ବ୍ରହ୍ମପୁର ଅଫିସ,୨୪ା୧୦: ଗଞ୍ଜାମ ଜିଲା ଦେଇ ବିଭିନ୍ନ ସ୍ଥାନକୁ ଗଞ୍ଜେଇ ଚୋରା ଚାଲାଣ ହେଉଛି। ଗଜପତି ଓ କନ୍ଧମାଳରୁ ବେଆଇନ ଭାବେ ଏହି ଗଞ୍ଜେଇ ଚୋରା ଚାଲାଣ ହୋଇଥାଏ। ଏହି ଗଞ୍ଜେଇ ଚାଲାଣକାରୀଙ୍କୁ ଧରିବା ପାଇଁ ଅବକାରୀ ଗୁଇନ୍ଦା ବିଭାଗ ଜିଲାର ବିଭିନ୍ନ ସ୍ଥାନରେ ଚଢ଼ାଉ କରୁଛି। ଅବକାରୀ ଗୁଇନ୍ଦା ବିଭାଗ (ଦକ୍ଷିଣାଞ୍ଚଳ) ଡେପୁଟି କମିଶନର ଅଶୋକ କୁମାର ଶତପଥୀଙ୍କ ନିର୍ଦ୍ଦେଶରେ ଅବକାରୀ ଗୁଇନ୍ଦା ଟିମ୍ ରବିବାର ବିଳମ୍ବିତ ରାତିରେ ଦୁର୍ଗାପ୍ରସାଦରେ ବ୍ଲକିଂ ଓ ଚେକିଂ କରୁଥିଲା। ସେଠାରୁ ଏକ ଗଞ୍ଜେଇ ଭର୍ତ୍ତି କାର୍ ଜବତ କରିଛି। କାର୍ ଭିତରୁ ଦୁଇଟି ଜରି ବସ୍ତାରେ ରହିଥିବା ୪୦ କେଜି ଗଞ୍ଜେଇ ମଧ୍ୟ ଜବତ କରାଯାଇଛି। ଜଣେ ଚାଲାଣକାରୀଙ୍କ ସମେତ ୩ ଯୁବକଙ୍କୁ ଅବକାରୀ ପୋଲିସ ଗିରଫ କରିଛି। ସେମାନେ ହେଲେ କନ୍ଧମାଳ ଜିଲା ବାଲିଗୁଡ଼ା ଥାନା ଅନ୍ତର୍ଗତ ସୁନାପଙ୍ଗା ଗ୍ରାମର ଦିଲୀପ ଦୀଘାଲ ( ୩୪), ପନାଲ ଦୀଘାଲ (୨୫) ଓ ଆକାଶ ଦୀଘାଲ (୨୭)। ଦିଲୀପ ଗଞ୍ଜେଇ ଚାଲାଣକାରୀ ତଥା ଉକ୍ତ କାର୍ ମାଲିକ ବୋଲି ପୋଲିସ ସ୍ପଷ୍ଟ କରିଛି। ସେ ଉକ୍ତ ଗଞ୍ଜେଇ ବେଆଇନ ଭାବେ ବାଲିଗୁଡ଼ା ଅଞ୍ଚଳରୁ ଆଣି ଦୁର୍ଗାପ୍ରସାଦ ଦେଇ ଭୁବନେଶ୍ୱର ଚାଲାଣ କରିଥାନ୍ତେ ବୋଲି ପୋଲିସ ଜେରା ବେଳେ ଜାଣିବାକୁ ପାଇଛି।
ଏ ସଂକ୍ରାନ୍ତରେ ପୋଲିସ ୭୪୭/୨୨-୩ ରେ ଏକ ମାମଲା ରୁଜୁ କରାଯାଇଛି। ମଙ୍ଗଳବାର ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯିବ ବୋଲି ଶତପଥୀ ସୂଚନା ଦେଇଛନ୍ତି। ଜବତ କାର୍ ଓ ଗଞ୍ଜେଇର ମୂଲ୍ୟ ଆନୁମାନିକ ୧୯ ଲକ୍ଷ ଟଙ୍କା ହେବ ବୋଲି ମଧ୍ୟ ସେ କହିଛନ୍ତି। ଚଢ଼ାଉରେ ଅବକାରୀ ଗୁଇନ୍ଦା ଡେପୁଟି ସୁପରିଟେଣ୍ଡେଣ୍ଟ କୁବେର ସେଠୀ, ଇନ୍ସପେକ୍ଟର ହୃଦୟ ଚନ୍ଦ୍ର ସାମନ୍ତ, ଏସ୍ଆଇ ସୁଦର୍ଶନ ବିଷୋୟୀ, ବ୍ରଜ ବିହାରୀ ନାୟକ ପ୍ରମୁଖ ସାମିଲ ଥିଲେ।
