![](https://www.dharitri.com/wp-content/uploads/2020/11/rape-1479873081-1.jpg)
ଫୁଲବାଣୀ, ୨୪।୭(ରାକେଶ କୁମାର ରାଉତ): ଜଣେ ୪ ବର୍ଷର ନାବାଳିକାଙ୍କୁ ବଳାତ୍କାର ମାମଲାର ବିଚାର କରି ମଙ୍ଗଳବାର ଫୁଲବାଣୀ ସ୍ବତନ୍ତ୍ର ପୋସ୍କୋ କୋର୍ଟ ବିଚାରପତି ରାଜେଶ ଦାସ ଅଭିଯୁକ୍ତଙ୍କୁ ୨୫ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହ ତାଙ୍କୁ ୬୦ ହଜାର ଟଙ୍କା ଜରିମାନା କରାଯାଇଛି। ଏହା ଅନାଦାୟ ଅଧିକ ୭ ମାସ ଜେଲ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ହେଲେ ଖଜୁରୀପଡା ଥାନା ଅଞ୍ଚଳର ହେମନ୍ତ ମଲ୍ଲିକ ଓରଫ ପବନ (୨୧)।
ଅନୁସାରେ, ୨୦୨୨ ଜୁନ ୯ରେ ଖଜୁରିପଡା ଥାନା ଅଞ୍ଚଳର ଏକ ଗ୍ରାମରେ ପର୍ବତ ପୂଜା ଉପଲକ୍ଷେ ଭୋଜି ହେଉଥିଲା। ଭୋଜି ଖାଇବା ପାଇଁ ସମ୍ପୃକ୍ତ ୪ ବର୍ଷର ଶିଶୁ କନ୍ୟା ନିଜ ସାଙ୍ଗ ସହିତ ସେଠାକୁ ଯାଇଥିଲେ। ଖାଇସାରିବା ପରେ ନିଜ ଘରକୁ ଆସିବା ପାଇଁ ଗ୍ରାମର ସମ୍ପର୍କୀୟ ଦାଦା ହେମନ୍ତଙ୍କୁ ଛାଡ଼ିଦେବା ପାଇଁ କହିଥିଲେ। ହେମନ୍ତ ଘରେ ଛାଡ଼ି ଦେବି କହି ସମ୍ପୃକ୍ତ ଶିଶୁକୁ ଜବରଦସ୍ତ ଏକ ବିଲମାଳକୁ ନେଇ ବଳାତ୍କାର କରିଥିଲେ।
ବହୁ ସମୟ ପର୍ଯ୍ୟନ୍ତ ଶିଶୁ କନ୍ୟା ଘରକୁ ନ ଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ। ଦୀର୍ଘ ସମୟ ପରେ ଘର ପାଖରେ ଥିବା ଏକ ପଣଷ ଗଛ ନିକଟରୁ ପୀଡ଼ିତାଙ୍କ ମା’ ଝିଅକୁ ଉଦ୍ଧାର କରିଥିଲେ। ସେହି ସମୟରେ ଝିଅ ଭୟଭୀତ ହୋଇପଡ଼ିଥିଲେ। ୧୨ ତାରିଖରେ ପିଲାଟି ଘରେ ଗାଧୋଇବା ସମୟରେ ମା’ ତାଙ୍କୁ ସେଦିନର କଥା ପଚାରିଥିଲେ। ଝିଅ ସମସ୍ତ ଘଟଣା ବିଷୟରେ ମା’ଙ୍କୁ କହିଥିଲେ। ଏହି କଥା କାହାରିକୁ କହିଲେ ତଣ୍ଟି ଚିପି ମାରିଦେବାକୁ ଅଭିଯୁକ୍ତ ଧମକ ଦେଇଥିବା କଥା ମଧ୍ୟ କହିଥିଲେ। ଏ ନେଇ ଝିଅର ମା’ ଖଜୁରିପଡ଼ା ଥାନାରେ ଏତଲା ଦେଇଥିଲେ। ପୋଲିସ ୭୪ା୨୨ରେ ଏକ ମାମଲା ରୁଜୁ କରି ହେମନ୍ତଙ୍କୁ ଗିରଫ କରିଥିଲା। ଉପଯୁକ୍ତ ସାକ୍ଷ୍ୟ ପ୍ରମାଣ ଏବଂ ଡ଼ାକ୍ତରୀ ରିପୋର୍ଟକୁ ଆଧାର କରି ବିଚାରପତି ଉପରୋକ୍ତ ଦଣ୍ଡାଦେଶ ଦେଇଛନ୍ତି। ସେହିପରି ପୀଡ଼ିତାଙ୍କୁ ୭ ଲକ୍ଷ ଟଙ୍କା କ୍ଷତିପୂରଣ ଦେବାକୁ ମଧ୍ୟ ଜିଲା ଆଇନ ସେବା ପ୍ରାଧୀକରଣଙ୍କୁ ନିର୍ଦ୍ଦେଶ ଦେଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପି.ପି ଅସୀମ ପ୍ରହରାଜ ମାମଲା ପରିଚାଳନା କରୁଥିଲେ।