ନୟାଗଡ଼ ଅଫିସ,୩।୩: ଓଡ଼ଗାଁ ବ୍ଳକ ବାଣ୍ଠପୁର ପଞ୍ଚାୟତର ଗୋଟିଏ ପାହାଡ଼ରେ ୪ ଚିରସ୍ରୋତା ଝରଣାକୁ ଦେଖିବାକୁ ଗୁରୁବାର ନୟାଗଡ଼ ବିଧାୟକ ଅରୁଣ ସାହୁ, ଜିଲାପାଳ ରବୀନ୍ଦ୍ର ନାଥ ସାହୁ, ଡିଏଫଓ କ୍ଷମା ଷଡ଼ଙ୍ଗୀ, ବିଡିଓ ସନ୍ତୋଷ କୁମାର ଜେନା, ଜିଲା ପର୍ଯ୍ୟଟନ ଅଧିକାରୀ ମୀରା ବେହେରା, ଜଳବିଭାଜିକା ପ୍ରକଳ୍ପ ନିର୍ଦ୍ଦେଶକ ସୁଧାକର ଶତପଥୀ, ତହସିଲଦାର ଅନୀଲ ଆଚାର୍ଯ୍ୟ, ବ୍ଲକ ଅଧ୍ୟକ୍ଷ ଲୋକନାଥ ସାହୁ ସେଠାକୁ ଯାଇଥିଲେ। ଏହାପରେ ଇକୋ ଟୁରିଜିମର ଆଶା ସଫଳ ହେବାକୁ ଯାଉଛି ବୋଲି ମତ ପ୍ରକାଶ ପାଇଛି। ଜିଲାପାଳ, ବିଧାୟକ ଓ ଡିଏଫ୍ଓଙ୍କ ସୂଚନା ପରେ ୪ ଝରଣାର ଆଖପାଖ ଅଞ୍ଚର ରୂପ ବଦଳିବାକୁ ଯାଉଛି । ସମ୍ପୃକ୍ତ ସ୍ଥାନ ଇକୋ ଟୁରିଜିମର ମାନ୍ୟତା ପାଇବ ବୋଲି ଆଶ୍ୱସନା ମିଳିଛି ।
ନୟାଗଡ଼ ଜିଲା ଓଡ଼ଗାଁ ବ୍ଲକ ବାଣ୍ଠପୁର ପଞ୍ଚାୟତ ନିହଲପ୍ରସାଦ ଗାଁରେ ରହିଛି ୪ ଚିରସ୍ରୋତା ଝରଣା। ଏଥିସହିତ କାନଖାଇ ପାହାଡ଼ର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଆକୃଷ୍ଟ କରିଥାଏ । ଶରଣକୁଳ ଓଡ଼ଗାଁ ରାସ୍ତାର କେନାଲ ଛକଠାରୁ ବୁଢ଼ାବୁଢ଼ିଆଣି ଡ୍ୟାମ ଠାରୁ ୫ କିମି ଓ ବୁଢ଼ାବୁଢ଼ିଆଣି ଡ୍ୟାମ୍ଠାରୁ ୪ କିମି ଗଲେ ପଡେ ଏହି କାନଖାଇ ପାହା । କାନଖାଇ ପାହାଡର ପାଦ ଦେଶରୁ ଶିଖର ପର୍ଯ୍ୟନ୍ତ ବହୁଛି ଏହି ୪ ଚିରସ୍ରୋତା ଝରଣା। ପାହାଡ ଉପରିଭାଗରେ କାନଖାଇ, ପରେ ହଳଶଗଡ, ବରକନ୍ୟା ଓ ପାଦ ଦେଶରେ ବହୁଛି ଶିଶୁ ପୁତ୍ର ଝରଣା। ଏହି ଝରଣାର ଜଳ ସବୁବେଳେ କୁଳୁକୁଳୁ ନାଦରେ ବହି ଚାଲିଥାଏ । ଗ୍ରୀଷ୍ମଋତୁରେ ସେଠାକାର ପରିବେଶ ପର୍ଯ୍ୟଟକଙ୍କୁ ବେଶ ଆମୋଦ ଦିଏ । ଗ୍ରୀଷ୍ମଋତୁରେ ସେଠାରେ ଶୀତ ଅନୁଭୂତ ହୁଏ। ଦିନବେଳା ଏଠାରେ ରାତିର ଭ୍ରମ ସୃଷ୍ଟି କରିଥାଏ ।
ଏନେଇ ବିଧାୟକ ସାହୁ ଓ ଜିଲାପାଳ ସାହୁ କୁହନ୍ତି, ରିଜର୍ଭ ଫରେଷ୍ଟ ଭିତରେ ଗୋଟିଏ ମୁଣ୍ଡିଆରେ ୪ଟି ଚିରସ୍ରୋତା ଝରଣା ରହିଥିଲେହେଁ ଏହା ନଜରକୁ ଆସି ନ ଥିଲା। ବନବିଭାଗ ସହ ଆଲୋଚନା କରାଯାଇ ଏହାକୁ ଇକୋ ଟୁରିଜିମ ରୂପେ ଘୋଷଣା କରାଯିବାକୁ ପଦକ୍ଷେପ ନିଆଯିବ। ଡିଏଫ୍ଓ କ୍ଷମା ଷଡ଼ଙ୍ଗୀ କୁହନ୍ତି, ଆସନ୍ତା ବର୍ଷ ଏହାକୁ ଇକୋ ଟୁରିଜିମରେ ଘୋଷଣା କରାଯିବାକୁ ପ୍ରସ୍ତାବ ଦିଆଯିବ। ତେବେ ସେଠାକାର ଜଙ୍ଗଲିଆ ପରିବେଶ ହାତୀଙ୍କ ଚଳପ୍ରଚଳ ସ୍ଥଳ ସାଜିଛି। ହାତୀଙ୍କ ସୁରକ୍ଷାକୁ ଆଖି ଆଗରେ ରଖି ପଦକ୍ଷେପ ନିଆଯିବ। ଅନ୍ୟପକ୍ଷେ ବଣଭୋଜି ଝରଣା ପାଖରେ ନ କରି ପାହାଡ଼ ପାଦଦେଶରେ କରାଯାଇ ପାରିବ। କିନ୍ତୁ ଝରଣାଗୁଡିକୁ ବୁଲିବାକୁ ଗଲେ କୌଣସି ଅସୁବିଧା ହେବ ନାହିଁ ବୋଲି ସେ କହିଛନ୍ତି।