ଜଟଣୀ,୨୫ା୮(ଡି.ଏନ୍.ଏ.): ଶିକ୍ଷାର ବିକାଶ ସହ ବିଦ୍ୟାଳୟର ଭିତ୍ତିଭୂମି ସୁଦୃଢ଼ ଉପରେ ସରକାର ଗୁରୁତ୍ୱ ଦେଉଛନ୍ତି। ତେବେ ଜଟଣୀ ପୌରାଞ୍ଚଳ ଅଧୀନ କୁଦିଆରୀ ଦଶଦୋଳ ମେଳଣ ପଡ଼ିଆ ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ନିର୍ମାଣ ହେଉଥିବା ଅଙ୍ଗନଓ୍ବାଡି କେନ୍ଦ୍ରକୁ ୪ ବର୍ଷ ବିତିଥିଲେ ମଧ୍ୟ କାର୍ଯ୍ୟ ସରୁନାହିଁ। ଫଳରେ ୪୦ ଛାତ୍ରୀଛାତ୍ର ଉକ୍ତ ବିଦ୍ୟାଳୟ ବାରଣ୍ଡାରେ ପାଠ ପଢୁଛନ୍ତି। ଅନ୍ୟପକ୍ଷେ ଅର୍ଦ୍ଧନିର୍ମିତ ଏହି ଅଙ୍ଗନଓ୍ବାଡ଼ି କେନ୍ଦ୍ର ଅସାମାଜିକଙ୍କ ଆଡ୍ଡାସ୍ଥଳ ପାଲଟିଛି, ଯାହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସୂଚନା ମୁତାବକ, କୁଦିଆରୀ ଦଶଦୋଳ ମେଳଣ ପଡିଆ ସରକାରୀ ପ୍ରାଥମିକ ବିଦ୍ୟାଳୟ ପରିସରରେ ୨୦୧୭-୧୮ ମସିହାରେ ୭ ଲକ୍ଷ ବ୍ୟୟ ଅଟକଳରେ ଅଙ୍ଗନଓ୍ବାଡି କେନ୍ଦ୍ର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଉକ୍ତ କେନ୍ଦ୍ରର ଛାତ ପଡ଼ିଥିବା ବେଳେ ଅଦ୍ୟାବଧି ନିର୍ମାଣ ସମ୍ପୂର୍ଣ୍ଣ ହୋଇପାରିନାହିଁ। ଫଳରେ ୪୦ ଜଣ ପିଲା ଉକ୍ତ ବିଦ୍ୟାଳୟ ବାରଣ୍ଡାରେ ବସି ପଢ଼ୁଛନ୍ତି। ଅର୍ଦ୍ଧନିର୍ମିତ ଏହି ଅଙ୍ଗନଓ୍ବାଡି କେନ୍ଦ୍ର ଅସାମାଜିକଙ୍କ ଆଡ୍ଡାସ୍ଥଳ ପାଲଟିଛି। ତେବେ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ କରିବା ନିମନ୍ତେ ସ୍ଥାନୀୟ ଗ୍ରାମବାସୀଙ୍କ ସହିତ ପୂର୍ବତନ କାଉନସିଲର ଲୁସେନ କୁମାର ରାୟ ବାରମ୍ବାର ସିଡିପିଓ ଏବଂ ବିଡିଓଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳିଲା ନାହିଁ। ଅନ୍ୟପକ୍ଷରେ ଏ ସମ୍ପର୍କରେ ବିଡିଓ ସରୋଜ କୁମାର ରାଉତ କୁହନ୍ତି, ଦୁଇ ବର୍ଷ କରୋନା ପାଇଁ କାର୍ଯ୍ୟରେ ବ୍ୟତିକ୍ରମ ହୋଇଥିଲା। ଏକ ମାସ ମଧ୍ୟରେ ଏହି ନିର୍ମାଣ କାର୍ଯ୍ୟ ସରିବା ସହିତ ପିଲାମାନେ ଏଠାରେ ପାଠ ପଢ଼ିବେ ବୋଲି ସେ କହିଛନ୍ତି।
