ରାଉରକେଲା ଅଫିସ,୨୫।୧୨: ସୁନ୍ଦରଗଡ଼ ଜିଲା ବିଶ୍ରା ଅଞ୍ଚଳରୁ ରାଉରକେଲାକୁ ୨ଟି ଅଟୋରେ ଗୋମାଂସ ଚାଲାଣ ହେଉଥିବା ବେଳେ ବଜରଙ୍ଗ ଦଳ ଏହାକୁ ଜବତ କରି ପୋଲିସକୁ ହସ୍ତାନ୍ତର କରିଛି। ଏହି ଘଟଣାରେ ବନ୍ଧମୁଣ୍ଡା ପୋଲିସ ୩ ଜଣଙ୍କୁ ଅଟକ ରଖିଛି।
ମିଳିଥିବା ସୂଚନା ମୁତାବକ, ବିଶ୍ରା ଥାନା ଅଧୀନ ଗୁଡଗୁଡଜୋର ଅଞ୍ଚଳରୁ ଦୁଇଟି ଅଟୋରେ ବିପୁଳ ପରିମାଣର ଗୋମାଂସ ରାଉରକେଲା ନାଲାରୋଡ ଅଞ୍ଚଳକୁ ଚାଲାଣ ହେଉଥିଲା। ଏନେଇ କୌଣସି ସୂତ୍ରରୁ ଖବର ପାଇ ବଜରଙ୍ଗ ଦଳ କର୍ମୀମାନେ ବନ୍ଧମୁଣ୍ଡା ସି’ ସେକ୍ଟର ଛକରେ ଅଟୋ ଦ୍ୱୟକୁ ଅଟକାଇଥିଲେ। ଯାଞ୍ଚ ବେଳେ ଅଟୋରୁ ଦୁଇଟି ଅଖାରେ ୪୦୦ କେଜି ଗୋମାଂସ ଥିବା ଜଣାପଡିଥିଲା। ଏନେଇ ପୋଲିସ ଘଟଣାର ତଦନ୍ତ ଚଳାଇଛି।
