ନୟାଗଡ଼ ଅଫିସ,୧୩।୧: ନୟାଗଡ଼ ଜିଲାରେ ୪ ହଜାର ୨୮୯ ଚାଷୀଙ୍କ ଟୋକନ ବାତିଲ ହେବା ପରେ ପ୍ରତିବାଦ ବଢ଼ିଥିଲା । ତେବେ ଚାଷୀଙ୍କ ବିରୋଧ ପୂର୍ବରୁ ଜିଲା ପ୍ରଶାସନ ନିଜର ତ୍ରୁଟି ସଂଶୋଧନ କରି ନେଇଛି । ଏବେ ପ୍ରାୟ ୩ ହଜାର ଚାଷୀଙ୍କ ଟୋକନ ଆସିଥିବା ଜଣାପଡିଛି । ଏନେଇ ଗୁରୁବାର ଜିଲାପାଳ ରବୀନ୍ଦ୍ର ନାଥ ସାହୁ ଜିଲାପାଳଙ୍କ ସମ୍ମିଳନୀ କକ୍ଷରେ ଏକ ଖବରଦାତା ସମ୍ମିଳନୀ କରାଇ ପ୍ରଶାସନର ତ୍ରୁଟିକୁ ସ୍ବୀକାର କରିଛନ୍ତି । ଜିଲାପାଳଙ୍କ ସୂଚନା ଅନୁସାରେ ସାଟେଲାଇଟ ସର୍ଭେରେ ଜିଲାର ୪୯ ହଜାର ୪୧୪ ପ୍ଲଟରେ ଧାନ ଚାଷ ହୋଇ ନାହିଁ। ସମ୍ପୃକ୍ତ ଜମି ଚାଷ ହୋଇ ନ ଥାଇପାରେ ଅଥବା ଅନ୍ୟ କୌଣସି ଫସଲ ହୋଇଥାଇପାରେ। ଏପରି ଅଭିଯୋଗ ମିଳିବା ପରେ ଏହାର ଯାଞ୍ଚ କରାଯାଇଥିଲା । ଏଥିରୁ ୪୭ ହଜାର ୫୫୨ ପ୍ଲଟ୍ ଯାଞ୍ଚ ହୋଇ ସାରିଛି। ଅବଶିଷ୍ଟ ୧୮୬୨ ପ୍ଲଟ ଯାଞ୍ଚ ହେବ । ଏଭଳି ସ୍ଥଳେ ଜିଲାର ୪ ହଜାର ୨୮୯ ଚାଷୀଙ୍କର ଟୋକନ ବାତିଲ ହୋଇ ଯାଇଥିଲା । ଜିଲାପାଳ ଉଦାହରଣ ଦେଇ କହିଥିଲେ ରେଣୁ ରାଉତ ନାମକ ଜଣେ ଚାଷୀଙ୍କର ୭୫ କୁଇଣ୍ଟାଲ ଧାନ କିଣିବାକୁ ମେସଜ ଆସିଥିଲା । ଫେବୃୟାରୀ ୫ ଥିଲା ଧାନକିଣାର ଶେଷ ତାରିଖ । ତେବେ ଟୋକନ ବାତିଲ ହୋଇ ଯିବାରୁ ସମସ୍ୟା ଦେଖା ଦେଇଥିଲା । ପ୍ରଶାସନର ତ୍ରୁଟି ଆମେ ଜାଣିବାରୁ ଏହାକୁ ସଂଶୋଧନ କରି ନିଆଯାଇଛି । ରେଣୁ ରାଉତଙ୍କର ଟୋକନରେ ତାରିଖ ଫେବୃୟାରୀ ୧୧ ହୋଇଛି । ଟୋକନ କାମ କରିଛି । ଧାନ ପରିମାଣ ସମାନ ରହିଛି । ସେହିପରି ଅନ୍ୟ ଚାଷୀମାନଙ୍କର ତ୍ରୁଟି ସଂଶୋଧନ ହୋଇଛି ଓ ଚାଲୁ ରହିଛି । ତେବେ ତ୍ରୁଟି ହୋଇ ନ ଥିବା ଚାଷୀଙ୍କ ଏହା ସଂଶୋଧନ ହେବନି ବୋଳି ଜିଲାପାଳ କହିଛନ୍ତି ।
ଅଭାବୀଧାନ ବିକ୍ରି ବଢ଼ିବ: ଅଭାବୀ ଧାନ ବିକ୍ରୀ ରୋକିବାକୁ ପ୍ରଶାସନର ପଦକ୍ଷେପ ନ ଥିବା ଜିଲାପାଳଙ୍କ ସୂଚନା ପରେ ଜଣାପଡିଛି । ଜିଲାପାଳଙ୍କ ସୂଚନା ଅନୁସାରେ ୧ ଏକର ଜଳସେଚିତ ଜମିରୁ ୧୯ କୁଇଣ୍ଟାଲ ଓ ଅଣଜଳସେଚିତ ଜମିରୁ ୧୩ କୁଇଣ୍ଟାଲ ସରକାର ନେଉଛନ୍ତି । ଗୋଟିଏ ଏକରରୁ ୨୦ ରୁ ୨୨ କୁଇଣ୍ଟାଲ ଧାନ ଫଳୁଛି । ସରକାର ଏକର ପିଛା ୧୪ କୁଇଣ୍ଟାଲ ଧାନ କିଣୁଥିବାରୁ ଚାଷୀ ପାଖରେ ଧାନ ବଳକା ରହୁଛି । ଚାଷୀ ବଳକା ଧାନ କାହାକୁ ବିକିବ, ସେ କ’ଣ କରିବ ପ୍ରଶାସନ କିଛି କରି ପାରିବନି । ଏଣୁ ଅଭାବୀ ଧାନ ବିକ୍ରି କହି ଚଢ଼ାଉ କରିବା ଠିକ ହେବନି। ଏ ଦିଗରେ ଚଢ଼ାଉ ପାଇଁ ବ୍ୟବସ୍ଥା ନାହିଁ ବୋଲି ଜିଲାପାଳ କହିଥିଲେ । ଜିଲାପାଳଙ୍କ ସୂଚନା ପରେ ଧାନ ବ୍ୟବସାୟୀ ଓ ମିଲର ମାନେ ସେମାନଙ୍କର ଚୋରା ଲୁଚା ଧାନ କିଣାକୁ ଏବେ ଅବାଧରେ କରିବାକୁ ଯାଉଛନ୍ତି ବୋଲି କିଛି ଚାଷୀ ମନ୍ତବ୍ୟ ଦେଇଛନ୍ତି । ଯାହା ଅଭାବୀ ଧାନ ବିକ୍ରୀକୁ ପ୍ରୋସତ୍ାହନ ଦେବ।
୬ ଲକ୍ଷ କୁଇଣ୍ଟାଲ ଚାଉଳ ଆବଶ୍ୟକ: ନୟାଗଡ଼ ଜିଲାରେ ଖାଦ୍ୟ ସୁରକ୍ଷା ଯୋଜନା ସମେତ ରାଶନ କାର୍ଡରେ ଚାଉଳ ଯୋଗାଣ ପାଇଁ ବର୍ଷକୁ ୬ ଲକ୍ଷ କୁଇଣ୍ଟାଲ ଚାଉଳର ଆବଶ୍ୟକତା ରହିଛି। ଜିଲାରେ ୧୪ ଲକ୍ଷ କୁଇଣ୍ଟାଲ ଚାଉଳ ମିଲରମାନେ ଦେଉଥିବାରୁ ସମ୍ବଲପୁରକୁ ୫ ଲକ୍ଷ କୁଇଣ୍ଟାଲ ଧାନ ଗଲେ କିଛି ସମସ୍ୟା ଦେଖା ଦେବନି । କଟନୀଛଟନୀ ଉପରେ ଜିଲାପାଳ କହିଥିଲେ ଏହା ଠିକ ନୁହେଁ। ଏପରି ନ କରିବାକୁ ନିର୍ଦ୍ଦେଶ ରହିଛି। ଯେଉଁଠି କଟ୍ନୀଛଟନୀ ପ୍ରସଙ୍ଗ ଉଠିବ ସେଠାକୁ ଧାନର ମାନ ପରୀକ୍ଷଣ ପାଇଁ ଟିମ୍ ପଠାଯିବ। ତେବେ କାର୍ଯ୍ୟାନୁଷ୍ଠାନ ନେଇ କିଛି କହି ନ ଥିଲେ । ଅନ୍ୟମାନଙ୍କ ମଧ୍ୟରେ ଉପଜିଲାପାଳ ଶକ୍ତିକାନ୍ତ ରାୟ, ଜିଲା ଯୋଗାଣ ଅଧିକାରୀ ତିଳୋତମା ପ୍ରଧାନ, ଅତିରିକ୍ତ ଜିଲା ଯୋଗାଣ ଅଧିକାରୀ ଶୋଭରାଜ ସାମନ୍ତରାୟ ଓ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ସୁରେନ୍ଦ୍ର କୁମାର ସାହୁ ପ୍ରମୁଖ ଉପସ୍ଥିତ ଥିଲେ।