ନୂଆଦିଲ୍ଲୀ,୧୪ା୧୦: ଚର୍ମ ରୋଗ ଥିବା ୪୨ ପ୍ରତିଶତ ରୋଗୀ ନିଦ୍ରାଜନିତ ସମସ୍ୟାର ସମ୍ମୁଖୀନ ହୋଇଥାନ୍ତି। ଚର୍ମ ରୋଗର ପ୍ରଭାବ ଆକଳନ କରିବା ଲାଗି ୧୦ ଦେଶର ୫୦ ହଜାରରୁ ଊର୍ଦ୍ଧ୍ୱ ଲୋକଙ୍କ ଉପରେ କରାଯାଇଥିବା ଅଧ୍ୟୟନରୁ ଏହା ଜଣାପଡ଼ିଛି। ଜର୍ମାନୀର ବର୍ଲିନରେ ଆୟୋଜିତ ୟୁରୋପିଆନ୍ ଏକାଡେମୀ ଅଫ୍ ଡର୍ମାଟୋଲୋଜି ଆଣ୍ଡ ଭେନେରୋଲୋଜି (ଇଏଡିଭି) କଂଗ୍ରେସ, ୨୦୨୩ରେ ଉକ୍ତ ଅଧ୍ୟୟନକୁ ଉପସ୍ଥାପନ କରାଯାଇଛି। ନିଦ୍ରାହୀନତା ରୋଗୀର ଜୀବନ ଧାରଣ ମାନରେ ଗୁରୁତର ପ୍ରଭାବ ପକାଇଥାଏ ବୋଲି ଉକ୍ତ ସର୍ଭେରୁ ଜଣାପଡ଼ିଛି। ଅଧ୍ୟୟନ ଅନୁଯାୟୀ ଚର୍ମ ରୋଗ ଥିବା ୪୯ ପ୍ରତିଶତ ରୋଗୀଙ୍କ କାର୍ଯ୍ୟ ଦକ୍ଷତା ହ୍ରାସ ପାଇଥାଏ। ସର୍ଭେରେ ଅଂଶଗ୍ରହଣ କରିଥିବା ୧୯ ପ୍ରତିଶତ ରୋଗୀଙ୍କର ଚର୍ମରୋଗ ନ ଥିଲା। ଚର୍ମରୋଗ ଥିବା ରୋଗୀଙ୍କ ନିଦ୍ରା ପ୍ରଭାବିତ ହେବାର ମୁଖ୍ୟ ଲକ୍ଷଣ ହେଲା କୁଣ୍ଡେଇ ହେବା (ଯାହା ୬୦ ପ୍ରତିଶତ କ୍ଷେତ୍ରରେ ଦେଖାଦେଇଥାଏ) ଏବଂ ପୋଡ଼ାଜଳା ବା ଛୁଞ୍ଚତ୍ ଫୋଡିବା ଭଳି ଲାଗିବା (୧୭ ପ୍ରତିଶତଙ୍କ କ୍ଷେତ୍ରରେ ଦେଖାଦେଇଥାଏ)। ଏହା ବ୍ୟତୀତ ରୋଗୀ ନିଦରୁ ଉଠିବା ପରେ ବାରମ୍ବାର ଥକାପଣ ଅନୁଭବ କରିଥାନ୍ତି। ଚର୍ମରୋଗୀଙ୍କ କ୍ଷେତ୍ରରେ ଏହା ୮୧ ପ୍ରତିଶତ ହୋଇଥିବାବେଳେ ଅଣଚର୍ମରୋଗୀଙ୍କ କ୍ଷେତ୍ରରେ ୬୪ ପ୍ରତିଶତ ହୋଇଥାଏ। ସେହିପରି ଆଖିରେ କୁଞ୍ଚତ୍ହେବା ଭଳି ଲାଗିବା ଯଥାକ୍ରମେ ୫୮ ଏବଂ ୪୨ ପ୍ରତିଶତଙ୍କ କ୍ଷେତ୍ରରେ ଦେଖାଯାଉଥିବାବେଳେ ବାରମ୍ବାର ହାଇମାରିବା ଯଥାକ୍ରମେ ୭୨ ଏବଂ ୫୮ ପ୍ରତିଶତ ଦେଖାଦେଇଥାଏ।
ଚର୍ମ ରୋଗ ଥିବା ରୋଗୀମାନଙ୍କ ଶାରୀରିକ କ୍ରିୟା ଉପରେ ନିଦ୍ରାହୀନତା କିପରି ପ୍ରଭାବ ପକାଇଥାଏ, ଉକ୍ତ ଅଧ୍ୟୟନରୁ ତାହା ପ୍ରଥମ ଥର ଜଣାପଡ଼ିଛି। ରୋଗ ତୁରନ୍ତ ଚିହ୍ନଟ କରି ନିଦ୍ରା ସମସ୍ୟାର ପ୍ରଭାବୀ ପରିଚାଳନା ଜରୁରୀ ବୋଲି ପ୍ୟାରିସ୍ର ଇଏମ୍ଏମ୍ଏ କ୍ଲିନିକ୍ ମୁଖ୍ୟ ଡ. ଚାର୍ଲସ ତାଇଏବ୍ କହିଛନ୍ତି।