ଜାକର୍ତ୍ତା,୮।୯: ଇଣ୍ଡୋନେସିଆର ବଣ୍ଟେନ ପ୍ରଦେଶର ଏକ ଜେଲରେ ଅଗ୍ନିକାଣ୍ଡ ଘଟି ୪୧ ଡ୍ରଗ୍ସ କଏଦୀଙ୍କର ମୃତ୍ୟୁ ଘଟିଛି ଏବଂ ୩୯ ଜଣ ଆହତ ହୋଇଛନ୍ତି। ଆହତ କଏଦୀଙ୍କୁ ଉଦ୍ଧାର କରି ଚିକିତ୍ସା ଲାଗି ହସ୍ପିଟାଲରେ ଭର୍ତ୍ତି କରାଯାଇଛି। ଜେଲ ବିଭାଗ, ଆଇନ ଏବଂ ମାନବ ଅଧିକାର ମନ୍ତ୍ରଣାଳୟର ମୁଖପାତ୍ର ରିକା ଅପ୍ରିନ୍ତି ଏ ସମ୍ପର୍କରେ ସୂଚନା ଦେଇଛନ୍ତି।
ଅଗ୍ନିକାଣ୍ଡର କାରଣ ନେଇ ଅନୁସନ୍ଧାନ କରାଯାଉଛି ବୋଲି ସେ କହିଛନ୍ତି। ମଙ୍ଗଳବାର-ବୁଧବାର ବିଳମ୍ବିତ ରାତ୍ର ଗୋଟାଏରୁ ୨ଟା ମଧ୍ୟରେ ଅଗ୍ନିକାଣ୍ଡ ଘଟିଥିବା ସେ କହିଛନ୍ତି। ଘଣ୍ଟା ପରେ ନିଆଁକୁ ଆୟତ୍ତ କରାଯାଇଥିଲା ଏବଂ ସମସ୍ତ ଆହତଙ୍କୁ ଡାକ୍ତରଖାନା ନିଆଯାଇଥିଲା ବୋଲି ସେ ପ୍ରକାଶ କରିିଛନ୍ତି।
ଜାକର୍ତ୍ତା ଉପକଣ୍ଠରେ ଥିବା ତାଙ୍ଗେରଙ୍ଗ ଜେଲର ବ୍ଲକ-ସିରେ ଏଭଳି ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡ ସମୟରେ ବ୍ଲକ-ସି ୧୨୨ ଦଣ୍ଡାଦେଶ ହୋଇଥିବା କଏଦୀ ଥିଲେ।
ତାଙ୍ଗେରଙ୍ଗ ଜେଲକୁ ନିୟନ୍ତ୍ରଣ କରିବା ପାଇଁ ଶହେରୁ ଅଧିକ ପୋଲିସ ଏବଂ ସୈନିକଙ୍କୁ ନିୟୋଜିତ ହୋଇଛନ୍ତି। ଏହି କାରାଗାରରେ ୧,୨୨୫ କଏଦୀଙ୍କ ରହିବା ପାଇଁ ବ୍ୟବସ୍ଥା କରାଯାଇଥିଲା। ମାତ୍ର ଏବେ ଏଠାରେ ୨,୦୦୦ରୁ ଅଧିକ କଏଦୀ ରହିଛନ୍ତି।
ସୂଚନାଯୋଗ୍ୟ, ଇଣ୍ଡୋନେସିଆରେ ଜେଲ ଭାଙ୍ଗିବା ଏବଂ ଦଙ୍ଗା ଯୋଗୁଁ ଅଗ୍ନିକାଣ୍ଡ ଘଟିବା ସାଧାରଣ ଘଟଣା। ଏଠାରେ ଥିବା ଜେଲଗୁଡିକରେ ଅତ୍ୟଧିକ ଭିଡ଼ ଏକ ସମସ୍ୟା ପାଲଟିଛି। ଆବଶ୍ୟକ ବିକାଶ ପାଣ୍ଠି ଅଭାବରୁ ଜେଲଗୁଡିକର ଅବସ୍ଥା ଖରାପ ହେବାରେ ଲାଗିଛି। ବେଆଇନ ଡ୍ରଗ କାରବାର ଅଭିଯୋଗ ଏଠାରେ ବହୁ ସଂଖ୍ୟକ ଲୋକଙ୍କୁ ଗିରଫ କରାଯାଇଥାଏ।