ଭୁବନେଶ୍ୱର,୨୫।୫(ବ୍ୟୁରୋ): ଝାରପଡା ଜେଲ୍ର ଆଇସୋଲେଶନରେ ଥିବା କରୋନା ଆକ୍ରାନ୍ତଙ୍କ ସ୍ଥିତି ବିଗିଡିବାରେ ଲାଗିଛି। ଆଜୀବନ ସଜା କାଟୁଥିବା ଜଣେ ୭୨ ବର୍ଷୀୟ ବୃଦ୍ଧ କରୋନାରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିବାବେଳେ ସୋମବାର ତାଙ୍କ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ହୋଇପଡିବାରୁ ତାଙ୍କୁ ଭୁବନେଶବରର ଏକ ଘରୋଇ କୋଭିଡ୍ ହସ୍ପିଟାଲ୍ରେ ଭର୍ତ୍ତି କରାଯାଇଛି। ସେହିପରି ଅନ୍ୟ ୨୫ଜଣ ଆକ୍ରାନ୍ତ କଏଦୀଙ୍କ ନିଃଶ୍ୱାସ ନେବାରେ ସମସ୍ୟା ଉପୁଜିଥିବା ସୂଚନା ମିଳିଛି। ଏହାକୁ ନେଇ ଜେଲ୍ ପରିସରରେ ଭୟର ବାତାବରଣ ସୃଷ୍ଟି ହୋଇଛି।
ମିଳିଥିବା ସୂଚନା ମୁତାବକ, ଗୁରୁତର ବୃଦ୍ଧ କଏଦୀ ଜଣକ ରବିବାର ରାତିରେ ନିଶ୍ୱାସ ନେବାରେ କଷ୍ଟ ଅନୁଭବ କରିବାରୁ ଜେଲ୍ କର୍ତ୍ତୃପକ୍ଷଙ୍କୁ ଜଣାଇଥିଲେ। ନିୟୋଜିତ ଡାକ୍ତର ମେଡିସିନ ଦେଇଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ରାତି ସାରା ଯନ୍ତ୍ରଣାରେ ଛଟପଟ ହେବା ପରେ ସୋମବାର ସକାଳେ ସଙ୍କଟାପନ୍ନ ହୋଇପଡିଥିଲେ। ଏ ସଂକ୍ରାନ୍ତରେ ଜେଲ୍ କର୍ତ୍ତୃପକ୍ଷ ଯୋଗାଯୋଗ କରିବା ପରେ ବିଏମ୍ସି ପକ୍ଷରୁ ଆମ୍ବୁଲାନ୍ସ ଯୋଗେ ତାଙ୍କୁ ହସ୍ପିଟାଲ୍ ପଠାଇଛି। ସେପଟେ ପ୍ରଥମ ପର୍ଯ୍ୟାୟରେ କରୋନା ଟେଷ୍ଟ କରିଥିବା ୨ଶହ ଜଣଙ୍କ ମଧ୍ୟରୁ ୯୬ ପଜିଟିଭ୍ ବାହାରିଥିଲେ। ଶନିବାର ୧୮୦ଜଣଙ୍କ ସ୍ବାବ୍ ସଂଗ୍ରହ କରିଥିଲା ବିଏମ୍ସି। ତେବେ କେତେଜଣ କଏଦୀ ପଜିଟିଭ୍ ଚିହ୍ନଟ ହୋଇଛନ୍ତି ତାହାର ତଥ୍ୟ ବିଏମ୍ସି କିମ୍ବା ଜେଲ୍ କର୍ତ୍ତୃପକ୍ଷଙ୍କ ପକ୍ଷରୁ ମିଳିପାରିନି। ତେବେ ଜେଲ୍ ପରିସରରେ ଉନ୍ନତ ଚିକିତ୍ସାର ବ୍ୟବସ୍ଥା କରାଯାଉ ବୋଲି ଦାବି ହେଉଛି। କରୋନା ପଜିଟିଭ୍ଙ୍କୁ ଉଷୁମ ଓ ଉନ୍ନତ ମାନର ଖାଦ୍ୟ ଦିଆଯାଉ ନ ଥିବାରୁ କଏଦୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ମାଟିତଳୁ ପୁଣି ୨ ମୋବାଇଲ୍ ମିଳିଲା
ସବୁବେଳେ ଚର୍ଚ୍ଚାରେ ଥିବା ଝାରପଡ଼ା ଜେଲ୍ ପରିସରରେ ଏବେ ବାରମ୍ବାର ମୋବାଇଲ୍ ଫୋନ୍ ମିଳୁଛି। ନୂଆ ଅଧୀକ୍ଷକ ରବିବାର ଚଢ଼ାଉ କରି ଜଣେ ଚିଟ୍ଫଣ୍ଡ ଅଭିଯୁକ୍ତଙ୍କ ସେଲ୍ ନିକଟ ମାଟିତଳୁ ଗୋଟିଏ ମୋବାଇଲ୍ ଫୋନ୍ ଜବତ କରିଥିଲେ। ସୋମବାର ଆଉ ୨ଟି ମୋବାଇଲ୍ ଜବତ ହୋଇଛି। ଜେଲ୍ ପଡିଆରେ କଏଦୀମାନେ ସେସବୁକୁ ମାଟିରେ ପୋତି ଲୁଚାଇଥିବା ସନ୍ଦେହ କରାଯାଉଛି। ଏହାକୁ ମିଶାଇ ଚଳିତ ମାସରେ ମୋଟ ୧୫ ମୋବାଇଲ୍ ବାହାରିଥିବାରୁ ଜେଲ୍ ଭିତରେ ମୋବାଇଲ ଖଣି ରହିଥିବା ଚର୍ଚ୍ଚା ହେଉଛି।
