ନୂଆଦିଲ୍ଲୀ,୨୨ା୭: ବାଲେଶ୍ୱର ଜିଲାର ବାହାନଗା ବଜାର ଷ୍ଟେଶନ ନିକଟରେ ଗତ ଜୁନ୍ ୨ରେ ଘଟିଥିବା ଟ୍ରେନ୍ ଦୁର୍ଘଟଣାର ମୃତକଙ୍କ ମଧ୍ୟରୁ ଏପର୍ଯ୍ୟନ୍ତ ୪୧ ମୃତଦେହ ଚିହ୍ନଟ ହୋଇ ନ ଥିବା ଶୁକ୍ରବାର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ପାର୍ଲାମେଣ୍ଟକୁ ସୂଚନା ଦେଇଛନ୍ତି। ରାଜ୍ୟ ସଭାରେ ଏ ସମ୍ପର୍କିତ ଏକ ପ୍ରଶ୍ନର ଉତ୍ତରରେ ରେଳମନ୍ତ୍ରୀ କହିଥିଲେ, ବାହାନଗା ଟ୍ରେନ୍ ଦୁର୍ଘଟଣାରେ ୨୯୫ ଯାତ୍ରୀଙ୍କ ମୃତ୍ୟୁ ଘଟିଥିଲା ଓ ୧୭୬ ଜଣ ଗୁରୁତର ଆହତ ହୋଇଥିଲେ। ବର୍ତ୍ତମାନ ସୁଦ୍ଧା ୨୫୪ ମୃତଦେହ ଚିହ୍ନଟ ହୋଇ ସେମାନଙ୍କ ନିକଟ ସମ୍ପର୍କୀୟଙ୍କୁ ହସ୍ତାନ୍ତର କରାଯାଇଥିବାବେଳେ ୪୧ ମୃତଦେହ ଚିହ୍ନଟ ହୋଇପାରି ନାହିଁ। ବାହାନଗା ଷ୍ଟେଶନର ଉତ୍ତର ସିଗ୍ନାଲ ଗୁମ୍ଟିରେ ସିଗ୍ନାଲ ସର୍କିଟ୍ ପରିବର୍ତ୍ତନରେ ତ୍ରୁଟି ଥିଲା। ଏଥିସହ ସିଗ୍ନାଲ କାମ ବେଳେ ଷ୍ଟେଶନର ଲେବଲ କ୍ରସିଂ ଗେଟ୍ ନଂ ୯୪ ପାଇଁ ଇଲେକ୍ଟ୍ରିକ୍ ଲିଫ୍ଟିଂ ବାରିୟର ବଦଳାଯାଇଥିଲା। ଏହିସବୁ ତ୍ରୁଟି ପାଇଁ ଟ୍ରେନ୍ ନଂ ୧୨୮୪୧କୁ ଭୁଲ୍ ସିଗ୍ନାଲ ଯାଇଥିଲା। ଷ୍ଟେଶନର ଅପ୍ ମେନ୍ ଲାଇନରେ ଟ୍ରେନ୍ ଗଡ଼ିବା ପାଇଁ ଅପ୍ ହୋମ୍ ସିଗ୍ନାଲ ଦିଆଯାଇଥିଲା। କିନ୍ତୁ ଅପ୍ ମେନ୍ ଲାଇନ ସହ ଅପ୍ ଲୁପ୍ ଲାଇନକୁ ସଂଯୋଗ କରୁଥିବା କ୍ରସ୍ଓଭରରେ ଭୁଲ୍ ସିଗ୍ନାଲ ଦିଆଯିବାରୁ ଟ୍ରେନ୍ଟି ଅପ୍ ଲୁପ୍ ଲାଇନକୁ ଚାଲିଯାଇଥିଲା। ଫଳରେ ମାଲ୍ବାହୀ ଟ୍ରେନ୍କୁ ପଛପଟୁ ଧକ୍କା ଦେଇଥିଲା। ଏହି ତ୍ରୁଟି ପାଇଁ ରେଲଓ୍ବେର ୭ ଜଣ ଅଧିକାରୀଙ୍କୁ ନିଲମ୍ବିତ କରାଯିବା ସହ ସେମାନଙ୍କ ବିରୋଧରେ ଶୃଙ୍ଖଳା ତଥା ଅପିଲ ନିୟମାବଳୀ ଅନୁଯାୟୀ ବିଚାର ପ୍ରକ୍ରିୟା ଚାଲିଥିବା ରେଳମନ୍ତ୍ରୀ ଗୃହକୁ ସୂଚନା ଦେଇଛନ୍ତି।