ସାକ୍ଷୀଗୋପାଳ,୬।୬(ସ୍ବ.ପ୍ର./ଡି.ଏନ୍.ଏ.): ସତ୍ୟବାଦୀ ଥାନା ପୋଲିସ ରବିବାର ରାତିରେ ପାଟ୍ରୋଲିଂ କରୁଥିବା ସମୟରେ ଏକ ବଡ଼ଧରଣର ଡକାୟତି ପାଇଁ ଯୋଜନା କରୁଥିବା ୫ଜଣରୁ ୪ଜଣ ଦୁର୍ବୃତ୍ତଙ୍କୁ ଧରିବାରେ ସଫଳ ହୋଇଛି। ସେମାନେ ହେଲେ ଉକ୍ତ ଥାନା ଅନ୍ତର୍ଗତ ବାରଘରିଆ ସାହିର ଲଷ୍ମୀଧର ପ୍ରଧାନ (କଇନ), ଆଠବାଟିଆ ଗ୍ରାମର ଦିବାକର ସ୍ବାଇଁ (ହଟ), ମହାମାୟା ସାହିର ପ୍ରଦୀପ ରାଉତ (ପଦି) ଓ ଆଠବାଟିଆର ଦିଲୀପ କୁମାର ସାହୁ (ଦିଲୁ)। ଏ ନେଇ ପୋଲିସ ଏକ ମାମଲା ରୁଜୁ କରି ୪ଅଭିଯୁକ୍ତଙ୍କୁ କୋର୍ଟଚାଲାଣ କରିଛି। ରବିବାର ରାତିରେ ପୋଲିସ ପାଟ୍ରୋଲିଂ କରୁଥିବା ସମୟରେ ସତ୍ୟବାଦୀ ମନ୍ଦିର ପଛପଟେ ଥିବା ବକୁଳବନ ନିକଟ ଏକ ନିକାଞ୍ଚନ ସ୍ଥାନରେ ଡକାୟତି ପାଇଁ ୫ଜଣ ଯୁବକ ଏକାଠି ହୋଇ ଯୋଜନା କରୁଥିବାର ଏକ ଖବର ମିଳିଥିଲା। ସବ୍ଇନ୍ସପେକ୍ଟର ସୁରମା ସ୍ବାଇଁ ଓ ଦୀପ୍ତିରଞ୍ଜନ ସାହୁଙ୍କ ସହ ଏକ ଟିମ୍ ଘଟଣାସ୍ଥଳରେ ଚଢ଼ାଉ କରିଥିଲେ। ଚଢ଼ାଉ ସମୟରେ ୪ ଅଭିଯୁକ୍ତଙ୍କୁ ଧରିଥିବାବେଳେ ଅନ୍ୟଜଣେ ଅଭିଯୁକ୍ତ ଖସି ଯିବାରେ ସକ୍ଷମ ହୋଇଥିଲା। ଏମାନେ ଡକାୟତି ପାଇଁ ବ୍ୟବହାର କରୁଥିବା ଲୁହାରଡ଼, ଛୁରି, ହକି ଷ୍ଟିକ ଓ ଏକ ଖେଳଣା ବନ୍ଧୁକ ସହ ବିଅର ବୋତଲ ଓ ଗ୍ଲାସକୁ ଜବତ କରିଥିଲେ। ୪ ଅଭିଯୁକ୍ତଙ୍କୁ ଜେରା ସମୟରେ ଏକ ଡକାୟତି ପାଇଁ ଯୋଜନା କରୁଥିବାର ସ୍ବୀକାର କରିଥିଲେ। ଏମାନେ ମୁଖ୍ୟତଃ ରାସ୍ତାରେ ଯାଉଥିବା ମୋଟରସାଇକେଲ ଆରୋହୀ ଓ ଯାତ୍ରୀଙ୍କୁ ଟାର୍ଗେଟ କରିଥାନ୍ତି ବୋଲି ମାନିଥିଲେ। ଏପରିକି ସେମାନେ ଏକ ଖନନ ମେଶିନରୁ ୨ଟି ବ୍ୟାଟେରି ଚୋରି କରିଥିବା କହିବାରୁ ପୋଲିସ ୨ ବ୍ୟାଟେରୀକୁ ଜବତ କରିଛି l ଏମାନଙ୍କ ମଧ୍ୟରୁ ଦିଲୀପ ଓ ପ୍ରଦୀପଙ୍କ ନାମରେ ସତ୍ୟବାଦୀ ଥାନାରେ ଅନେକ ମାମଲା ରହିଛି।