ପୁରୁଷୋତ୍ତମପୁର,୨୦।୧(ଡି.ଏନ.ଏ.): ବାବୁ ଆମକୁ ରକ୍ଷା କର। ଠେଲାଦୋକାନ ଭାଙ୍ଗିଦେଲେ ଏବେ ଘରବି ଭାଙ୍ଗିଦେବେ। ଆମେ ଯିବୁ କୁଆଡେ ବୋଲି ଭାଜପା ନେତାଙ୍କ ଆଗରେ ଏକ ଗରିବ ପରିବାର କାନ୍ଦି ଗୁହାରି କରିଛନ୍ତି। ଏନ୍ଏସି ନିର୍ବାହୀ ଅଧିକାରୀଙ୍କ ନିର୍ଦ୍ଦେଶକ୍ରମେ ବୁଧବାର ରାତିରେ ପ୍ରଶନ କୁମାର ଶତପଥୀ ଏବଂ ପୁଅ ସନ୍ତୋଷ ଶତପଥୀ କରିଥିବା ଉଠା ଠେଲାଗାଡିକୁ ଭାଙ୍ଗି ଦିଆଯାଇଛି ବୋଲି ଅଭିଯୋଗ ହୋଇଛି। ଏଥିସହ ଘରକୁ ଆସି ଜେସିବି ଲଗାଇ ପ୍ରଧାନମନ୍ତ୍ରୀ ଆବାସ ଯୋଜନାରେ ପାଇଥିବା ଘରକୁ ଭାଙ୍ଗି ଦେବାକୁ ବୃଦ୍ଧା ସ୍ତ୍ରୀ ସୁପ୍ରଭାଙ୍କୁ ଧମକ ଦିଆଯାଇଛି। ଏପରିକି ତିନିଦିନ ମଧ୍ୟରେ ଘରର ଏଷ୍ଟିମେଣ୍ଟ ଦାଖଲ ନ କଲେ ଘରଭାଙ୍ଗି ଦେବାକୁ କହି ଏକ ନୋଟିସ୍ କାନ୍ଥରେ ମାରିଥିବା ଅଭିଯୋଗ ହୋଇଛି। ଏହାକୁ ନେଇ ତିନିଦିନ ହେଲା ପରିବାର ବେସାହାରା ହୋଇପଡିଛନ୍ତି। ଏହି ଖବରପାଇ ଶୁକ୍ରବାର ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ଅରୁଣ କୁମାର ପଣ୍ଡା ଓ ଯୁବ ନେତା ଚିତ୍ତରଞ୍ଜନ ସାହୁ ପରିବାରକୁ ଭେଟି ସାନ୍ତ୍ବନା ଦେଇଛନ୍ତି। ଘଟଣା ସମ୍ପର୍କରେ ଭାଜପା ନେତା ଜିଲାପାଳ, ୫ଟି ସଚିବ ଓ ବିଭାଗୀୟ ଅଧିକାରୀଙ୍କୁ ଜଣାଇବେ ବୋଲି ପରିବାର ଲୋକଙ୍କୁ ପ୍ରତିଶ୍ରୁତି ଦେଇଛନ୍ତି।
