କରୋନା ସମୟରେ ଯେତେବେଳେ ସ୍କୁଲ ବନ୍ଦ ଥିଲା ସେତେବେଳେ କିଛି ପିଲା ଘରେ ରହି ନିଜର କଳା କୌଶଳ ପ୍ରଦର୍ଶନ କରିଥିଲେ। ଜଣେ ଛାତ୍ର ୨୧ ମାସ ପର୍ଯ୍ୟନ୍ତ ମାଉଥ୍ ଅର୍ଗାନ ଏପରି ଅଭ୍ୟାସ କଲେ ଯେ, ଶେଷରେ ଏସିଆ ମହାଦେଶର ପ୍ରଥମ ମାଉଥ୍ ଅର୍ଗାନ କଳାକାର ପାଲଟିଗଲେ। ତାଙ୍କ ନାମ ‘ଇଣ୍ଡିଆ ବୁକ୍ ଅଫ୍ ରେକର୍ଡସ’ରେ ସ୍ଥାନ ପାଇଛି।
ଏପରି କାର୍ଯ୍ୟ କରି ଦେଖାଇଛନ୍ତି, କୋଲକାତା ହୁଗୁଳି ଜିଲାର ସିଙ୍ଗୁରରେ ରହୁଥିବା ଜଣେ ୯ ବର୍ଷର ବାଳକ। ଏତେ କମ୍ ବୟସରେ ସେ ସଙ୍ଗୀତର ଯାଦୁଗରି ଦେଖାଇଛନ୍ତି। ତାଙ୍କ ନାମ ସନ୍ତମ ଦାସ। ସେ ଲଗାତର ୧ ଘଣ୍ଟା ପର୍ଯ୍ୟନ୍ତ ମାଉଥ୍ ଅର୍ଗାନରେ ୪୫ଟି ହିନ୍ଦୀ, ବଙ୍ଗଳା ଏବଂ ଇଂରାଜୀ ଗୀତକୁ ଅତି ସୁମଧୁର ଭାବରେ ବଜାଇଥାନ୍ତି।
ସନ୍ତମଙ୍କ ପିତା ସଞ୍ଜୟ ଦାସ କୁହନ୍ତି, ତାଙ୍କ ପୁଅର ନାମ ଏବେ ଇଣ୍ଡିଆ ବୁକ୍ ଅଫ୍ ରେକର୍ଡସରେ ସ୍ଥାନ ପାଇଛି। ଆଗକୁ ଗିନିଜ୍ ବୁକ୍ ଅଫ୍ ଓ୍ବାଲର୍ଡ ରେକର୍ଡ କରିବେ ବୋଲି ଆଶା ରହିଛି। ସନ୍ତମ ପିଲାଦିନରୁ ମାଉଥ୍ ଅର୍ଗାନ ବଜାଉଥିଲେ। ମାତ୍ର କରୋନା ମହାମାରୀ ସମୟରେ ତାଙ୍କୁ ଅଧିକ ପରିଶ୍ରମ ପାଇଁ ସମୟ ମିଳିଲା। ତେଣୁ ସେ ୨୧ ମାସ ଧରି ଏହି ଅଭ୍ୟାସ ଜାରି ରଖିଲେ। ଯାହା ଆଜି ତାଙ୍କୁ ଏହି ସ୍ଥାନରେ ପହଞ୍ଚାଇଛି। ତାଙ୍କ ସଫଳତାରେ ପରିବାର ଲୋକେ ବହୁତ ଖୁସି ବୋଲି କହିଛନ୍ତି ସଞ୍ଜୟ।
