ଅମ୍ବାଭୋନା,୯।୧୦(ଡି.ଏନ.ଏ): ବରଗଡ଼ ଜିଲା ଅମ୍ବାଭୋନା ବ୍ଲକ ଅନ୍ତର୍ଗତ କୁରୁମକେଲ ଗ୍ରାମରେ ବନ୍ୟପ୍ରାଣୀ ସଂରକ୍ଷଣ ପାଇଁ କେନ୍ଦ୍ର ସରକାରଙ୍କ ପୁନର୍ବାସ ଯୋଜନା ଅନୁଯାୟୀ ଶୁକ୍ରବାର ଜନ ଶୁଣାଣି ଶିବିର ଅନୁଷ୍ଠିତ ହୋଇଛି। ହୀରାକୁଦ ବନ୍ୟପ୍ରାଣୀ ସଂରକ୍ଷଣ ଡିଏଫ୍ଓ ଅଂଶୁପ୍ରଭା ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶିବିରରେ ହୀରାକୁଦ ଜଳଭଣ୍ଡାର ଅବବାହିକାରେ ଥିବା ରେଙ୍ଗାଲି, ଭୁଥୁଲି, କୁରୁମକେଲ, ବାଲିଯୋରି ଗ୍ରାମର ବିସ୍ଥାପନ ପାଇଁ ଶୁଣାଣି କରାଯାଇଥିଲା। ଶିବିରରେ ଅମ୍ବାଭୋନା ତହସିଲଦାର ସୀତାରାମ ଭୋଇ, ବିଡ଼ିଓ ଆଲଫ୍ରାନ୍ସ ବିଲୁଙ୍ଗ, ହୀରାକୁଦ ବନ୍ୟପ୍ରାଣୀ ସଂରକ୍ଷଣ ଅଧିକାରୀ ଦାଶ, ଅତିରିକ୍ତ ଜିଲାପାଳ ନବୀନ କୁମାର ପଟେଲ, ଉପଜିଲାପାଳ ଶୁଭେନ୍ଦ୍ର କୁମାର ସାମଲ, ଅମ୍ବାଭୋନା ପ୍ରାଣୀଧନ ଅଧିକାରୀ ଶ୍ରୀକାନ୍ତ ପରିଡ଼ା, ରେଞ୍ଜ ଅଧିକାରୀ ଦିଲୀପ କୁମାର ଧଳ, ପୂର୍ବତନ ସରପଞ୍ଚ ହୀରାଧର ସାହୁ, ଲଖନପୁର ସରପଞ୍ଚ ସତ୍ୟଭୂଷଣ ସାହୁ ପ୍ରମୁଖ ଯୋଗଦେଇ ସରକାରଙ୍କ ବିସ୍ଥାପନ, ପୁନର୍ବାସ ଯୋଜନା ସମ୍ପର୍କରେ ଉପସ୍ଥିତ ଲୋକଙ୍କୁ ବୁଝାଇଥିଲେ। ଏହା ଅନ୍ତିମ ଜନଶୁଣାଣି ହୋଇଥିବାରୁ ନିକଟ ଭବିଷ୍ୟତରେ ଉପରୋକ୍ତ ଗ୍ରାମବାସୀ ଭିଟାମାଟି ଛାଡ଼ିବେ ଏବଂ ଅମ୍ବାଭୋନା ବ୍ଲକ ମାନଚିତ୍ରରୁ ଏହି ଗ୍ରାମ ଗୁଡ଼ିକ ଲିଭିଯିବା ସ୍ପଷ୍ଟ ହୋଇଯାଇଛି।
ହୀରାକୁଦ ନଦୀବନ୍ଧ ଯୋଜନା ଆରମ୍ଭ ହେବା ପରେ ଉପରୋକ୍ତ ଗ୍ରାମବାସୀ ବିସ୍ଥାପିତ ହୋଇ ବାରପାହାଡ଼ ଜଙ୍ଗଲ ନିକଟରେ ଏହି ଗ୍ରାମ ଗୁଡ଼ିକରେ ବସତି ସ୍ଥାପନ କରିଥିଲେ । ତେବେ କେନ୍ଦ୍ର ସରକାରଙ୍କ ବ୍ୟାଘ୍ର ସଂରକ୍ଷଣ ପାଇଁ ଉକ୍ତ ସ୍ଥାନ ଚିହ୍ନଟ ହେବା ପରେ ପୁଣି ସେମାନଙ୍କୁ ବିସ୍ଥାପିତ ହେବାକୁ ପଡୁଛି। ଉପରୋକ୍ତ ଗ୍ରାମର ୪୧୦ ପରିବାର ବିସ୍ଥାପିତ ହେବେ ବୋଲି ସୂଚନା ମିଳିଛି। ପୁନର୍ବାସ ଯୋଜନା ଅନୁଯାୟୀ ପ୍ରତି ପରିବାରକୁ ୧୫ଲକ୍ଷ ଟଙ୍କାର ଆର୍ଥିକ ସହାୟତା ସାଙ୍ଗକୁ ଶିକ୍ଷା, ସ୍ବାସ୍ଥ୍ୟ, ଗମନାଗମନ, ପାନୀୟଜଳ ଆଦି ମୌଳିକ ସୁବିଧା ସୁଯୋଗ ଯୋଗାଇ ଦେବାକୁ ଅଧିକାରୀମାନେ ପ୍ରତିଶ୍ରୁତି ଦେଇଥିଲେ।