ନୂଆଦିଲ୍ଲୀ,୨୪।୬ : ଗୋ ଫାଷ୍ଟର ସମାଧାନ ପ୍ରଫେସନାଲ ଶୈଲେନ୍ଦ୍ର ଅଜମେରା ଏକ ପୁନଃଉଦ୍ଧାର ଯୋଜନାକୁ କାର୍ଯ୍ୟକାରୀ କରିବା ଏବଂ ବିମାନ ଚଳାଚଳ କାର୍ଯ୍ୟରେ ସାହାଯ୍ୟ କରିବା ପାଇଁ ଏୟାରଲାଇନ୍ସ ଫାଇନାନ୍ସରଙ୍କ ଠାରୁ ୪୨୫ କୋଟି ଟଙ୍କା ମାଗିଛନ୍ତି। ଗୋଏଲଷ୍ଟର ଦେବାଳିଆ ମାମଲାରେ ଶୈଲେନ୍ଦ୍ର ଅଜମେରାଙ୍କୁ ସମାଧାନ ପ୍ରଫେସନାଲ (ଆରପି) ଭାବରେ ନିଯୁକ୍ତ କରାଯାଇଛି। ସଙ୍କଟ ପ୍ରଭାବିତ ବିମାନର ଋଣଦାତା କମିଟି (କୋସି) ଏହି ନିଷ୍ପତ୍ତି ନେଇଛି।
ଭବିଷ୍ୟତରେ ବିମାନ ପାଇଁ ଫିଟ ଇଞ୍ଜିନ ଉପଲବ୍ଧତା ଏବଂ ଟିକେଟ ବାତିଲ ଭଳି କିଛି ପରିସ୍ଥିତି ଉପରେ ନିର୍ଭର କରି ଅର୍ଥର ଆବଶ୍ୟକତା ଆହୁରି ବଢ଼ିପାରେ ବୋଲି ସୂତ୍ରରୁ ପ୍ରକାଶ। ସୂଚନା ମୁତାବକ, ଆର୍ଥିକ ସମ୍ପର୍କିତ ଏହି ପ୍ରସ୍ତାବକୁ ଏହି ସପ୍ତାହ ଆରମ୍ଭରେ ଅନୁଷ୍ଠିତ ଏକ ବୈଠକରେ ଗୋ ଫାଷ୍ଟର ଋଣଦାତା କମିଟି ସମ୍ମୁଖରେ ରଖାଯାଇଥିଲା।
ଗୋ ଫାଷ୍ଟର ଋଣଦାତା କମିଟିରେ ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ, ବ୍ୟାଙ୍କ ଅଫ ବରୋଦା, ଆଇଡିବିଆଇ ବ୍ୟାଙ୍କ ଏବଂ ଡଏଚ ବ୍ୟାଙ୍କ ଅନ୍ତର୍ଭୁକ୍ତ। ଋଣଦାତା କମିଟି ଦ୍ୱାରା ସମର୍ଥିତ ଅଜମେରା ଏପର୍ଯ୍ୟନ୍ତ ଏ ବାବଦରେ କୌଣସି ମନ୍ତବ୍ୟ ଦେଇନାହାଁନ୍ତି। ସେଣ୍ଟ୍ରାଲ ବ୍ୟାଙ୍କ ଅଫ ଇଣ୍ଡିଆ ସମେତ ଅନ୍ୟ ବ୍ୟାଙ୍କଗୁଡିକ ମଧ୍ୟ ଏ ବିଷୟରେ ମନ୍ତବ୍ୟ ଦେଇନାହାଁନ୍ତି।
ବିମାନ ଚଳାଚଳ ଆରମ୍ଭ କରିବା ପାଇଁ ଗୋ ଫାଷ୍ଟ ଦେଶର ବିମାନ ଚଳାଚଳ କ୍ଷେତ୍ର ନିୟାମକ ନିର୍ଦ୍ଦେଶାଳୟ ଜେନେରାଲ ଅଫ ସିଭିଲ ଆଭିଏଶନ (ଡିଜିସିଏ) ରୁ ଏପର୍ଯ୍ୟନ୍ତ ମଞ୍ଜୁରୀ ପାଇନାହିଁ। କିନ୍ତୁ ବିମାନ ସେବା ପାଇଁ ଅର୍ଥର ଉପଲବ୍ଧତା ସୁନିଶ୍ଚିତ କରିବା ପରେ ହିଁ ଅନୁମୋଦନ ଦିଆଯିବ ।
କାର୍ଯ୍ୟ ଆରମ୍ଭ କରିବା ପାଇଁ ନିୟାମକ ସମ୍ମତି ପାଇବା ପୂର୍ବରୁ ଗୋ ଫାଷ୍ଟକୁ ଋଣଦାତାମାନଙ୍କଠାରୁ ଆର୍ଥିକ ପ୍ରସ୍ତାବର ଅନୁମୋଦନ ନେବାକୁ ପଡ଼ିବ। ମିଡିଆ ରିପୋର୍ଟରେ ଦର୍ଶାଯାଇଛି ଏୟାରଲାଇନ୍ସର ଋଣଦାତାମାନେ ଆର୍ଥିକ ସହାୟତା ପାଇଁ ସେମାନଙ୍କର ମୂଳ ଅନୁମୋଦନ ପ୍ରଦାନ କରିଥିବାବେଳେ ମଧ୍ୟବର୍ତ୍ତୀ ଆର୍ଥିକ ପ୍ରସ୍ତାବକୁ ଅନୁମୋଦନ କରିବା ପୂର୍ବରୁ ସେମାନେ ବିମାନ ନିୟାମକଙ୍କଠାରୁ ସ୍ପଷ୍ଟତା ପାଇବାକୁ ଅପେକ୍ଷା କରିଛନ୍ତି।