ ଧରି ଘଟଣାସ୍ଥଳରେ ପହଞ୍ଚି ବାର୍ହାକୁ ଟ୍ରାଙ୍କୁଲାଇଜ କରିଥିଲେ।
