ନୂଆଦିଲ୍ଲୀ, ୨୧ା୭: ଦେଶରେ ୬ ବର୍ଷ ଊର୍ଦ୍ଧ୍ୱ ବୟସ ବର୍ଗରେ ଥିବା ଲୋକସଂଖ୍ୟାର ଦୁଇ-ତୃତୀୟାଂଶ କୋଭିଡ୍-୧୯ରେ ସଂକ୍ରମିତ ହୋଇଛନ୍ତି। ଏହାର ଅର୍ଥ ପ୍ରାୟ ୪୦ କୋଟି ଲୋକଙ୍କ ଉପରେ ଏବେ ମଧ୍ୟ କରୋନାରେ ସଂକ୍ରମଣ ବିପଦ ରହିଥିବା ଚତୁର୍ଥ ଜାତୀୟ ସେରୋ ସର୍ଭେରୁ ଜଣାପଡ଼ିଛି ବୋଲି କେନ୍ଦ୍ର ସରକାର ମଙ୍ଗଳବାର ସୂଚନା ଦେଇଛନ୍ତି। ତେଣୁ ସଭିଏଁ କୋଭିଡ୍ ଟିକା ନେବା ସହ କଟକଣା ମାନି ରହିବା ଜରୁରୀ ବୋଲି ଇଣ୍ଡିଆନ କାଉନ୍ସିଲ ଫର୍ ମେଡିକାଲ ରିସର୍ଚ୍ଚ(ଆଇସିଏମ୍ଆର୍) ମୁଖ୍ୟ ଡା. ବଳରାମ ଭାର୍ଗଭ କହିଛନ୍ତି। ଜୁନ୍-ଜୁଲାଇରେ ୨୧ ରାଜ୍ୟର ୭୦ ଜିଲାରେ ୩୬,୨୨୭ ଜଣଙ୍କୁ ନେଇ ସର୍ଭେ କରାଯାଇଥିଲା। ଏଥିରେ ୭,୨୫୨ ଜଣ ସ୍ବାସ୍ଥ୍ୟକର୍ମୀ ସାମିଲ ହୋଇଥିଲେ। ୬ ବର୍ଷରୁ ଊର୍ଦ୍ଧ୍ୱ ବୟସ ବର୍ଗର ଜନସଂଖ୍ୟା ମଧ୍ୟରୁ ୬୭.୬%ଙ୍କ ଠାରେ ଆଣ୍ଟିବଡି ସୃଷ୍ଟି ହୋଇଥିବା ସର୍ଭେରୁ ଜଣାପଡ଼ିଛି। ୬ରୁ ୧୭ ବର୍ଷ ବୟସ ବର୍ଗରେ ପ୍ରାୟ ୫୦ ପ୍ରତିଶତଙ୍କଠାରେ ଆଣ୍ଟିବଡି ରହିଛି। ୮୫% ସ୍ବାସ୍ଥ୍ୟକର୍ମୀଙ୍କ ଶରୀରରେ ମଧ୍ୟ ଆଣ୍ଟିବଡି ସୃଷ୍ଟି ହୋଇଛି। ପ୍ରାୟ ୧୦% ସ୍ବାସ୍ଥ୍ୟକର୍ମୀ ଟିକା ନେଇ ନ ଥିବା ଜଣାପଡ଼ିଛି।
