ଭୁବନେଶ୍ୱର,୧।୧୧: ଚଳିତ ବର୍ଷ ଏପ୍ରିଲ ୭ରୁ ଅକ୍ଟୋବର ୩୧ ପର୍ଯ୍ୟନ୍ତ ସାରା ଦେଶରେ ତୈଳ ଦର ଅପରିବର୍ତ୍ତିିତ ରହିଛି। ତେବେ ଜାତୀୟ ଗଣମାଧ୍ୟମର ସୂଚନା ଅନୁଯାୟୀ ସୋମବାର ମଧ୍ୟରାତ୍ରରୁ ସାରା ଦେଶରେ ତୈଳ ଦର ୪୦ ପଇସା କମିଥିବା ବେଳେ ନୂଆ ଦର ମଙ୍ଗଳବାରଠାରୁ ଲାଗୁ ହେବ ବୋଲି ଜଣାପଡ଼ିଛି। ଗତ କିଛି ଦିନ ହେଲା ଅନ୍ତଃରାଷ୍ଟ୍ରୀୟ ତୈଳ ବଜାରରେ ତେଲ ଦର ହ୍ରାସ ପାଉଥିବାରୁ ତୈଳ ବଜାରରେ ବିକ୍ରି ପରିମାଣ ମଧ୍ୟ ସେହି ଅନୁପାତରେ ବୃଦ୍ଧି ପାଉଛି। ଏହାର ପ୍ରଭାବ ଆମଦାନୀକାରୀ ରାଷ୍ଟ୍ର ଉପରେ ମଧ୍ୟ ପଡ଼ିଥିବା ଦେଖାଦେଇଛି। ଏପରିକି ଭାରତୀୟ ତୈଳ ବଜାରରେ ମଧ୍ୟ ଅନ୍ତଃରାଷ୍ଟ୍ରୀୟ ତୈଳ ମୂଲ୍ୟ ହ୍ରାସର ପ୍ରଭାବ ଦେଖାଦେଇଛି। ଦେଶର ପ୍ରମୁଖ ତୈଳ ବିପଣନ କମ୍ପାନୀଗୁଡ଼ିକର ସୂଚନା ଅନୁଯାୟୀ ସୋମବାର ମଧ୍ୟରାତ୍ରରେ ତୈଳ ଦର ହ୍ରାସ ନେଇ ନିଷ୍ପତ୍ତି ନିଆଯାଇଛି। ଦେଶର ପ୍ରମୁଖ ମେଟ୍ରୋ ସହର ନୂଆଦିଲ୍ଲୀ, ମୁମ୍ବାଇ, ଚେନ୍ନାଇ ଏବଂ କୋଲକାତାରେ ସୋମବାର ପେଟ୍ରୋଲ ଦର ଯଥାକ୍ରମେ ୯୬.୭୨ ଟଙ୍କା, ୧୧୧.୩୫ ଟଙ୍କା, ୧୦୨.୬୩ ଟଙ୍କା ଏବଂ ୧୦୬.୦୩ ଟଙ୍କା ରହିଥିଲା। ସେହିଭଳି ଉପରୋକ୍ତ ସହରଗୁଡିକରେ ଡିଜେଲ ଦର ମଧ୍ୟ ଯଥାକ୍ରମେ ୮୯.୬୨ ଟଙ୍କା, ୯୭.୨୮ ଟଙ୍କା, ୯୪.୨୪ ଟଙ୍କା ଏବଂ ୯୨.୭୬ ଟଙ୍କା ରହିଥିଲା। ସେହିପରି ଭୁବନେଶ୍ୱରରେ ମଧ୍ୟ ସୋମବାର ପେଟ୍ରୋଲ ଲିଟର ପିଛା ୧୦୩.୧୯ ଟଙ୍କା ଏବଂ ଡିଜେଲ ମୂଲ୍ୟ ୯୪.୭୬ ଟଙ୍କାରେ ବିକ୍ରି ହେଉଛି ବୋଲି ସୂଚନା ମିଳିଛି। ଉଲ୍ଲେଖଯୋଗ୍ୟ ଯେ ଦେଶର ପ୍ରମୁଖ ତୈଳ କମ୍ପାନୀଗୁଡିକ ପକ୍ଷରୁ ପ୍ରତ୍ୟେକ ଦିନ ସକାଳ ୬ଟାରେ ପେଟ୍ରୋଲ ଓ ଡିଜେଲ ନୂଆ ଦର ପ୍ରକାଶ କରିଥାନ୍ତି।
