ଅମରପାଲି,୧୪ା୧୧(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ବହଳପଦର ପଞ୍ଚାୟତର ୪ ଗ୍ରାମକୁ ଏଯାଏ ପ୍ରଧାନମନ୍ତ୍ରୀ ଗ୍ରାମ ସଡକ ଯୋଜନାରେ ସାମିଲ କରାଯାଇନାହିଁ। ଫଳରେ ଉକ୍ତ ୪ଗ୍ରାମର ଗୁଦଗୁଦା, ସରଧାପାଲି(ହୋତାପାଲି), ଫବସିପାଲି ଓ ଭାଲୁଡୁଙ୍ଗୁରୀ(କଲନିପଡା) ଗ୍ରାମର ଲୋକେ ଯିବା ଆସିବାରେ ଅସୁବିଧାର ସମ୍ମୁଖୀନ ହେଉଛନ୍ତି। ବାରମ୍ବାର ଅଭିଯୋଗ କଲେ ମଧ୍ୟ ନାଁ ଶୁଣୁଛି ପ୍ରଶାସନ ନାଁ ଜନପ୍ରତିନିଧି।
ବୀରମହାରାଜପୁର-ଅମରପାଲି ପୂର୍ତ୍ତ ବିଭାଗ ରାସ୍ତାର ଅମରପାଲି ହାଇସ୍କୁଲ ଛକ ନିକଟରୁ ଗୁଦଗୁଦା ଗ୍ରାମ ଶେଷ ସୀମା ପର୍ଯ୍ୟନ୍ତ ଦୂରତା ପ୍ରାୟ ୩କିଲୋମିଟର। ମାତ୍ର ଗ୍ରାମକୁ ସଂଯୋଗ କରୁଥିବା ରାସ୍ତା ଅବସ୍ଥା ଶୋଚନୀୟ। ଉକ୍ତ ରାସ୍ତା ଦେଇ ଗୁଦଗୁଦା ସମେତ ଲୁତୁରପଙ୍କ, କେନଝିରିଆପାଲି, ଖଣ୍ଡହତା, ଦୁର୍ଜନତୈଲା, କୋଟସମଲାଇ ପଞ୍ଚାୟତ ଏବଂ ପଡୋଶୀ ସମ୍ବଲପୁର ଜିଲାର ଗରଗଡବାହାଲ, ଚାରମାଲ, ବଂଶାଜାଲ ଆଦି ପଞ୍ଚାୟତର ଲୋକେ ରେଢାଖୋଲକୁ ଯିବା ଆସିବା କରିଥାନ୍ତି। ବର୍ଷାଦିନେ ଉକ୍ତ ରାସ୍ତାରେ ଯାତାୟତ ବ୍ୟାହତ ହୋଇପଡେ। ଗୁଦଗୁଦା ଗଁ ମୁଣ୍ଡରେ ଥିବା ଏକ ନାଳ ଉପର ପୋଲ ଭାଙ୍ଗି ଯାଇଛି। ଏଣୁ ଚାରିଚକିଆ ଯାନବାହାନ ଯିବା ଆସିବାରେ ସମସ୍ୟା ହେଉଛି। ଦୀର୍ଘଦିନ ହେଲା ଗ୍ରାମକୁ ପିଚୁରାସ୍ତା ପାଇଁ ଅଭିଯୋଗ ହେଉଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଅନୁରୂପ ଅବସ୍ଥା ସୁର୍ଦ୍ଧାପାଲି(ହୋତାପାଲି) ଗ୍ରାମର। ଗ୍ରାମରେ ୭୦ ପରିବାର ରହୁଛନ୍ତି। ଗ୍ରାମର ଗୋଟିଏ ପାଶର୍ବକୁ ଦୁର୍ଜନତୈଲା ଓ ଅନ୍ୟପାଶର୍ବକୁ ଦାଦରପାଲିରୁ ରାସ୍ତା ସଂଯୋଗ ହୋଇଛି। ମାତ୍ର ଉଭୟ ପାଶର୍ବରୁ ପ୍ରଧାନମନ୍ତ୍ରୀ ସଡକ କିମ୍ବା ମୁଖ୍ୟମନ୍ତ୍ରୀ ସଡକ ଯୋଜନାରେ ପିଚୁ ରାସ୍ତା ସଂଯୋଗ ହୋଇନାହିଁ। ଗାଁ ମୁଣ୍ଡରେ ଥିବା ପୋଲ ଜରାଜୀର୍ଣ୍ଣ ଅବସ୍ଥାରେ ରହିଛି। ଫଳରେ ଦାଦରପାଲି ସ୍କୁଲ, ଅମରପାଲି ହାଇସ୍କୁଲ, ଭୁତିଆପାଲି କଲେଜ, ପଞ୍ଚାୟତ କାର୍ଯ୍ୟାଳୟ,ଡାକଘର, ବ୍ୟାଙ୍କ, ବଜାର ଆଦି ଅନ୍ୟ ସ୍ଥାନକୁ ଯିବାକୁ ଅସୁବିଧା ହେଉଥିବା ୱାର୍ଡସଭ୍ୟ ସୁରେଶ ମିଞ୍ଜ ପ୍ରକାଶ କରିଛନ୍ତି। ଗ୍ରାମକୁ ଉଭୟ ପାଶର୍ବରୁ ୩ କିମି ଲେଖାଏ ପକ୍କା ରାସ୍ତା କରିବାକୁ ଗ୍ରାମବାସୀ ଦାବି କରିଛନ୍ତି।
ଅମରପାଲି-ଠେଙ୍ଗ ଡ୍ୟାମ ରାସ୍ତାର ଗୌଡଗାଡ ମନ୍ଦିରଠାରୁ ଫବସିପାଲି ଗ୍ରାମକୁ ଲୋକେ ଯିବା ଆସିବା କରନ୍ତି। ମାତ୍ର ଉକ୍ତ ଗ୍ରାମକୁ ଏଯାଏ ରାସ୍ତା ନାହିଁ। ଲୋକେ ଚାଷ ଜମି ହିଡରେ ପ୍ରାୟ ୨କିମି ଯିବା ଆସିବା କରୁଛନ୍ତି। ବୀରମହାରାଜପୁର -ଅମରପାଲି ପୂର୍ତ୍ତ ବିଭାଗ ରାସ୍ତାରୁ ଭାଲୁଡୁଙ୍ଗୁରୀ(କଲନିପଡା)କୁ ଦୂରତା ୨କିମି। ଗ୍ରାମରେ ପ୍ରାୟ ୭୦ ପରିବାର ବାସ କରନ୍ତି। ବାରମ୍ବାର ଅଭିଯୋଗ କଲେ ମଧ୍ୟ ଗ୍ରାମକୁ ପକ୍କା ରାସ୍ତା ନିର୍ମାଣ ହୋଇନାହିଁ। ପ୍ରଶାସନ ଉକ୍ତ ଗ୍ରାମ ଗୁଡିକୁ ପ୍ରଧାନମନ୍ତ୍ରୀ ଗ୍ରାମ୍ୟ ସଡକ କିମ୍ବା ମୁଖ୍ୟମନ୍ତ୍ରୀ ସଡକ ଯୋଜନାରେ ସାମିଲ କରି ନିର୍ମାଣ କରିବାକୁ ଦାବି ହେଉଛି।